سولتۇستىك كورەيا كوشباسشىسى كيم چەن ىن كورەيانىڭ ەڭبەك پارتياسىنىڭ 70 جىلدىق مەرەي تويىنا ارنالعان مەرەكەلىك شەرۋدە كحدر اقش تاراپىنان باستاۋ الاتىن كەز كەلگەن سوعىستا ءوزىن قورعاي الاتىندىعى جونىندە مالىمدەمە جاسادى. بۇل تۋرالى «قامشى» پورتالى bbc.com-عا سىلتەمە جاساي وتىرىپ حابارلايدى.

كيم چەن ىن: «رۋحىمىزدىڭ مىقتىلىعى، اسكەرىمىز بەن حالقىمىزدىڭ بىرلىگى يمپەرياليستەر تاراپىنان قويىلعان سانكسيالار مەن يزولياسيادان امان وتۋگە، سونىمەن قاتار جاۋلارىمىزدىڭ بىزدەن قورقىپ، اياق تارتۋىنا ءوز سەپتىگىن تيگىزدى»، - دەگەن بولاتىن  پحەنياننىڭ كيم ير سەن اتىنداعى ورتالىق الاڭىندا وتكەن مەرەكەلىك شەرۋدە.

سونىمەن قاتار، الەمگە جولداپ، ايتقان سوزىنە دالەل رەتىندە سولتۇستىك كورەيا پرەزيدەنتى ەشبىر قاۋىپتەن قورىقپايتۇعىن قۋاتتى اسكەرى بارىن كورسەتىپ، ماقتانعىسى كەلگەندەي اسەر قالدىردى.

سولتۇستىك-كورەيلىك استانا ورتالىعىمەن مىڭداعان جاۋىنگەر قىزىل تۋ ۇستاپ، ءجۇرىپ وتسە، جويعىش پيلوتتىق توپ اۋادا 70 دەگەن ساندى بەينەلەدى.

پحەنيانداعى مەرەكەگە وراي جۇڭگو كوممۋنيستىك پارتياسىنىڭ بيىك شەندى مۇشەسى ليۋ يۋنشان مىرزادان باسقا ەشبىر شەتەلدىك كوشباسشى كەلمەدى.

سولتۇستىك-كورەيلىك تەليەۆيزيانىڭ كورسەتكەن كادرلارى كيم چەن ىننىڭ اۋدارماشى ارقىلى ليۋ يۋنشايمەن سويلەسىپ بىرنەشە رەت جىميا كۇلگەنىنە كۋا ەتتى.

پحەنياندا جۇما كۇنى تۇندە بولعان قاتتى نوسەردىڭ سالدارىنان مەرەكەلىك شەرۋدىڭ باستالۋى بىرنەشە ساعاتقا كەشەۋىلدەدى.

مەيرام سەنبى كۇنى كەشكە مىڭ ادام قاتىسقان فاكەلدىق شەرۋمەن جانە كحدر-دەگى ايگىلى «مورانبون» ايەلدەر ءانسامبلىنىڭ كونسەرتىمەن اياقتالدى.

كحدر-دىڭ اسكەري تەحنيكامەن قانشالىقتى دەڭگەيدە جابدىقتالعانىن باتىستىق ساراپشىلار مۇقيات باقىلاپ وتىردى. اسكەري تەحنيكالىق شەرۋ تۋرا 21 مينۋت ۋاقىتتى الدى.

سولتۇستىك كورەيلىك يادرولىق باعدارلاما ايماقتاس مەملەكەتتەر مەن جالپى حالىقارالىق قوعامنىڭ الاڭداۋشىلىعىن بۇرىننان تۋدىرىپ وتىر.

كەيبىر مالىمەتتەر بويىنشا، سولتۇستىك كورەيا قازىرگى ۋاقىتقا دەيىن ءۇش جەر استى يادرولىق سىناق وتكىزىپ، بەكىتىلگەن سانكسيالارعا قاراماستان ءقازىر تورتىنشىسىنە دايىندالىپ وتىرعان كورىنەدى.

پحەنيان ۇكىمەتى مەملەكەتتىڭ باس اتومدىق رەاكتورى ءيونبونداعى يادرولىق كومپلەكستە ورنالاسقانىن قىركۇيەكتە حابارلاعان بولاتىن.

سونىمەن قاتار، سولتۇستىك كورەيلىك ۇكىمەت يادرولىق زاريادتى بىرنەشە ەسە كىشىرەيتىپ، ءقازىر ونىڭ زىمىراندىق وقتىقتىڭ ىشىنە سىيىپ كەتەتىندىگىن مالىمدەدى. بۇل، ءوز كەزەگىندە، امەريكاندىق ساراپشىلاردىڭ كۇمانىن تۋدىرىپ وتىر.

نازگۇل نازار