ءبىر سويلەمدى جازبام ۇزاق تالقىلاندى. جەكە كەتىپ قالىپ تا سول ءسوزىمدى جۇلمالاپ جاتقاندار بولدى. 
فيلوسوفيا بىلاي تۇسىندىرەدى: ۇلتتىق يدەيا – حالىقتىڭ، ەتنوستىڭ نەمەسە ۇلتتىڭ ومىرلىك ءمانى. قازاق – ۇلت دەڭگەيىنە كوتەرىلىپ، مەملەكەت قۇرا العان باقىتتى ەتنوستاردىڭ ءبىرى. حالىقارالىق قاتىناستاردا ۇلت دەگەن تەرمين –مەملەكەت سوزىمەن سينونيم. 
ال قازاقتىڭ ومىرلىك ءمانى نە ەدى؟ ءبىزدىڭ ۇلتتىق يدەيامىز – بىرلىك. رۋلاردىڭ باسىن قوسۋ يدەياسىنان باستاپ، كەيىننەن ءۇش ءجۇزدىڭ بىرلىگىن تۋ ەتكەنبىز. سوسىن الاش ياعني قازاقتاردىڭ باس بىرىكتىرگەنىن قالادىق. تاعدىرلى جىلدارى كوپەتنوستى مەملەكەتكە اينالعالى بەرى ءبىز قازاقستان-نىڭ بىرلىگىن نەگىزگى يدەيا ەتىپ كەلەمىز. ۇلتتىق (مەملەكەتتىك) يدەيامىز – تاتۋلىق پەن بىرلىك. «ماڭگىلىك ەل» يدەياسىنىڭ نەگىزى دە وسىلاي ءتۇزىلدى. ونى جاقتىرمايىق، كەلەكە ەتەيىك، ءبىراق ءبارىبىر تىنىشتىقتىڭ نەزىگى وسى يدەيا بوپ كەلەدى. 
ۇلتتىق يدەيا كوزگە كورىنەتىن ماتەماتيكاداعى ناقتى ساندار نەمەسە تاريحي قۇجاتتار ەمەس. ول – ۇلتتى (مەملەكەت حالقىن) بىرىكتىرەتىن كىشكەنتاي فاكتورلاردىڭ جيىنتىعى. ول مادەنيەتتەگى، سپورتتاعى، حالىقارالىق قاتىناستارداعى ۇلكەن جەتىستىكتەر بولۋى مۇمكىن نەمەسە قاراعاندى، قىزىلاعاش جەرىن شايىپ كەتكەن سۋ تاسقىنى سياقتى تابيعي اپاتتار بولۋى دا مۇمكىن. 
بىرلىكتىڭ ينەرسياسى دا مىقتى بولادى. ايتپەسە، 2012 جىلعىداي ءبىزدى وليمپيادا ەشۋاقىتتا ەستەن تاندىرا بىرىكتىرە العان جوق ەدى. ءالى كۇنگە دەيىن ۇمىتپايمىز. كەشەگى كەزدەسۋدى ءبىر ساتتىك ەموسيا عوي مەنسىنبەگەندەر دە بولدى. ناقتى ايتايىن، گەنناديي قازاقتى بىرىكتىرىپ تۇرعان جوق. بىرلىكتى ارتتىراتىن كىشكەنتاي فاكتورلاردىڭ ءبىر بولشەگى عانا. ءبىز گەنانىڭ گۇرزى جۇدىرىعىنداي بولىپ جۇمىلعان قوعامدى كوردىك. قازاقتىڭ تۋى، شاپانى، ەل دەڭگەيىندە برەندكە اينالعان ساۋدا بەلگىلەرى ءبارى-بارى ءبىر عانا ازاماتتىڭ ارقاسىندا كوپكە تانىلدى. شاپان ىلىنگەن گەنانىڭ كيىنۋ بولمەسىنە اقش پرەزيدەنتتىگىنە كانديدات د. ترامپتىڭ ءوزى سالەم بەرىپ كىرىپ شىقتى. 
كەيبىرەۋلەر دومبىرا ۇستاپ كيىز ۇيدە وتىرماعان سوڭ قايداعى ۇلتتىق يدەيا دەيدى. ارينە ءارقايسىڭىزدىڭ پىكىرىڭىزدى سىيلايمىن. مەنىمەن كەلىسۋگە ءتىپتى دە مىندەتتى ەمەسسىزدەر. گولوۆكيننىڭ اتى شىققان سايىن قاناتتى ۇمىتتىق دەپ جىلاۋدى دا قويماي كەلەمىز. قازاق باردا قانات ۇمىتىلۋشى ما ەدى؟ ەكەۋىن ءبىر بىرىنە قارسى قويعىمىز كەلىپ، ءبىز ۇلتتىق يدەيا دەپ وتىرعان بىرلىگىمىزگە نۇقسان كەلتىرىپ جۇرگەن دە ءوزىمىز.

جارقىن تۇسىپبەك ۇلى، Facebook پاراقشاسىنان الىندى