مەكسيكادا Facebook الەۋمەتتىك جەلىسى ارقىلى كىسى ولتىرۋگە جالدانعان 14 جاستاعى جەتكىنشەك قاماۋعا الىندى. بۇل تۋرالى «قامشى» پورتالى bbc.com-عا سىلتەمە جاساي وتىرىپ حابارلايدى. تومەنگى كاليفورنيا شتاتىنداعى پروكۋراتۋرا وكىلىنىڭ مالىمدەۋىنشە، جەتكىنشەك پوليسيا قىزمەتكەرلەرىنە تيحۋانا قالاسىنداعى ءبىر ادامدى 31 مىڭ پەسوعا (1،9 مىڭ دوللار) ولتىرگەنى تۋرالى مويىنداعان ەكەن.

بەلگىلەنگەن ۋاقىتتا جاس جىگىت ەسىرتكى ساتاتىن قالا اۋداندارىنىڭ بىرىنە تاكسيمەن جەتىپ، ول جەردەن قاجەتتى قارۋ-جاراققا يە بولىپ، ولتىرەتىن ادامى تۋرالى اقپارات العان.

ءوز مىندەتىن ورىنداعان جەتكىنشەك، پوليسيا قىزمەتكەرلەرىمەن تۇتقىندالعان سوڭ، بولعان جايتتى بوياماسىز بايانداپ بەرگەن.

تيحۋانا قالاسىنىڭ پوليسيا باسشىسى الەحاندرو لارەس مەكسيكاداعى قىلمىستىق توپتاردىڭ كىسى ولتىرۋگە جاس جەتكىنشەكتەردى بۇلاي جۇمىلدىرۋى العاش رەت ورىن الىپ جاتقان جايت ەمەس ەكەندىگىن ايتىپ ءوتتى. بۇعان سەبەپ، كامەلەتتىك جاسقا تولماعان بالالاردىڭ قاماۋعا الىنۋ مەرزىمى ەرەسەكتەرگە قاراعاندا الدەقايدا از بولاتىندىقتان ەكەن.

ماسەلەن، 2010 جىلدىڭ جەلتوقسانىندا مەكسيكادا «ەل پونچيس» دەگەن لاقاپ اتقا يە 14 جاستاعى جەتكىنشەك ءتورت كىسى ولىمىنە كىنالى ەكەنىن مويىنداعان بولاتىن.