20 قازاندا قاراعاندىدا قازاقستاننىڭ بۇرىنعى پرەمەر-مينيسترى سەرىك احمەتوۆكە جانە وبلىستىق اكىمدىكتىڭ ەكس-شەنەۋنىكتەرىنە قاتىستى قىلمىستىق ءىس بويىنشا كۋاگەرلەردى تىڭداۋ ودان ءارى جالعاستى. سوت وتىرىسىندا كۋاگەر رەتىندە جاۋاپ بەرگەن «قازاقستاندىق ونەركاسىپتىك كورپوراسيا» ءجشس-نىڭ باس ديرەكتورىنىڭ ەكس-ورىنباسارى ءالجان اقمولدايەۆ احمەتوۆتەردىڭ شەتەلدەگى كومپانيالارىنىڭ شوتىنا 2 440 000 اقش دوللارى اۋدارىلعانىن حابارلادى. ول شەتەلدىك كومپانيالار مەن بانكتىڭ اتاۋىن، مەكەن-جايىن، شوتتاردىڭ ءنومىرىن دالمە-دال اتاپ بەردى.
ايىپتالۋشىلاردىڭ ورىندىعىندا وتىرعان ءا. اقمولدايەۆ وقيعانى بىلاي ءتۇسىندىردى: «سەرىك احمەتوۆتىڭ ۇلى – دانيارمەن كوپ كەزدەسۋلەرىمىزدىڭ (ءوزىنىڭ ايتۋىنشا، ەكەۋى «ديپلومات» قوناق ءۇيىنىڭ 1ء-شى قاباتىنداعى حوللدا، «قازاقستاندىق ونەركاسىپتىك كورپوراسيا» ءجشس-نىڭ «كاسكاد» بيزنەس ورتالىعىنداعى كەڭسەسىندە ءجيى-جيى جۇزدەسىپ جۇرگەن) بىرىندە كىشى-احمەتوۆ مەنىڭ قولىما بىرىككەن اراب امىرلىكتەرىندە تىركەلگەن ەكى كومپانيانىڭ دەرەكتەمەلەرى جازىلعان ءبىر پاراق قاعازدى ۇستاتتى. الگى كومپانيالاردىڭ شوتىنا 4 ملن. اقش دوللارىن اۋدارۋدى ءوتىندى. العاشىندا ول ماعان اقشانى جارتى جىلدىڭ ىشىندە اۋدارۋ قاجەتتىگىن ايتتى. مۇنشا كولەمدەگى كوپ اقشانى تابۋ ءۇشىن، قارىز الدىم. ول ءۇشىن 2001 جىلدان دوستىق قارىم-قاتىناستا بولىپ، جاقىن ارالاسىپ جۇرگەن قايىرجان مەيرامبەكوۆتەن كومەك سۇرادىم. ەستۋىمشە، سول كەزدە ق. مەيرامبەكوۆ ءبىراز ۋاقىت باە-دە تۇردى، ءوزى اۋقاتتى ادام بولاتىن. ءسويتىپ، ونىڭ بالاسى باۋىرجاننىڭ دۋبايدا وتكەن ۇيلەنۋ تويىنا باردىم. سول جەردە قايىرجانمەن سويلەسىپ، شەتەلدەگى كومپانيالاردىڭ شوتىنا اقشا اۋدارۋعا جاردەمدەسۋىن ءوتىندىم. ول كەلىسىمىن بەردى».
كۋاگەر كەيىنىرەك ەلگە ورالىپ، اقشانى قالاي تاپقانىن، شەتەل كومپانيالارىنىڭ شوتىنا قالاي اۋدارعانىن ەگجەي-تەگجەيلى اڭگىمەلەپ بەردى. «باە-تەرىندە تىركەلگەن «سال ال-مادينا دجەنەرال ترەيدينگ» كومپانياسىنا اقشانى «ال كارادا دجەنەرال ترەيدينگ» كومپانياسى ارقىلى اۋداردىق. ءتورت ترانشپەن اۋدارىلعان قارجى «ال كارادا دجەنەرال ترەيدينگ» ارقىلى ءوتتى. 2012 جىلدىڭ 1 اقپانىندا – 250 مىڭ دوللار، 11 اقپانىندا – 300 مىڭ دوللار، 19 اقپانىندا – 200 مىڭ دوللار، 25 اقپانىندا – 250 مىڭ دوللار اقشا اۋدارىلدى. ودان كەيىن 2012 جىلدىڭ 4 ماۋسىمىندا – 250 مىڭ دوللار، 16 جەلتوقسانىندا – 490 مىڭ دوللار، ال 2013 جىلدىڭ 13 قاڭتارىندا – 500 مىڭ دوللار، 24 ناۋرىزىندا – 200 مىڭ دوللار جىبەرىلدى. وسىلايشا، 2012 جىلدىڭ اقپانى مەن 2013 جىلدىڭ ناۋرىزى ارالىعىندا س. احمەتوۆتىڭ شەتەلدىك كومپانيالارىنىڭ شوتىنا بارلىعى 2 440 مىڭ اقش دوللار اۋدارىلدى»،- دەدى ءالجان اقمولدايەۆ.
ول ءوز سوزىندە سەرىك احمەتوۆ پەن باس مەردىگەردىڭ (يندۋستريالدىق پاركتەگى ينفراقۇرىلىمدى سالۋعا جاريالانعان كونكۋرستا «قازگەرقۇرىلىس» بىرلەسكەن كاسىپورنى جەڭىسكە جەتەدى) اراسىندا دەلدالدىق قىزمەت اتقارعان دانياردىڭ ارابتىق ەكى كومپانيانىڭ اراسىندا مامىلە جاسالعانىن راستاۋ ءۇشىن جالعان كەلىسىم-شارت دايىنداۋدى تاپسىرعانىن ايتتى. ويتكەنى مامىلەنىڭ جاسالعانىن راستايتىن دالەل بولماعان جاعدايدا بانكتەگى قاراجاتتى پايدالانۋعا مۇمكىندىك جوق ەكەن. كوممەرسيالىق قۇرىلىمداردا كوپ جىل جۇمىس ىستەگەن ءا. اقمولدايەۆ تىعىرىقتان شىعاتىن جول تاۋىپ، ءبىر كومپانيانى كارتوپ جەتكىزۋشى ەتىپ، ەكىنشىسىن ونى ساتىپ الۋشى ەتىپ كورسەتەدى. جالعان مامىلەنىڭ ناتيجەسىندە 1 300 توننا كارتوپتى (شىنداپ كەلگەندە ەشقانداي كارتوپ ساتىلمايدى) 650 مىڭ دوللارعا ساتادى. كۋاگەردىڭ ءوزى س. احمەتوۆكە ۋادە ەتكەن 600 ملن. تەڭگەنىڭ 320 ملن-نان استامىن عانا شەتەلدەگى كومپانيالاردىڭ شوتىنا اۋدارىپ ۇلگەرگەنىن ايتتى. ايتپاقشى، ول ءوزىنىڭ اۋقاتتى دوستارىنان، تىلەۋلەستەرىنەن قارىزعا العان اقشاسىن قايتارا الماعانىن ەسىنە الىپ، مۇڭىن شاقتى.
ءامينا باكىر
