قازان ايىنىڭ ونىندا الماتىدا قوعام بەلسەندىلەرى سەرجان مامبەتالين مەن ەرمەك نارىمبايەۆ الەۋمەتتىك جەلىلەر ارقىلى ەل ىشىندە ۇلتارالىق ارازدىقتىڭ تۋىنداۋىنا تۇرتكى بولارلىقتاي اقپاراتتى تاراتتى دەگەن كۇدىكپەن قاماۋعا الىنىپ، ۋاقىتشا ۇستاۋ يزولياتورىنا جابىلعان بولاتىن. ولارعا ازاماتتاردىڭ ۇلتتىق ار-نامىسى مەن قادىر-قاسيەتىن قورلاۋ بەلگىلەرى بار مالىمەتتەردى تاراتتى دەگەن ماعىنادا ايىپ تاعىلىپ وتىر.

وسى ىسكە بايلانىستى قازاننىڭ 12-ىندە ق ر قىلمىستىق كودەكسىنىڭ 174ء-شى بابى، 1ء-شى ءبولىمى بويىنشا سوتقا دەيىنگى تەرگەۋ امالدارى باستالدى. ال بۇگىن، ياكي قازاننىڭ 15ء-ى كۇنى الماتى قالاسى المالى اۋداندىق سوتىندا جينالعان ماتەريالدار نەگىزىندە وسى ازاماتتارعا قارسى كۇزەتپەن ۇستاۋ تۇرىندەگى بۇلتارتپاۋ شاراسى ەنگىزىلدى.

«قازىرگى ۋاقىتتا مامبەتالين مەن نارىمبايەۆقا قاتىستى بۇلتارتپاۋ شاراسىن ودان ءارى جالعاستىرۋ ماسەلەسى شەشىمىن تاپتى. وسىعان بايلانىستى وسى ءىستى تەرگەۋ امالدارى الداعى ەكى اي بويى ۇزدىكسىز جۇرگىزىلمەك. ال ەكى ايدان كەيىن تەرگەۋشى ءوزىنىڭ پروسەسسۋالدى شەشىمىن قابىلدايتىن بولادى»، - دەدى سوت پروسەسىنە قاتىسقان المالى اۋداندىق پروكۋرورىنىڭ اعا كومەكشىسى داۋرەن اۋىپبايەۆ.

ەسكە سالامىز، پروكۋرورلىق سانكسيانىڭ پارمەنىمەن اتالعان تۇلعالاردىڭ ۇيىندە ءتىنتۋ جۇرگىزىلىپ، زاتتىق ايعاقتار تابىلعان بولاتىن.

تەرگەۋ امالدارى جالعاسىپ جاتىر.