قىزىلوردا وبلىسىندا بانك قىزمەتكەرى 600 ملن تەڭگەدەن استام اقشانى ۇرلاپ كەتكەن. بۇل تۋرالى قارجى مونيتورينگ اگەنتتىگى حابارلادى.

ۆەدومستۆو مالىمەتىنشە، بانك قويماسىنداعى قاراجاتتى تەكسەرۋ بارىسىندا 602 900 000 تەڭگە جەتىسپەيتىندىگى انىقتالعان.

"كونتروللەر-كاسسير شامامەن 1 000 000 تەڭگەدەن 4 000 000 تەڭگەگە دەيىن اقشانى بولشەكتەپ، كاسسادان ۇرلاعانى انىقتالدى. بانكتىڭ 2021-2023 جىلدار ارالىعىنداعى بەينەباقىلاۋ كامەرالارىنىڭ جازبالارى تاركىلەندى، وندا كاسسادان حالاتتىڭ جەڭىنە ورالعان اقشالاردى شىعارۋ ارقىلى ۇرلاۋ فاكتىلەرى تىركەلگەن. كۇدىكتى جاساعان قىلمىستىق قۇقىق بۇزۋشىلىقتى تولىق مويىندادى"، – دەلىنگەن حابارلامادا.

سوتقا دەيىنگى تەرگەپ-تەكسەرۋ بارىسىندا بۋكمەكەرلىك كەڭسەدەن ونىڭ اتىنا تىركەلگەن شوتىنان اقپارات الىنىپ، سوڭعى 3،5 جىلدا ەسەپشوتقا 158 ملن تەڭگە تۇسكەنى انىقتالدى.

سونىمەن قاتار، ونىڭ اتىنا جانە جۇبايىنىڭ اتىنا تىركەلگەن ابونەنتتىك نومىرلەردەن بۋكمەكەرلىك كەڭسەلەردىڭ ەسەپشوتىنا اقشا اۋدارۋ بويىنشا وپەراسيالار جۇرگىزىلگەنى تۋرالى اقپارات كەلىپ ءتۇستى.

ءقازىر كۇدىكتى قاماۋعا الىنىپ، ۋاقىتشا ۇستاۋ يزولياتورىنا قامالدى.