استانادا «AMANAT» پارتياسىنىڭ قولداۋىمەن «تاۋەلسىز ەلىم – تىرەگىم!» رەسپۋبليكالىق اقىندار ايتىسى ءوتتى. جىر الامانى ەل ەگەمەندىگى مەن ۇلت تۇتاستىعىنا ارنالدى.
ايتىستىڭ اشىلۋىندا «AMANAT»-تىڭ اتقارۋشى حاتشىسى اسحات ورالوۆ پارتيانىڭ ۇيىتقى بولۋىمەن بيىل ءبىرقاتار رەسپۋبليكالىق ايتىس ۇيىمداستىرىلعانىن اتاپ ءوتتى. سونداي-اق پارتيا ۇلتتىق مادەنيەت پەن ونەردى دامىتۋعا ۇنەمى ۇلكەن ۇلەس قوسىپ كەلە جاتقانىن جەتكىزءدى.
«تاۋەلسىزدىكتەن باعالى ەشتەڭە جوق. سوندىقتان، بۇگىنگى جىر دوداسىنىڭ ءجونى بولەك. ايتىس – قازاقتىڭ بويتۇمارى، اتا-بابالارىمىزدان امانات بولىپ جەتكەن كيەلى ونەر جادىگەرى. ۇلتىمىزدىڭ رۋحانياتىن، مادەنيەتىن دامىتۋ مەن قولداۋ ءىسى ءبىر ءسات تە توقتامايدى. ءبىز ۇلتتىق ونەردى قولداۋدى الداعى ۋاقىتتا دا جالعاستىرامىز»، – دەدى اسحات ورالوۆ.
ايتىس تىزگىنىن ۇستاعان اقىن، ءماجىلىس دەپۋتاتى امانجول ءالتاي ءدۇبىرلى دودانىڭ ءمانى مەن ماڭىزىنا توقتالىپ، قازىلار القاسىنىڭ قۇرامىن جانە سىنعا تۇسەتىن اقىندار قاۋىمىن تانىستىردى. ءوز كەزەگىندە، ەلىمىزدىڭ تۇكپىر-تۇكپىرىنەن استانا تورىنە ات باسىن بۇرعان 14 اقىن كوزىقاراقتى كورەرمەننىڭ الدىندا ورامدى وي ايتىپ، سۇبەلى ءسوز ءوربىتتى.
اقىنداردىڭ جەتى جۇبى ەڭ اسىل قازىنامىز سانالاتىن ازاتتىقتىڭ قادىر-قاسيەتىن جىرعا قوستى. ءسويتىپ، ءتۇس اۋا باستالعان ءسوز بارىمتاسى قاس قارايعانشا جالعاستى. سوعان قاراماستان، قانعا سىڭگەن قاستەرلى ونەردىڭ ءقادىرىن بىلەتىن ايتىس سۇيەر قاۋىم ءبىر ساتكە بولسىن تاراپ كەتكەن جوق. تاپجىلماي تاماشالادى.
«ايتىس – اقسۇيەك ونەر. بۇگىن حالىقتىڭ ىقىلاسىنا بولەنگەن الامان ۇيىمداستىرىلدى. «AMANAT» پارتياسى الداعى ۋاقىتتا دا رۋحانيات پەن مادەنيەتكە، قازاقتىڭ بولمىسىنا، تىلىنە، دىلىنە ارنالعان وسىنداي ءىس-شارالاردىوتكىزۋدى جالعاستىرادى دەپ سەنەمىن»، – دەپ اتاپ ءوتتى قازىلار القاسىنىڭ ءتوراعاسى عالىم جايلىباي.
وسىلايشا، كورنەكتى اقىن، اباي اتىنداعى مەملەكەتتىك سىيلىقتىڭ لاۋرەاتى عالىم جايلىباي باستاعان قازىلار قۇرامىنىڭ شەشىمىمەن باس جۇلدەنى قىزىلوردالىقمەيىربەك سۇلتانحان يەلەندى. ال جۇلدەلى 1-ورىن تۇركىستاندىق بەكارىس شويبەكوۆكە، 2-ورىن ۇلىتاۋلىق تولەگەن جامانوۆقابۇيىردى. 3-ورىندى اقتوبەلىك نۇربول جاۋىنبايەۆ، اباي وبلىسىنان كەلگەن رۇستەم قايىرتاي ۇلى، كوكشەتاۋلىق نۇرماحان جاقىپبەك جانە قوستانايلىق ايبەك قالييەۆ ءوزارا ءبولىستى.
سايىسقا تۇسكەن بارشا اقىنعا قوماقتى سىي-سياپات تابىستالدى.
«بۇگىن ەلوردا تورىندە ۇلتتىق ونەرىمىز ۇلىقتالىپ، جىر جارمەڭكەسى قانات جايدى. بۇل – ايتىس ونەرىنىڭ ابىرويى اسقاقتاعان كۇن. ءتول ونەرىمىز عاسىردان عاسىرعا جالعاسا بەرۋىنە تىلەكتەسپىن. جىر بايگەسىن جوعارى دەڭگەيدە ۇيىمداستىرعان ەل اعالارىنا، التىن ۋاقىتىن قيىپ كەلگەن كورەرمەنگە العىسىم شەكسىز. تاۋەلسىزدىگىمىزدىڭ تۇعىرى بيىك بولسىن. ەلىمىز ماڭگى جاساسىن»، – دەدى جىر بايگەسىنىڭ جەڭىمپازى مەيىربەك سۇلتانحان.
پىكىر قالدىرۋ