كەيىنگى كەزدەرى ساياسي ارەناداعى قاراما-قايشىلىقتاردىڭ زالالى مەن زاردابى انىق بايقالىپ جاتقانى ءسوزسىز. ول ءوزىن اقتايدى ما؟ ءبىز ءۇشىن بەيمالىم دۇنيە بۇل. ءبىراق قانشا دەگەنمەن ءدال وسى ساتتە دوسىڭ مەن دوس، باۋىرىڭمەن باۋىر بولىپ قالۋدىڭ جولىن ىزدەگەن ابزال سياقتى. ەندىگى كەزەكتەگى ماسەلە مىنادا: باۋىرلاس ەل بولىپ سانالاتىن تۇركيا ەلىمەن رەسەيگە قارسى سانكسياعا قاتىستى كوزقاراستا قاراما قايشىلىق پايدا بولىپ وتىر. ويىمىزدى ناقتىلاۋ ءۇشىن تاقىرىپتى كەڭىنەن تارقاتىپ كورسەك.
تۇركيا مەملەكەتىنىڭ باسشىسى تايىپ ەردوعان رەسەيدىڭ ۇشاقتارىنىڭ ورەكسەل قاتەلىككە بوي بەرگەنىن ايتىپ، ونى قاتاڭ جازالاۋعا شاقىردى.
رەسەي ۇشاقتارىنىڭ تۇركيا تەرريتورياسىنا ەنگەنى تۋرالى داۋعا نۇكتە قويىلعان نەگىزى نەمەسە قويىلعانداي بولدى. بۇل تۋرالى تۇركيانىڭ پرەمەر-مينيسترى احمەت ءداۋىتوعلى مالىمدەگەن بولاتىن. ماسكەۋ رەسمي كەشىرىم سۇراپ، ەكەۋ-ارا كەشىرىم جاساسىپ تارقاسقان-دى. الايدا، پرەمەرىنىڭ بۇل شەشىمىمەن ەردوعان كەلىسە الماعانعا ۇقسايدى.
تۇركيا پرەزيدەنتى الداعى ۋاقىتتا رەسەيدەن گاز ەكسپورتتاۋ ماسەلەسىن قايتا قاراستىراتىنىن مالىمدەدى. ايتا كەتۋىمىز كەرەك، تۇركيا بۇگىندە «گازپرومنىڭ» ەڭ ۇلكەن سەرىكتەسى. دەمەك ەكەۋ-ارا ارازدىق رەسەي ەكونوميكاسىنا ۇلكەن زالال كەلتىرەتىنى ءسوزسىز.
ەستەرىڭىزگە سالا كەتەيىك، رەسەي ۇشاقتارى باۋىرلاس تۇركيا مەملەكەتىنىڭ اۋە كەڭىستىگىنە بىرنەشە سەكۋنتقا ەنىپ كەتكەن. كەيىن كرەمل بۇل وقيعانى كۇن رايىنىڭ قولايسىزدىعىنان كەتكەن قاتەلىك دەپ كەشىرىم سۇراعان بولاتىن.
ەردوعان ءوز ەلىنىڭ اۋە كەڭىستىگىن بۇزۋ، ناتو-نىڭ اۋە كەڭىستىگىن بۇزۋ بولىپ تابىلادى جانە بۇل فاكتى بويىنشا رەسەيدىڭ بەرگەن مالىمدەمەسى دەرەكسىز ءارى سالماقسىز دەپ مالىمدەدى. ءسويتتى دە مىنبەدەن تۇرىپ ماسكەۋدىڭ بۇل باسسىزدىعى ءۇشىن سازايىن تارتتىرىپ، قاتاڭ جازالاۋ كەرەك دەپ جار سالدى.
ءيا، ءدال بۇگىنگى جاعدايدا بۇنداي مالىمدەمەلەرگە تويىنىپ بولدىق. الايدا وسى تۇستا ءبىزدى ويلاندىراتىن ءبىر ماسەلە. «قامشى» جاڭالىقتارىن قايتا شولىپ وقىساڭىز ەل پرەزيدەنتى نۇرسۇلتان ءابىش ۇلىنىڭ رەسەيگە سانكسيا سالۋدى دوعارۋ كەرەك دەگەن مالىمدەمەسىن وقيسىز.
"ەۋروپا رەسەيگە قاتىستى سانكسيا رەجيمىن الىپ تاستاۋ قاجەت. بۇل سانكسيالار ساياسات تۇرعىنىسىنان ناتيجە بەرمەدى. رەسەيدىڭ وتكەنىنە قاراڭىزدار - بۇل قۋاتتى ەل. سانكسيا ارقىلى بۇل ەلدى ساياسي باعىتىنان اينىتا المايسىزدار"، - دەپ مالىمدەدى ەلباسى.
ەندىگى كەزەك ءيسى قازاقتىڭ ماڭدايىنا ساپ ەتە قالاتىن ءبىر سۇراق تۋىندايدى. بىزگە رەسەي جاقىن با، الدە تۇركيا ما؟ ايتقىزباي-اق بەلگىلى. ءبىز رەسەيدىڭ ەڭ جاقىن سەرىكتەسىمىز. باعىتىمىز ءبىر. ەكونوميكامىز تىعىز بايلانىستا. الايدا، تۇركيا شە؟ ەتنيكالىق باۋىرىمىز، ءتاۋ ەتكەن تاۋەلسىزدىگىمىزدى ەڭ العاش مويىنداعان مەملەكەت قوي. ءبىراق اتالعان ماسەلەگە كەلگەندە كوزقاراستاعى قايشىلىق انىق بايقالادى ءھام الاڭداتاتىنى تاعى بار.
باۋىرلاس ەلدىڭ باعىتى بولەك بۇگىندە. ال باۋىرلاس ەلدەرمەن پىكىردىڭ قايشى بولۋى ءبىزدىڭ مۇددەمىز بە؟ الدە... ارى تارتساڭ اربا سىنادى، بەرى تارتساڭ وگىز ولەدىنىڭ كەسىرى.
ارقالىق ساعي
"قامشى" سىلتەيدى
پىكىر قالدىرۋ