قازاقستاندا قارجى پيراميداسىنىڭ قۇرباندارىنىڭ جالپى سانى ءۇش ەسەگە ارتتى. ولاردىڭ اراسىندا 11 جاسقا تولماعان التى بالا دا بار.

"اعىمداعى جىلدىڭ قاڭتار–ءساۋىر ايلارىندا 382 ادام قارجىلىق پيراميدالاردىڭ قۇربانى بولدى. بۇل ءبىر جىل بۇرىنعى ستاتيستيكادان 3،3 ەسەگە كوپ. ولاردىڭ ىشىندە 11 جاسقا تولماعان التى بالا، 16–17 جاس ارالىعىنداعى ءۇش كامەلەتكە تولماعان بالا، 18 جاستاعى توعىز ادام بار "، – دەيدى ساراپشىلار.

سونىمەن قاتار، ەلىمىزدە "قارجى پيراميداسىن قۇرۋ جانە باسقارۋ" بابى بويىنشا 4 ايدا 45 قىلمىستىق ءىس قوزعالعان. ەڭ كوپ قىلمىستىق قۇقىق بۇزۋشىلىق الماتى قالاسىندا تىركەلگەن. ودان كەيىنگى ورىندا شىعىس قازاقستان وبلىسى مەن استانادا تۇر. اباي، قاراعاندى وبلىستارى مەن شىمكەنت قالاسى دا بۇل قاتاردان قالىسپايدى.

قارجى پيارميداسىن قۇرۋشىلار قۇرباندارىن ينتەرنەت–رەسۋرستار ارقىلى تارتا باستاعان. قارجى مونيتورينگى اگەنتتىگىنىڭ مالىمەتىنشە، بيىلعى جىلدىڭ ءۇش ايىندا قازاقستاندا قارجىلىق پيراميدا بەلگىلەرى بار ءتورت مىڭعا جۋىق سايت پەن اككاۋنت بۇعاتتالعان.

زارداپ شەككەندەردىڭ 71،5 پايىزى ايەلدەر، دەپ حابارلايدى finprom.kz اقپاراتتىق پورتالى. سونداي–اق، ءتورت ايدا 11 زەينەتكەر مەن ءۇش ستۋدەنت قارجى پيراميدالارىنىڭ قۇربانى بولعان.