اقتوبە وبلىسىندا كەلەسى جىلدىڭ جىل اياعىنا دەيىن سۋارمالى جەرلەر الاڭى قىرىق ءبىر مىڭ گەكتارعا ۇلعايادى. بۇل تۋرالى «قازسۋشار» رمك اقتوبە فيليالىنىڭ ديرەكتورى ءادىلجان ءالىزاق حابارلادى.
اقتوبە وبلىسىندا جىل سايىن اگروونەركاسىپ سالاسى كەشەندى دامىپ كەلەدى. ويتكەنى كاسىپورىندا سۋارمالى جەرلەر الاڭىن وسىرۋگە ارنالعان ارنايى مەملەكەتتىك باعدارلامالار بار. ماسەلەن، 2017-2021 جىلدارعا ارنالعان «سۋارمالى جەرلەردى قالپىنا كەلتىرۋ» مەملەكەتتىك باعدارلاماسى اياسىندا 4 جىلدا سۋارمالى جەرلەر الاڭى ارتقان.
«2019-2020 جىلدار ارالىعىندا كاسىپورىننىڭ قاتىسۋىمەن ەۋروپالىق قايتا قۇرۋ جانە دامۋ بانكىنىڭ نەسيەسىمەن باعدارلامامىزدى جۇزەگە اسىردىق. وسى ەققدب ارقىلى 13 355 گەكتار جەر قالپىنا كەلتىرىلىپ، شارۋا قوجالىقتارعا پايدالانۋعا بەرىلدى. سوڭعى جىلدارى وبلىستا ەگىستىك القاپ كولەمىنىڭ ءوسۋ قارقىنى بايقالادى. ماسەلەن، بىلتىر 30226 گەكتار جەرگە سۋارمالى جەر بولسا، ال بيىل 32000 گەكتارعا ءوستى.»-، دەدى «قازسۋشار» رمك اقتوبە فيليالىنىڭ ديرەكتورى ءادىلجان ءالىزاق.
سونىمەن قاتار وتكەن جىلى فيليال سۋارمالى سۋدى جەتكىزۋ ءۇشىن شارۋا قوجالىقتاردىڭ 4659،64 گەكتار جەرى بويىنشا كەلىسىم شارتقا وتىرعان. ال بيىل بۇل كورسەتكىش 5475،24 گا كوبەيدى. ايماق شارۋالارىنىڭ باسىم كوپشىلىگى مال ازىعىن ەگۋمەن اينالىسادى. سودان بولار، اتالعان القاپ كولەمىنىڭ 4212 گەكتار جەرىنە مال ازىعىن دايىنداۋعا ءدان-داقىلدار ەگىلگەن. كەلەر جىلى «سۋارمالى جەرلەردى قالپىنا كەلتىرۋ» مەملەكەتتىك باعدارلاماسى بويىنشا، سۋارمالى جەرلەردىڭ الاڭى 41 مىڭ گەكتارعا جەتەدى دەپ كوزدەلۋدە.
ايتا كەتۋ قاجەت، وبلىستا ۆەگەتاسيالىق ماۋسىم تابىستى اياقتالدى. وڭىردە قارعالى، مارتۋك، جانە حرومتاۋ اۋداندارىندارى وبلىستىڭ اگرارلىق سالا بويىنشا ەڭ ماڭىزدى اۋداندار بولىپ تابىلادى. ديرەكتوردىڭ سوزىنشە، بيىل اتالعان اۋدانداردا سۋارمالى سۋ تاپشىلىعى بولعان جوق.
