قازاقستاندا مايمىل شەشەگىن جۇقتىرعان ادام جوق. دەسە دە دەنساۋلىق ساقتاۋ ءمينيسترى اجار عينيات ازاماتتارعا افريكا ەلدەرىنە ازىرگە ساياحاتتاماۋعا كەڭەس بەردى، دەپ جازادى Sputnik قازاقستان سايتى.
مينيستر ەل شەكاراسۆن كەسىپ وتكەن بارلىق ادامنىڭ دەنە قىزۋى تەكسەرىلەتىنىن اتاپ ءوتتى. ەگەر تەمپەراتۋراسى بولسا، دەرەۋ وقشاۋلانىپ، جۇقپالى اۋرۋلار اۋرۋحاناسىنا جەتكىزىلەدى.
– ءبىز مايمىل شەشەگىن انىقتاۋ ءۇشىن دياگنوستيكا دايىندادىق. بۇل – ارنايى تەستەر. ولار وسى اۋرۋدى انىقتاۋعا كومەكتەسەدى. مايمىل شەشەگىنىڭ بەلگىلەرى بار پاسيەنتتەردى تەكسەرەمىز، – دەدى عينيات ۇكىمەت كۋلۋارىندا.
ءمينيستردىڭ ايتۋىنشا، دۇنيەجۇزىلىك دەنساۋلىق ساقتاۋ ۇيىمى قازاقستاندىقتاردى وسى اۋرۋعا قارسى ۆاكسينالاۋ تۋرالى ۇسىنىم بەرمەگەن. سوندىقتان بۇل ماسەلە كۇن تارتىبىندە تۇرعان جوق. مينيستر مايمىل شەشەگى العاش افريكا ەلدەرىنەن تارالعانىن، ءقازىر ول جاقتا جاعداي ۋشىعىپ تۇرعانىن جەتكىزدى.
– قازاقستان ازاماتتارىنا اۋرۋ كوپ تاراعان ەلدەرگە، اسىرەسە، افريكا ەلدەرىنە ساياحات جاساۋدى شەگەرە تۇرۋعا كەڭەس بەرەمىن، – دەدى ول.
مايمىل شەشەگىنىڭ نەگىزگى بەلگىسى – دەنەدە بورتپە پايدا بولادى. بۇعان قوسا، قىزۋ كوتەرىلىپ، باس اۋىرادى، السىزدىك سەزىلەدى.
