اقش اسكەرلەرى زىمىراندىق شابۋىل ناتيجەسىندە  "يسلام مەملەكەتى" جيھادتىق توبىنىڭ سيرياداعى جەتەكشىسىن ولتىرگەنىن مالىمدەدى، دەپ حابارلايدى BBC.

اقش حاليد ءال–ءدجابۋريدىڭ ءولىمى دايش–تىڭ لاڭكەستىك ارەكەتتەر جاساۋىنا توسقاۋىل بولاتىنىن مالىمدەدى. ۆەدومستۆو قازا تاپقان سودىردىڭ قانداي تەراكتىلەر ۇيىمداستىرعانىن  ايتپادى.

"دايش ءقاۋىپ ءتوندىرۋىن توقتاتپادى. قىلمىستىق توپ السىرەگەنىمەن، لاڭكەستىك ارەكەتىن جالعاستىرىپ، تاياۋ شىعىستان باسقا ايماقتارعا شابۋىل جاساۋعا تىرىسادى"، – دەدى اقش ورتالىق قولباسشىلىعىنىڭ باسشىسى گەنەرال مايكل كۋريللا.

زىمىران شابۋىلىنان بەيبىت تۇرعىندار زارداپ شەكپەگەن.

اقش باستاعان كوپۇلتتى كواليسيا سوڭعى ايلاردا سيريانىڭ سولتۇستىگىندە دايش–تىڭ بەلدى مۇشەلەرى مەن ءال–قايدانىڭ سيريالىق تارماعى بولىپ سانالاتىن ەكسترەميستىك توپ – حۋرراس اد–دينگە قارسى سوققى جاسادى.

ەسكە سالا كەتەيىك، يراك پەن سيريادا دايش–تىڭ 7 مىڭنان استام قولداۋشىسى بار، ولاردىڭ جارتىسىنا جۋىعىن سودىرلار قۇرايدى.