جاقىندا «نۇر وتان» پارتياسى الماتى قالالىق فيليالىنىڭ وتىرىسىن وتكىزگەن فيليال ءتوراعاسى، قالا باسشىسى باۋىرجان بايبەك مىرزا ءبىلىم بەرۋ مەن دەنساۋلىق ساقتاۋ سالالارىنىڭ باسشىلارىنا تاعى دا شۇيلىككەن. بۇل تۋرالى «قامشى» پورتالى nur.kz-كە سىلتەمە جاساي وتىرىپ حابارلايدى.

قالا اكىمىنىڭ كوڭىلىنە جاقپاعان بۇل سالالاردا كەلەڭسىز جايتتار ءجيى  قايتالاناتىنى جاسىرىن ەمەس. مىسالى، وتكەن جىلى 5 مەكتەپ ديرەكتورى مەن ءبىر اۋداندىق ءبىلىم ءبولىمىنىڭ باسشىسى قىزمەتىنەن بوساتىلسا، بيىل تاعى 4 مەكتەپ ديرەكتورى قارجىلىق قىلمىسى ءۇشىن جاۋاپكەرشىلىككە تارتىلعان.

ءدال وسىنداي شيكىلىكتەر قالاداعى دەنساۋلىق ساقتاۋ سالاسىندا دا جوق ەمەس. جىل باسىنان بەرى قاراي، 5 مەديسينا مەكەمەسىنىڭ باسشىسى قىزمەتىنەن قۋىلسا، تاعى ەكى باس دارىگەرگە قاتىستى قىلمىستىق ءىس قوزعالىپ، ءقازىر تەرگەۋ جۇمىستارى جۇرگىزىلىپ جاتىر.

مۇنداي جايتتەردىڭ الدىن الۋ ءۇشىن قالا بيلىگى ەندى تۇرعىنداردىڭ ارىزى بويىنشا ارەكەت ەتپەك.

“كەيدە باس دارىگەرلەردىڭ الدىنا كىرۋ مەنىڭ كابينەتىمە كىرۋدەن دە قيىن. بىرەۋگە قوڭىراۋ شالدىرماي  بارا المايسىڭ. جوعارىدان بىرەۋدىڭ بۇيرىعى كەلمەي ادامعا دۇرىس قارامايدى. مۇنداي جايتتاردى انىقتاۋ ءۇشىن تۇرعىنداردىڭ ارىز-شاعىمى بويىنشا ساراپتاما جۇرگىزىپ وتىراتىن بولامىز”، – دەدى الماتى قالاسىنىڭ اكىمى باۋىرجان بايبەك.

ايتا كەتەيىك، وسىعان دەيىن بۇقارالىق اقپارات قۇرالدارىندا قالا باسشىسى قالالىق بالالار اۋرۋحاناسىنىڭ باسشىسىن قىزمەتىنە سالعىرت قاراعاندىعى ءۇشىن جۇمىستان قۋعاندىعى جازىلعان بولاتىن.

 «قامشى» سىلتەيدى