بۇۇ-نىڭ يۋنيسەف بالالار قورىنىڭ ۇيىمداستىرۋىمەن وتكىزىلگەن ارنايى دارىستە الەمدەگى بالالار ماسەلەسى تالقىلاندى. استاناداعى اقان قۇرمانوۆ اتىنداعى №17 مەكتەپ-گيمنازياسىنىڭ وقۋشىلارى قاتىسقان ساباقتا قازاقستان رەسپۋبليكاسى ءبىلىم جانە عىلىم ۆيسە-مينيسترى ەسەنعازى يمانعالييەۆ پەن قازاقستانداعى يۋنيسەف وكىلى يۋريي وكساميتنىي ءسوز سويلەپ، وقۋشىلارمەن جاھاندىق ماسەلەلەردى تالقىعا سالدى.

الەم بويىنشا ەڭ ۇلكەن ءدارىستىڭ العاشقىسى  نيۋ-يورك قالاسىندا بيىلعى جىلدىڭ 4 قىركۇيەگىندە «جاھاندىق ماقساتتار» (Global Goals) ناۋقانى اياسىندا وتكەن. بۇل ساباق الەمنىڭ 193 ەلىندەگى بالالارعا بۇۇ باس اسسامبلەياسى قابىلداعان تۇراقتى دامۋ ماقساتتارى تۋرالى بايانداۋ ءۇشىن ۇيىمداستىرىلعان. ءدارىس ماقساتى – بالالارمەن الەمدىك قاۋىمداستىق ءۇشىن اسا ماڭىزدى سانالاتىن ماسەلەلەردى تالقىلاۋ.

بيىل ەڭ ۇلكەن دارىستەر بۇكىل دۇنيەجۇزى بويىنشا كۇز بويى وتكىزىلەدى. بارلىق مەملەكەتتەردە بۇنداي حالىقارالىق ساباقتارعا مينيسترلەر مەن ۇكىمەت وكىلدەرى قاتىسادى. دارىستە بالالار دۇنيەجۇزىندەگى تۇيتكىلدى ماسەلەلەردى شەشۋدىڭ جولىن تالقىلاپ، الەمدى دامىتۋعا قاتىستى ءوز پىكىرلەرىن جەتكىزەدى. يۋنيسەف مالىمەتى بويىنشا قازاقستاندا بۇنداي دارىستەر 7، 500 استام مەكتەپتى قامتيدى. دارىستە سونداي-اق، الداعى 15 جىل ىشىندە ادامزات الدىندا تۇرعان ءۇش اسا ماڭىزدى ماسەلە قاراستىرىلادى: كەدەيشىلىكتى جويۋ، تەڭسىزدىكپەن، ادىلەتسىزدىكپەن، سونداي-اق  كليماتتىق وزگەرىستەرمەن كۇرەسۋ.  بۇۇ مەن ونىڭ يۋنيسەف بالالار قورى كەدەيشىلىكتى بارىنشا ازايتىپ، بۇكىل بالانىڭ باستاۋىش بىلىممەن قامتىلۋى ءۇشىن جانە الەمنىڭ كەيبىر ەلدەرىندە وزەكتى ماسەلە بولىپ وتىرعان بالالار ءولىمىن جويۋ مەن مەكتەپتەردەگى ءبىلىم ساپاسىن ارتتىرۋعا ارنالعان جوبالاردى قولعا العان.

«مەملەكەتتىك سەرىكتەستەرمەن جانە ازاماتتىق سەكتورمەن بىرگە ءبىز ءار بالانىڭ، سونىڭ ىشىندە، مۇگەدەك جانە دامۋ ەرەكشەلىكتەرى بار بالالاردىڭ قۇقىقتارى قۇرمەتتەلەتىن، ءار ءبۇلدىرشىن اتا-اناسىنىڭ ايالى الاقانىندا وسەتىن قوعامدى قۇرۋ ءۇشىن جۇمىس ىستەۋىمىز كەرەك. ءار بالا ءوزىن قامسىز، باقىتتى سەزىنەتىن جانە بار قارىم-قابىلەتىن دامىتىپ، پايدالى ىستەرگە جۇمسايتىن قوعام قۇرۋعا ۇمتىلامىز. مۇنداي قوعامدا بالالار ۇيلەسىمدى دامىپ، وزدەرىن باقىتتى سەزىنەتىن بولادى. جاھاندىق ماقساتتارعا كەلسەك، سىزدەر وقۋدا وزات بولىپ، بىر-بىرلەرىڭىزگە سىيلاستىقپەن، قورشاعان ورتاعا ايالاي قاراپ، تابيعاتقا قامقورلىق كورسەتۋ ارقىلى سول ماقساتتارعا قول جەتكىزۋگە قازىردەن باستاپ-اق كۇش سالا الاسىزدار» دەدى، قازاقستانداعى يۋنيسەف وكىلى يۋريي وكساميتنىي، وقۋشىلاردىڭ الدىندا سويلەگەن سوزىندە.

ال دارىسكە قاتىسقان قازاقستان رەسپۋبليكاسى ءبىلىم جانە عىلىم ۆيسە-مينيسترى ەسەنعازى يمانعالييەۆ جاھاندىق جانە ۇلتتىق  ماقساتتارعا جەتۋ، ەڭ الدىمەن، بالالار مەن جاستاردىڭ اتسالىسۋىنا بايلانىستى ەكەنىن العا تارتتى. ەڭ ۇلكەن دارىستە وقۋشىلار انيماسيالىق فيلمدەر تاماشالاپ، سۋرەت سالىپ، ويىن ويناۋ ارقىلى جاھانداعى احۋال جايىندا تۇسىنىكتەرىن كەڭەيتتى. بۇل دارىستە №17 مەكتەپ گيمنازيانىڭ وقۋشىلارى بۇۇ-نىڭ رەسمي تىلدەرىنىڭ ساناتىنا كىرەتىن اعىلشىن جانە فرانسۋز تىلدەرىندە بايانداما جاساپ، يۋنيسەف وكىلى مەن ۆيسە-مينيسترگە سۇراقتار قويىپ، ويلارىمەن ءبولىستى.  

شارافات جىلقىبايەۆا

«قامشى» سىلتەيدى