بۇدان بىلاي مەملەكەتتىك بۇقارالىق اقپارات قۇرالدارىنىڭ ءدىن تاقىرىبىنداعى ماتەريالدارى ءدىن ىستەرى جونىندەگى اگەنتتىكپەن كەلىسىلىپ بارىپ جاريالاناتىن بولادى.

"بارلىق بەينەماتەريال مەن قۇجاتتىق ءونىم، سونداي-اق بۇگىننەن باستاپ، تەلەارنالاردان شىعاتىن بارلىق حابارلار بىزبەن كەلىسىلىپ بارىپ جاريالانادى، ويتكەنى بۇل جەردە اڭگىمە يدەولوگيا تۋرالى بولىپ وتىر. سوندىقتان ءبىز تاراتاتىن حابارلار، ايتاتىن اڭگىمەلەر، ءبىز دەرەكتى فيلمدەر مەن تەلەباعدارلامالار، بەينەونىمدەر ارقىلى جەتكىزەتىن مالىمەتتەر ورتالىقتان كەلىسىلگەن بولۋى ءتيىس"، - دەيدى ءدىن ىستەرى جونىندەگى اگەنتتىكتىڭ ءتوراعاسى مارات ءازىلحانوۆ ۆەدومستۆونىڭ القا ماجىلىسىندە.

دەگەنمەن اگەنتتىك باسشىسىنىڭ ورىنباسارى عالىم شويكين بۇل تالاپ تەك مەملەكەتتىك تاپسىرىس بويىنشا جاسالاتىن ماتەريالدارعا قاتىستى ەكەنىن اتاپ ءوتتى. "ءبىز مەملەكەتتىك اقپاراتتىق تاپسىرىس شەڭبەرىندە مەملەكەتتىڭ قارجىسىنا جاسالاتىن ماتەريالدارعا قاتىستى وسىنداي جۇمىس جۇرگىزىلەتىنىن ايتىپ وتىرمىز. وسى ورايدا مەملەكەتتىك تاپسىرىس بويىنشا ماتەريال ازىرلەيتىن بارلىق مەملەكەتتىك ب ا ق مەملەكەتتىك ساياسات يدەولوگياسىنا ساي ارەكەت ەتۋى ءتيىس"، - دەدى شويكين.

اگەنتتىك باسشىلارى حالىق اراسىنا تاراتىلاتىن ءتۇسىندىرۋ جادىنامالارىنىڭ دا وسىلاي مۇقيات تەكسەرىلەتىنىن ايتتى. "مۇنداي ماتەريالداردى اسقان ناقتىلىقپەن جانە سالىستىرىلا تەكسەرىلگەن كۇيدە جاساۋ قاجەت. ءبىز ءدىن ۇعىمىمەن بايلانىستى 200 ءتۇرلى كىتاپشانى تالداپ شىقتىق، ءقازىر حالىققا ارنالعان ءاربىر ءونىمنىڭ ءبىزدىڭ عىلىمي-ادىستەمەلىك كەڭەستىڭ تالقىلاۋىنان وتپەي تاراتىلماۋىن قاتاڭ قاداعالاۋ كەرەك دەپ ۇيعارىپ وتىرمىز. ارينە، وكىنىشكە قاراي، كەتىپ قالعان قاتەلىكتەر بار"، - دەدى ءدىن ىستەرى جونىندەگى اگەنتتىكتىڭ ءتوراعاسى.

tengrinews.kz