كەيىنگى كەزدەرى تامىرىن تەرەڭگە جايىپ، جاھاندا اتاعى ءماشھۇر بولىپ جۇرگەن سپورتتىڭ ءتۇرى – ەرەجەسىز جەكپە-جەك. تارماعى تاراپتانىپ سان قيلى بولىمدەرگە دە ءبولىنىپ ۇلگەرگەن. م-1،مما، UFS، التىبۇرىش، سەگىزبۇرىش تاعىسىن تاعىلارى.
اتالعان سپورت تۇرىنە التى اي بويى اتتان تۇسپەگەن ءباھادۇر بابانىڭ بۇگىنگى ۇرپاعى، قازاقتان شىققان سپورتشىلاردىڭ ۇلەسى بار ما؟ البەتتە بار. كوشتەن قالار كۇيىمىز جوق. اسىرەسە، ءساتتى دە شىتىرمانعا تولى توبەلەستىڭ كوكەسىن «الاش پرايد» كومانداسى كورسەتىپ ءجۇر بۇگىندە. اۋىز تولتىرىپ ايتار جەتىستىگىمىز دە جەتەرلىك. كۇنى كەشە عانا وتانداسىمىز ەرمەك ءال-اساد تلاۋوۆ مما-دەن PRIME SELECTION تارماعى بويىنشا الەم چەمپيونى بولىپ ورالدى. كراسنودار قالاسىندا وتكەن بايقاۋدان چەمپيوندىق بەلبەۋمەن ورالعان وتانداسىمىزدان العاشقى بولىپ سۇحبات الۋ مارتەبەسى «قامشى» پورتالىنا بۇيىردى دەگەندى قۋانا جەتكىزەمىز. قىسقا دا نۇسقا، قىزىعى مەن شىجىعىنا تولى اڭگىمەمىزدى نازارلارىڭىزعا ۇسىنامىز. سۇقباتتى باستاماس بۇرىن ءبىر اۋىز كىرىسپە ايتساق. ەرمەك تلاۋوۆپەن جۇزبە-جۇز كەزدەسكەندەگى اسەر ەرەكشە بولدى. مما-دەن چەمپيون بولۋ وڭاي دۇنيە ەمەس. ءبىراق قانشا بيىگىنە كوتەرىلسە دە ەرمەكتىڭ اقكوڭىلدىلىگى مەن ەلەڭ مىنەزى تاڭ قالدىردى. مۇنى سپورتشىعا قاراتا ايتۋ قيىن. ءبىراق بۇل جىگىت اسا مەيىرىمدى ەكەن. ەش قوسپاسىز، بوياماسىز شىندىق. ەندەشە كەتتىك.
ەرمەك «ءال-اساد» تلاۋوۆ: «جەتى جىل بويى سپورتتان الشاق ءجۇردىم»
- ەرەكە، ارمىسىز. جۇلدەلى ورالۋىڭىزبەن شىن جۇرەكتەن قۇتتىقتايمىز. قانجىعاڭىز بوساماسىن.
- راقمەت (كۇلىپ ءھام قىسىلا سويلەدى)
- ەرەكە، اڭگىمەمىزدى توتەسىنەن باستاساق. سپورتقا قالاي كەلدىڭىز؟
- سپورتقا بالا كۇنىمىزدە كەلدىك، ەندى. انىقتاي كەتسەم، 14 جاسىمدا كۇرەسكە قاتىستىم. سودان 20 جاسىما دەيىن قاتىسىپ ءجۇردىم. ەل چەمپيونى بولدىم. بىرنەشە جارىستاردا جۇلدەلى ورالىپ ءجۇردىم. ءبىراق كەيىن جۇمىس ىستەۋ كەرەك بولدى، ارتىنشا وتاۋ قۇردىم. سوندىقتان سپورتتان كەتىپ قالۋعا تۋرا كەلدى.
- سوندا قانشا ۋاقتىقا تاستاپ كەتتىڭىز؟
- سپورتقا كەلۋ بار، كەتۋ جوق دەگەن راس ەكەن. كەيىن سپورتتى تاستاپ كەتسەم دە، جانىم سونى قالاپ ءجۇردى. يۋ-تۋب جەلىسىنەن ەرەجەسىز جەكپە-جەكتەردى باقىلاپ ءجۇردىم. قىزىعىپ ءجۇرىپ 7 جىل ۋاقىتتىڭ قالاي ءوتىپ كەتكەنىن بايقاماي قالىپپىن. سودان، بىردە وسى ءوزىمدى تەكسەرەيىنشى دەگەن وي كەلدى. سودان استانادا اۋەسقويلار اراسىنداعى ەرەجەسىز جەكپە-جەككە قاتىسىپ كوردىم. العاشقى جەكپە-جەكتى ۋاقىتىنان بۇرىن اياقتادىم.
