وزگەدەن بۇرىن ءوزىمىزدى جارىلقاۋعا ءتيىسپىز. ءماجىلىس دەپۋتاتتارى حالىقتىڭ كوشى-قون زاڭناماسىن تالقىلاۋ كەزىندە وسىلاي اشىنىپ سويلەدى. بۇل تۋرالى «قامشى» پورتالى nur.kz-كە سىلتەمە جاسايدى.

قازاق ەلىنە بوسقىنداردىڭ ورنىنا قانى ءبىر قانداس اعايىنداردى اكەلۋ كەرەكتىگىن قاداپ ايتتى. ولاردى بىر-بىرلەپ ەمەس، اۋىلىمەن تۇگەل كوشىرۋ ماسەلەسى ءسوز ەتىلدى.

قازاقتىڭ باسىنا قارا بۇلت ۇيىرىلسە، جەمە-جەمگە كەلگەندە كومەك قولىن سوزار تەك قازاق قانا. ازۋلى اقش-تىڭ بوسقىنداردى ورتا ازياعا قونىستاندىرۋ ۇسىنىسىن ءبىزدىڭ دەپۋتاتتار قولدامايتىن بولىپ شىقتى. ولار ءبىراۋىزدان تورتكۇل دۇنيەدە تارىداي شاشىلعان 5 ميلليون قازاقتى اۋەلى جارىلقاپ الايىق دەدى.

قونىسىن اۋدارۋعا كەتكەن شىعىندارى مەن تۇرعىن ءۇي ماسەلەسىن شەشۋدىڭ وڭتايلى جولدارى ۇسىنىلدى. ەندى جاڭا وزگەرتۋلەرگە سايكەس، ورالماندار تۇتاس اۋىلىمەن كوشىپ كەلۋگە مۇمكىندىك تۋىپ وتىر.

«ءبىز زاڭنامانىمىزدى رەتتەيمىز دەپ جاتقاندا ورالمانداردىڭ ورنىنا بوسقىندارعا جول اشىپ بەرمەيمىز بە دەگەن ءقاۋىپ بار مەندە. قورقامىن. سول ءۇشىن بۇل ماسەلەگە تەرەڭ قاراپ، شەت ەلدەگى ەلشىلەردىڭ باسىن قوسىپ، جەر ءبولىپ، قيىندىق كورمەيتىندەي تۇرۋعا جاعداي جاساۋعا شاقىرامىن»،- دەيدى دەپۋتات سەرىكباي نۇرعيسايەۆ.

ورالماندارعا ازاماتتىق بەرۋ مەرزىمى دە ناقتىلاندى. ەندى ەلىن اڭساپ كەلگەن ءار قازاق ىحتيارحات العاننان كەيىن ءبىر جىل ىشىندە ەل ازاماتى مارتەبەسىن يەمدەنەدى.

«ازاماتتار قاي اۋدانعا كەلگەنىنە قاراماستان، ءبىز ورالمان مارتەبەسىن بەرەمىز. ءبىر جىلعا دەيىن ونىڭ ورالمان ماسەلەسى توقتاتىلماي تۇرادى. ول وسى ۋاقىتتان كەيىن قازاقستاننىڭ ازاماتى بولادى. ەگەر وسى ۋاقىتتا الماسا، وندا شەتەلدىك ازامات رەتىندە تۇرا بەرەتىن بولادى»،- دەدى  دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا.

جەكەشەلەندىرۋگە جاتاتىن 60 ءىرى كومپانيانىڭ تاعدىرى دا تالقىعا سالىندى. «الەۋمەتتىك ماڭىزى بار نىساندارىمىز ۇستاعاننىڭ اۋزىندا كەتە مە دەگەن ءقاۋىپ جۇرتتى الاڭداتپاسىن. ءبارى باقىلاۋدا» دەپ سەندىردى ۇلتتىق ەكونوميكا ءمينيسترى ەربولات دوسايەۆ.

«بارلىق وبەكتىلەردى بىتىرگەننەن كەيىن كورسەتەمىز. 60-تان باسقا تاعى قاندايلارىنىڭ قوسىلاتىندىعىن دا ايتامىز. ادەيى شەتەلدىك ساراپشىلاردى شاقىرامىز، اشىق، قالاي ساتىلادى، قانداي جولمەن ساتىلاتىندىعىن كورسەتەمىز»،- دەدى ۇلتتىق ەكونوميكا ءمينيسترى ەربولات دوسايەۆ.