قاراشاڭىراق قازۇۋ-دىڭ 80-جىلدىق مەرەيتويىنا وراي جۋرناليستيكا فاكۋلتەتىنىڭ ۇيىتقى بولۋىمەن جانە «مەدياسفەرا» گۋمانيتارلىق زەرتتەۋلەر عىلىمي ورتالىعى، ق ر بۇۇ قوعامدىق اقپارات دەپارتامەنتىنىڭ قولداۋىمەن «كوممۋنيكاسيا – بارىنە: شىعارماشىلىق يدەيالار مەن تەحنولوگيالاردى باسقارۋ ونەرى» اتتى ءى حالىقارالىق جۋرناليستيكا جانە كوممۋنيكاسيا قىسقى مەكتەبى ءوتتى. اتالعان ءىس-شارا الماتى وبلىسى، ىلە-الاتاۋ مەملەكەتتىك ۇلتتىق ساياباعىنا قاراستى «تاۋ-تۇران» ءبىلىم بەرۋ-ساۋىقتىرۋ كەشەنىندە ۇيىمداستىرىلدى. جوبانىڭ اۆتورى ءارى جەتەكشىسى - س.ع.د.، پروفەسسور، «مەدياسفەرا» گۋمانيتارلىق زەرتتەۋلەر عىلىمي ورتالىعىنىڭ ديرەكتورى گۇلميرا سۇلتانبايەۆا شارانىڭ ماقساتى تۋرالى: «جۋرناليستيكا قىسقى مەكتەبىنىڭ نەگىزگى ماقساتى: شىعارماشىلىق يدەيالار مەن اقپاراتتىق وقيعالاردى جاريالاۋ مەن تانىتۋ بارىسىندا جاڭا تەحنولوگيالار مەن يننوۆاسيالىق ادىس-تاسىلدەردى پايدالانۋ، ءبىلىم تولىقتىرىپ، تاجىريبەلىك داعدىلاردى يگەرۋ بولىپ تابىلادى»،-دەيدى. شارانىڭ اشىلۋ سالتاناتىندا الماتىداعى يۋنەسكو-نىڭ كلاستەرلىك بيۋروسىنىڭ باسشىسى ۆلاستيميل سامەك مىرزا قاتىسۋشىلارعا ساتتىلىك تىلەپ، ءبىلىم جەتىلدىرەتىن وسىنداي مەكتەپتەردىڭ ءوتۋى جاستاردىڭ جان-جاقتى مامان بولىپ قالىپتاسۋىنا پايداسىنىڭ كوپ ەكەندىگىن ايتىپ ءوتتى.
جالپى، قىسقى مەكتەپكە «جۋرناليستيكا»، «حالىقارالىق جۋرناليستيكا»، «قوعاممەن بايلانىس ورناتۋ»، «اقپاراتتىق جۇيەلەر»، «ماتەماتيكالىق جانە كومپيۋتەرلىك ۇلگىلەۋ»، «مادەنيەتتانۋ»، «ساياساتتانۋ» ماماندىقتارى بويىنشا ءال-فارابي اتىنداعى قازۇۋ، تۇران ۋنيۆەرسيتەتىنىڭ ستۋدەنتتەرى جانە قالالىق №2 دارىندى بالالار مەكتەبىنىڭ وقۋشىلارى قاتىستى. قىسقى مەكتەپ جۇمىسى ءۇش كۇن بويى شىعارماشىلىقپەن اينالىساتىن جاستارعا ارنالعان ارنايى باعدارلاما بويىنشا جۇرگىزىلدى.
قىسقى مەكتەپ جۇمىسى بارىسىندا دارىستەر وقىلىپ، كەيستەردىڭ شەشىمدەرىن تابۋ جولدارى قاراستىرىلدى. جەكە جانە توپتىق تاجىريبەلىك ساباقتار وتكىزىلدى، كاسىبي كەڭەستەر بەرىلدى.
