ءقادىرلى، قاعازستاندىقتار! سىزدەر ءوز ۇرپاقتارىڭىزدى مەكتەپكە، جوو-نا ساپالى ءبىلىم السىن دەپ بەرەتىن شىعارسىزدار؟ وكىنەرلىگى، سىزدەردىڭ بالالارىڭىزعا ءبىلىم بەرەتىن ۇستازدار قاۋىمى قارشا بوراعان قالىڭ قاعازدىڭ استىنا كومىلىپ قالدى. ولاردى باسىپ قالعان قاعاز بارعان سايىن قالىڭداي تۇسۋدە. ۇستازداردى قۇتقارايىق! ۇستازدار ارقىلى جاس ۇرپاقتى قۇتقارايىق! ارداقتى اعايىن! ءقازىر باستاۋىش، ورتا مەكتەپتەردە بولسىن، جوو-دا بولسىن، مۇعالىمدەردىڭ ۋاقىتى مەن قاجىر-قايراتىنىڭ ءبارى تۇككە كەرەگى جوق قاعاز جازۋعا كەتىپ جاتىر. ماسەلەن، ۋنيۆەرسيتەتتە ءبىر ءمۇعالىم ەكى-ۇش پاننەن ساباق بەرەتىن بولسا، ءار ءپان ءۇشىن 50-60 بەتتەن تۇراتىن ۋمكد (ءپاننىڭ وقۋ-ادىستەمەلىك كەشەنى) دايىندايدى. ونىڭ ىشىندە وتەتىن ساباعىڭنىڭ، وقيتىن ءدارىسىڭنىڭ تولىق ءماتىنى، اپتالىق، ايلىق، ساعاتتىق جوسپارى، ارالىق باقىلاۋ سۇراقتارى، ەمتيحان سۇراقتارى، كورنەكى ماتەريالدار، ەلەكتروندى قۇرالدار، سايتاننىڭ ساپالاعى... سەكىلدى يتباي-شورتبايدىڭ ءبارى بولۋ كەرەك. بۇدان تىس، ءار مۇعالىمدە قوعامدىق مىندەتتەر (تاربيە جۇمىسىنا جاۋاپتى، عىلىمي جۇمىسقا جاۋاپتى، پراكتيكاعا جاۋاپتى، سمك-عا جاۋاپتى، كاسىپتىك باعدارعا جاۋاپتى، جۇمىسقا ورنالاستىرۋعا جاۋاپتى...ت.س.س) بولادى، ولاردىڭ وزىنە اتان تۇيەگە جۇك بولاتىن پاپكالار دايىندالادى... ەكى كۇننىڭ بىرىندە اتتانداپ تەكسەرۋ، ءار ءتۇرلى كوميسسيا، اتتەستاسيا... كەلەدى. ولار وقۋ ساپاسىن تەكسەرسە نە ارمانىڭ بار؟! جاڭاعى قالىڭ قاعازدى تەكسەرەدى. سونىمەن، ءقازىر قازاقستاندا ءمۇعالىم بايقۇستار جاس ۇرپاققا ساپالى ءبىلىم بەرۋمەن ەمەس، تەك ەرتەڭ قوقسىققا تاستالاتىن قاعاز تولتىرۋمەن اينالىسۋدا... ەلباسىنىڭ ءوزى بيىك مىنبەدەن رەسمي جينالىستا "قاعازباستىلىقتى دوعارۋ" تۋرالى بىرنەشە رەت تاپسىرما بەردى. وعان پىسقىرعان ادام كورىنبەيدى. كەرىسىنشە ۇدەپ بارادى. ال مەن مىنا ماقالانى جازعان اۆتورعا دا، ونى جاريالاعان "ەق" گازەتىنىە دە ريزاشىلىعىمدى ايتا وتىرىپ، جاس ۇرپاققا جانى اشيتىن بارلىق ازاماتتى ۇستازداردى قاعازباستىلىقتان قۇتقارۋعا شاقىرامىن. ۇستازدار سىزدەردىڭ بالالارىڭىزعا، ەلىمىزدىڭ ەرتەڭگى ەگەلەرىنە ءبىلىم بەرۋمەن اينالىسسىن!