- ءجۇرىپ-جۇرىپ توبەلەسكە ارالاسىپ كەتكەنىڭىزگە ۇيدەگى جەڭگەي قالاي قارادى؟ قارسىلىق ءبىلدىرىپ، قايتەسىڭ دەگەندەي سىڭاي كورسەتپەدى مە؟
- (ءبىر كۇلىپ الدى) جو-جوق. ول مەنى تولىقتاي قولدادى. قۇدايعا شۇكىر ءالى دە قولداپ كەلەدى.
- ەرەكە، كەلەسى سۇراق. ءبىزدىڭ بىلۋىمىزشە ءسىز ءقازىر «الاش پرايد» قۇرامىندا ءجۇرسىز. ەگەر ءسىز 7 جىل بويى سپورتتى تاستاپ كەتسەڭىز، سپورتتىق فورماڭىز كەتتى، نوباي كەتتى دەگەندەي. «الاش پرايد-قا» قالاي كەلدىڭىز؟
- جاڭا ايتىپ وتكەندەي يۋ-تۋب جەلىسى ارقىلى «الاش پرايد» كومانداسىنىڭ توبەلەستەرىن كورىپ كوپ قىزىقتىم. سودان ءبىر كۇنى تارازدان الماتىعا ءبىراق تارتتىم. جىگىتتەردەن «الاشتىڭ» دايىندالاتىن زالىن سۇراپ سوندا كەلدىم. سودان اۋەسقويلار اراسىندا 4 توبەلەس وتكىزىپ، تورتەۋىندە ۋاقىتىنان بۇرىن اياقتاتدىم. ءوزىمدى مما-دا كورگىم كەلەدى دەدىم. العاشىندا اسحات ەربولاتوۆ اعامىز: «بۇل باسقا دەڭگەي. مۇندا كاسىپقوي كۇرەسكەرلەر عانا جينالادى»،- دەدى. ءبىراق دەگەنىمنەن قايتپايتىنىمدى كورگەن سوڭ، كەيىن جارىستارعا شاقىرامىز دەدى. كەيىن شىمكەنت قالاسىنداعى ءبىر تۋرنيرگە شاقىردى. العاشىندا تالدىقورعاندى ءبىر جىگىتپەن تەكسەرۋ ءۇشىن شىعاردى. ونى 4ء-شى سەكۋندتا تەۋىپ، نوكاۋتقا جىبەردىم. باپكەرلەر مۇنى كەزدەيسوقتىق دەپ كەستى عوي دەيمىن. ەكىنشءى جەكپە-جەك جاقسى اتاعى شىعىپ قالعان، جۇلدىز بولىپ جۇرگەن، اقش-تا جاقسى كورسەتكىش كورسەتىپ جۇرگەن ناريمان مۇسايەۆپەن شىقتىم. جەكپە-جەك 6 سەكۋندتا توقتادى. تاعىدا نوكاۋت. بۇل جولى ۇرىپ قۇلاتتىم. سودان باستالدى «الاش پرايدقا» قوسىلۋىم. ارتىنشا «بيتۆا پود موسكۆوي» دەگەن جارىسقا قاتىسىپ جەڭىسكە جەتتىم.
- تالپىنعان ادامعا، ارمانىنا سەنگەن اداماعا الىنبايتىن قامال جوق دەيسىز عوي؟
- ءدال سولاي.
- كاسىپقوي مانسابىڭىزداعى رەكوردىڭىز قانداي؟
- بۇگىنگە دەيىن 14 جەكپە-جەك وتكىزدىم. سونىڭ 12ء-سىن جەڭىپ، 2 –ەۋىنەن جەڭىلدىم.
- جەڭىلىستى قالاي قابىلدادىڭىز؟
- تىك تۇرىپ. ەش مويىمادىم. كەرىسىنشە جاڭا موتيۆاسيا بەرىپ وتىردى!
- ءسىز چەمپيوندىق بەلدىكتى الىپ جاتقاندا، قازاق حاندىعىنىڭ 550 جىلدىعى تويلانىپ جاتتى...
- ءيا، ءدال سولاي. ايتا كەتكىم كەلەتىنى مىنادا، مەن جەڭىسىمدى قازاق حاندىعىنىڭ 550 جىلدىعىنا تارتۋ ەتەمىن. جالپى وسى جەڭىس جولىندا قولداۋ كورسەتكەن باپكەرلەرىمە، سپاررينگ-سەرىكتەستەرىمىزگە كوپ-كوپ راحمەت!
- رياسىز اڭگىمەڭىز ءۇشىن العىس ايتسام دەپ ەدىم.
- سىزگە دە راقمەت!
ايان مەيراش
پىكىر قالدىرۋ