18 قاراشا كۇنى ماڭعىستاۋ وبلىسىنىڭ اكىمى نۇرلان نوعايەۆ ەكى كۇندىك جۇمىس ساپارى بارىسىندا جاڭاوزەن قالاسىنا قاراستى ەلدى-مەكەندەردىڭ الەۋمەتتىك-ەكونوميكالىق دامۋ جاعدايىمەن تانىستى، دەپ حابارلايدى ماڭعىستاۋ وبلىسى اكىمىنىڭ باسپا ءسوز قىزمەتى.
ءىس-ساپاردىڭ العاشقى كۇنى وبلىس باسشىسى جاڭاوزەن قالاسىنا قاراستى تەڭگە، قىزىلساي، كەندىرلى اۋىلدارىنداعى الەۋمەتتىك نىسانداردى ارالاپ، بۇگىنگى جاعدايىن كوردى.
قالانى دامىتۋدىڭ 2025 جىلعا دەيىنگى كەشەندى جوسپارى اياسىندا ءبىرقاتار مەديسينالىق نىسان بوي كوتەرۋدە. وسى جىلدىڭ قىركۇيەك ايىندا قىزىلساي اۋىلىندا دارىگەرلىك امبۋلاتوريا قولدانىسقا بەرىلسە، جىل سوڭىنا دەيىن جاڭاوزەن قالاسىندا 50 ورىندىق وزىق ۇلگىدەگى مەديسينالىق ورتالىق اشىلادى دەپ جوسپارلانىپ وتىر. نۇرلان نوعايەۆ ەمحانانىڭ قۇرىلىسىمەن تانىسىپ، زاماناۋي مەديسينالىق قۇرال-جابدىقتارمەن جۇمىس ىستەيتىن مامانداردى قازىردەن دايىنداۋ كەرەكتىگىن ايتتى.
جاڭاوزەن قالاسىندا مەكتەپكە دەگەن سۇرانىس جىل سايىن ارتىپ كەلەدى. 2020 جىلى – 33،6 مىڭ وقۋشى، 2021 جىلى – 34،2 وقۋشى ءبىلىم السا، 2025 جىلى قالا مەكتەپتەرىندە وقيتىن وقۋشىلاردىڭ سانى 37 مىڭعا ارتادى دەپ جوسپارلانۋدا. مەكتەپتەردەگى ورىن تاپشىلىعىن جويۋ ماقساتىندا «شاڭىراق» شاعىناۋدانىندا 1500 ورىنعا ارنالعان سمارت مەكتەپ سالۋ كوزدەلىپ وتىر. مەكتەپتە بالالاردىڭ دامۋىنا جان-جاقتى جاعداي جاسالادى، اتاپ ايتقاندا تەلەستۋديا، ويىن بولمەلەرى، شىعارماشىلىق زەرتتەۋلەر ءۇشىن 3D پرينتەرى، روبوتوتەحنيكا كابينەتتەرى، تەمىر مەن اعاش وڭدەۋ شەبەرحانالارى جۇمىس ىستەيتىن بولادى. جوبا قۇنى 4،8 ملرد. تەڭگەنڭ قۇرايدى.
قالا مەكتەپتەرىندە مامان تاپشىلىعى بار. بۇگىندە مەكتەپتەردە ماتەماتيكا، ورىس ءتىلى، اعىلشىن ءتىلى جانە تاريح ءپانىنىڭ مۇعالىمدەرى جەتىسپەيدى. وبلىس اكىمى مۇعالىمدەرمەن تىلدەسۋ بارىسىندا كەي مەكتەپتەردە «ديپلوممەن اۋىلعا» مەملەكەتتىك باعدارلاماسىمەن كەلگەن مامانداردىڭ ءۇيلى بولعانىمەن، كوتەرمە قاراجاتتى الماعانى بەلگىلى بولدى. نۇرلان نوعايەۆ جاۋاپتى ازاماتتارعا ماسەلەنىڭ انىق-قانىعىنا جەتۋدى تاپسىردى.
- بۇل باعدارلاما ەلىمىزدەگى جاس مامانداردى الەۋمەتتىك قولداۋ جانە كادر تاپشىلىعىن تومەندەتۋگە باعىتتالعان. وسىنىڭ ارقاسىندا ءبىز مەكتەپتەردى قاجەتتى ماماندارمەن قامتىپ وتىرمىز. بۇل باعدارلامانىڭ ءاربىر قاتىسۋشىسىنا ءتيىستى كوتەرمە جاردەماقى تولەنىپ، باعدارلاماداعى جەڭىلدىكتەر مەن نەگىزگى شارتتاردى ءتۇسىندىرۋ كەرەك. ۇلتتىڭ بولاشاعىنا ىقپال ەتەتىن ۇستازدار. سوندىقتان دا پەداگوگتاردى قولداۋ ءبىزدىڭ نەگىزگى ماقساتىمىز بولىپ قالادى، دەدى نۇرلان نوعايەۆ.
ايماق باسشىسى كەندىرلى اۋىلىندا سالىنىپ جاتقان 300 ورىندىق مادەنيەت ءۇيىنىڭ قۇرىلىسىمەن دە تانىستى. جوبا «اۋىل - ەل بەسىگى» مەملەكەتتىك باعدارلاماسى بويىنشا جۇزەگە اسۋدا. مۇندا كورەرمەن زالى، 14 مىڭ كىتاپ قورى ساقتالاتىن كىتاپحانا ورنالاسادى. نۇرلان نوعايەۆ قۇرىلىستىڭ قارقىنىن باقىلاۋدا ۇستاۋدى تاپسىردى.
جۇمىس ساپارى بارىسىندا وبلىس اكىمى قازاق گاز وڭدەۋ زاۋىتىنىڭ جۇمىسىمەن تانىستى. ايماق سۇيىتىلعان گازدى پايدالاناتىن ءىرى تۇتىنۋشىلاردىڭ ءبىرى. وبلىس اۆتوكولىكتەرىنىڭ 90 پايىزدان استامى سۇيىتىلعان گازدى پايدالانادى.
وڭىرگە نەگىزگى گاز جەتكىزۋشى - قازاق گاز وڭدەۋ زاۋىتى (قازگوز). ونىڭ تەحنيكالىق قۇرىلعىلارى 90 پايىزعا توزعان. زاۋىتتىڭ اپاتتىق جاعدايدا ءجيى توقتاۋى حالىقتى وتىنسىز قالدىرۋى مۇمكىن. وسىعان وراي، قازگوز بازاسىندا جاڭا گاز وڭدەۋ زاۋىتىن سالۋ ماسەلەسىنىڭ كەشىكتىرىلۋى ەكونوميكالىق قانا ەمەس، الەۋمەتتىك ءقاۋىپتى دە ءتوندىرۋى ىقتيمال. وسىعان بايلانىستى، وبلىس اكىمى جاۋاپتى تۇلعالارعا اتالعان ماسەلەنى ۇنەمى باقىلاۋدا ۇستاۋدى تاپسىردى.