شەبەرلىك ساعاتتارىن ەلىمىزگە تانىمال ماماندار مەن پروفەسسور، عالىمدار جۇرگىزدى. ماسەلەن، ىبرايەۆا عاليا – س.ع.د.، پروفەسسور، ءال-فارابي اتىنداعى قازۇۋ ءبىرىنشى پرورەكتور كەڭەسشىسى، احمەتوۆا ءلايلا – ت.ع.د.، ءال-فارابي اتىنداعى قازۇۋ يۋنەسكو ورتالىعىنىڭ ديرەكتورى، ابازوۆ رافيس – PhD، ءال-فارابي اتىنداعى قازۇۋ شاقىرىلعان دارىسكەر، كولۋمبيا ۋنيۆەرسيتەتىنىڭ پروفەسسورى، اقش، ۆەليچەنكو سۆەتلانا – ف.ع.ك.، ءال-فارابي اتىنداعى قازۇۋ دوسەنتى، «ءبىلىم» تەلەارناسىنىڭ رەداكتورى، كاكىبالانوۆ سەرىكقازى – ۇلتتىق ينتەرنەت اسسوسياسياسىنىڭ پرەزيدەنتى، ءابدىرايىم اسىلحان – ءال-فارابي اتىنداعى قازۇۋ اعا وقىتۋشىسى، «فوتوونەر» قوعامدىق بىرلەستىگىنىڭ ءتوراعاسى، لوجنيكوۆا ولگا – ءال-فارابي اتىنداعى قازۇۋ اعا وقىتۋشىسى، دانچەنكو اننا – ءال-فارابي اتىنداعى قازۇۋ PhD دوكتورانتى، «31» تەلەارناسىنىڭ پروديۋسەرى، قالىمبەت ازامات – تەلەجۋرناليست، «قازاۆتوجول» اق ءباسپاسوز-حاتشىسى، بۇحاربايەۆ مۇحامەدالى – «قازاق راديوسىنىڭ» ساياسي شولۋشىسى، ازانبەك ەربول – اق KaspiBank PR-مەنەدجەرى، ءامىرجان ءلاززات – «Woolim Construction» قوعاممەن بايلانىس، ب ا ق جانە جارناما دەپارتامەنتىنىڭ باسشىسى ت.ب. كاسىبي ماماندار ساباق وتكىزدى. قاراستىرىلعان تاقىرىپتار اياسىندا «جاڭالىق جازۋدى نەدەن باستاۋ كەرەك؟»، «فوتوسۋرەت جانە بەينە ماتەريالدارمەن جۇمىس»، «ءجۋرناليستىڭ ينتەرنەت قۇرالدارى»، «راديو جانە دىبىسپەن جۇمىس»، «مەديا-زاڭناما جانە ەتيكا»، «ۆيزۋاليزاسيا نەمەسە مودەلدەۋ»، «دارالىق جانە دەربەستىك»، «ساندىق داۋىردەگى جۋرناليستيكا» ماسەلەلەرى تالقىلاندى. سونىمەن قاتار ادىستەمەلىك جيناق جارىق كوردى.
بارلىق قاتىسۋشىلارعا بىلىكتىلىكتى ارتتىرۋ كۋرسىن ءتامامداعانى تۋرالى كۋالىك بەرىلدى.
قورىتا ايتقاندا، قىسقى جۋرناليستيكا مەكتەبىنىڭ جاستارعا بەرەر پايداسى مول بولدى. كاسىبي ماماندارمەن بىرلەسكەن جوبالار جاساۋ مۇمكىندىكتەرى تۋىندادى. شىعارماشىل جاستاردىڭ شابىتتارى شالقىپ، وي-ارماندارى الىسقا شارلاپ كەتتى دەسەك ارتىق ايتپاعان بولار ەدىك.
ايگەرىم ءالىمجان
پىكىر قالدىرۋ