اباي وبلىسىندا مەملەكەتتىك باعدارلاما بويىنشا بەرىلگەن جاڭا جالدامالى ۇيلەردىڭ تۇرعىندارى ءوز ومىرلەرى ءۇشىن الاڭدايدى. جاڭا ۇيلەر ءومىر سۇرۋگە جارامسىز بولىپ قالعان.
ولاردىڭ ايتۋىنشا، تۇرعىن ۇيدەگى گيپسوكارتون قابىرعالارى سالبىراپ، اياق استىنان ەدەن سىرعىپ جاتىر. بۇل تۋرالى كتك تەلەارناسى حابارلادى.
تەلەارنا مالىمەتىنشە، كوكپەكتى اۋدانى ورتالىعىنىڭ شەت جاعىندا سالىنعان جالدامالى ۇيلەر ءۇش جىل بۇرىن كوپ بالالى جانە از قامتىلعان ازاماتتارعا ارنالعان مەملەكەتتىك باعدارلاما بويىنشا سالىنعان. ۇيلەرگە تۇرعىندار بىرتە-بىرتە قونىستانا باستاعان.
دەسە دە، باسپاناعا قول جەتكىزگەن كوپ بالالى انالار وزدەرىنىڭ جانە بالالارىنىڭ قاۋىپسىزدىگى ءۇشىن قورقاتىنىن ايتادى.
"ۇيدە ارەڭ قىستادىق. ءۇش رەت پەش جارىلىپ، ءۇش رەت ونى اۋىستىردىق. كۇيەنىڭ، سۋدىڭ ءبارى وسى پەشپەن اقتى... ينتەرنەت دەگەن مۇلدەم جوق. بىزدە ەلەكتر جارىعى جوق،"-دەيدى تۇرعىن اننا سەميلەتوۆا.
ءدال وسىنداي باسپاناعا قول جەتكىزگەن تاعى ءبىر كوپ بالالى وتباسى ءقازىر قوناقۇيدە نەمەسە اۋلاداعى كيىز ۇيدە تۇنەپ جۇرگەنىن جەتكىزدى. تۇرعىننىڭ ايتۋىنشا، ساپاسىز عيماراتتا تۇرۋدان قورقادى.
تۇرعىنداردىڭ ايتۋىنشا، بۇل ءۇي سىرتىنان ادەمى كورىنەدى. ءبىراق ىشىندە قۇرىلىس نورمالارىن بۇزعان ونداعان فاكتى بار.
شەنەۋنىكتەر تۇرعىنداردان سابىر ساقتاۋدى سۇراپ، كەمشىلىكتەر تۇزەتىلەتىنىنە ۋادە بەرۋدە.
