8 قازاندا الماتىدا ەلىمىزدىڭ ەڭ تابىستى ءانشىسى قايرات نۇرتاستىڭ اكەسىنىڭ 50 جاسقا تولعان مەرەيتويى دۇركىرەپ ءوتتى. بۇل تۋرالى «قامشى» پورتالى نۇر.كز-كە سىلتەمە جاساي وتىرىپ حابارلايدى.

دۋماندى كەشتىڭ قىزىقتى ساتتەرىن قايرات نۇرتاستىڭ اناسى ءارى پروديۋسەرى گۇلزيرا ايداربەكوۆا ءوزىنىڭ Instagram پاراقشاسىندا جاريالاعان.

كەش قوناقتارىنىڭ اراسىندا قازاقستاننىڭ تانىمال ارتىستەرى ۇلىقپان جولداسوۆ، التىناي جورابايەۆا، نۇرلان ەسپانوۆ تا بار.

اكەسىنە ارناپ شىن كوڭىلدەن ءان شىرقاعان قايرات نۇرتاس قوناقتاردى ابدەن بيلەتىپ، كوڭىلىن كوتەرۋدە ايانعان جوق. شاتتانعان ارتىستەر بي ۇستىندە سەلفيگە ءتۇسۋدى دە ۇمىت قالدىرماعان.

ال گۇلزيرا ايداربەكوۆا ءوز جارىن توي باستالماس بۇرىن Instagram-پاراقشاسىندا قۇتتىقتاپ تا ۇلگەرگەن.

 «اياۋلى جارىم، ارقا سۇيەر تىرەگىمىز، جان-جارىم، تۋىلعان كۇنىڭ قۇتتى بولسىن! ءارقاشان دا قولىمنان جەتەلەپ، ءومىردىڭ سوقپاقتارىندا، قۋانىشتى كۇندەرىمدە جانىمنان تابىلىپ، بالالارىمىزدىڭ قىزىقشىلىعىن سوڭعى دەمىمىز بىتكەنشە بىرگە كورۋدى اللا قابىل ەتسىن! ەل-جۇرتىڭنىڭ الدىندا ابىرويلى، دەنىڭ ساۋ بولىپ، ۇزاق تا ءماندى ءومىر ءسۇرۋىڭدى تىلەيمىن!!!»، — دەپ تىلەك بىلدىرگەن تانىمال پروديۋسەر ءوز جارىنا.

ال گۇلزيرانىڭ پاراقشاسىندا قايراتتىڭ ونەرىنە ءتانتى وقىرماندار ونىڭ اكەسىنە ۇزاق عۇمىر تىلەپ، ءوز جىلى لەبىزدەرىن جاۋدىرىپ جاتىر.

ەسكە سالساق، ءانشى ءساۋىر ايىندا اناسىنىڭ تويىن دۇركىرەپ وتكىزگەن ەدى، ال ايەلىنىڭ تۋعان كۇنىن جاسىرىن اتاپ وتكەن بولاتىن.