بيىل شىمكەنتتە «نۇرلى جەر» مەملەكەتتىك باعدارلاماسىنىڭ اياسىندا 79 كوپقاباتتى تۇرعىن ءۇيدىڭ قۇرىلىسى جۇرگىزىلىپ، جىل سوڭىنا دەيىن ونىڭ 39-ىن پايدالانۋعا بەرۋ جوسپارلانىپ وتىر.
بۇل تۋرالى "جۇلدىزدى 30 كۇن" ءىس-شارالار جوسپارىنا سايكەس شىمكەنت قالاسى اكىمدىگىنىڭ قۇرىلىس باسقارماسى ۇيىمداستىرعان باسپا ءسوز تۋرى بارىسىندا باسقارما باسشىسى ابىلسەيىت رابايەۆ مالىمدەدى.
ب ا ق وكىلدەرى الدىمەن تۇران شاعىناۋدانىنداعى قۇرىلىسى اياقتالعان تۇرعىن ۇيلەرمەن تانىستى. زاماناۋي ساۋلەتتىك جوبالار بويىنشا سالىنعان توعىز جانە ون ەكى قاباتتى ۇيلەردە تۇرعىندارعا بارلىق جاعداي جاسالعان. جول، سۋ، ەلەكتر قۋاتى مەن وزگە دە ينجەنەرلىك-كوممۋنيكاسيالىق جەلىلەر تارتىلعان. قوعامدىق كولىك ءجۇرىپ تۇر.
— بيىل شىمكەنتتە «نۇرلى جەر» باعدارلاماسى بويىنشا 79 تۇرعىن ءۇيدىڭ قۇرىلىسى جۇرگىزىلدى. ونىڭ ىشىندە 2 437 پاتەرلى 39 ءۇي بيىل سالىنىپ ءبىتتى. مۇنىڭ 337 پاتەرى ءۇي كەزەگىندە تۇرعان ازاماتتارعا ارەندالىق باسپانا رەتىندە ۇلەستىرىلەدى. قالعان 2 100 پاتەر كرەديتتىك جۇيەمەن بەرىلەدى، — دەيدى ءا.رابايەۆ.
ايتا كەتەيىك، تۇران شاعىناۋدانى — ءقازىر شىمكەنتتەگى ەڭ ۇلكەن قۇرىلىس الاڭى. وندا 88 كوپقاباتتى تۇرعىن ءۇي سالۋ جوسپارلانعان. 2020 جىلى 27 ءۇي ەل يگىلىگىنە بەرىلسە، بيىل بۇل كورسەتكىش 29-عا جەتىپتى. 2022 جىلى وسى شاعىناۋداندا تاعى 32 كوپقاباتتى تۇرعىن ءۇيدىڭ قۇرىلىسى اياقتالدى.
—شىمكەنتتە ارەندالىق تۇرعىن ءۇيدىڭ كەزەگىندە 46 مىڭ وتباسى تۇر. ال، كرەديتتىك باسپانا العىسى كەلەتىندەر 148 مىڭنان اسادى. وسىنداي ۇلكەن سۇرانىستى ەسكەرە وتىرىپ، ءقازىر تۇران شاعىناۋدانىندا سالىنۋى ءتيىس قوسىمشا 50 كوپقاباتتى تۇرعىن ءۇيدىڭ جوبالىق-سمەتالىق قۇجاتتارىن ازىرلەپ جاتىرمىز. ولاردىڭ قۇرىلىسى 2023 جىلى باستالادى، — دەدى ابىلسەيىت بايسەيىت ۇلى.
باسپا ءسوز تۋرى بارىسىندا جۋرناليستەر شىمكەنتتەگى №46 مەكتەپتىڭ جانىنان سالىنىپ جاتقان قوسالقى عيماراتتىڭ دا قۇرىلىسىمەن تانىستى. 300 ورىندى عيمارات بيىلعى شىلدە ايىندا سالىنا باستاعان. كەلەسى وقۋ جىلىنىڭ باسىندا وقۋشىلارعا ەسىگىن ايقارا اشادى دەپ كۇتىلۋدە.
قالالىق قۇرىلىس باسقارماسىنىڭ باسشىسى ءا.رابايەۆتىڭ ايتۋىنشا، بيىل شىمكەنتتە بيۋدجەت قارجىسى ەسەبىنەن 11 مەكتەپ عيماراتىنىڭ قۇرىلىسى جۇرگىزىلىپ، ونىڭ 4-ەۋى قىركۇيەك ايىندا پايدالانۋعا بەرىلگەن. قالعان 7 عيمارات كەلەسى جىلى سالىنىپ بىتەدى.
ايدار قۇلجانوۆ.
فوتو سەرىك قوسايەۆ.
