21 قازاندا الماتى وبلىسىنىڭ ورتالىعى تالدىقورعان قالاسىندا XIX عاسىرداعى جەتىسۋ اقىندارىنىڭ التىن دىڭگەگى، ايتىسكەر اقىن ءسۇيىنباي ارون ۇلىنىڭ 200 جىلدىق مەرەيتويىنا ارنالعان حالىقارالىق اقىندار ايتىسى وتكەن بولاتىن. سول ايتىسقا قاتىسقان تانىمال اقىن بالعىنبەك يماشيەۆ وسىدان كەيىن ايتىسقا شىعۋدى دوعاراتىنىن ايتتى. بۇل تۋرالى «قامشى» پورتالى nur.kz-كە سىلتەمە جاساپ.

Nur.kz ءتىلشىسى ايگىلى اقىننىڭ اياق استىنان ايتىستان كەتۋىنىڭ سەبەبىن انىقتاۋ ءۇشىن حابارلاسقان. ب. يماشيەۆ ءوز شەشىمىن «ءقازىر ايتىستا ناعىز لايىقتى قارسىلاستاردىڭ قالماعاندىعىمەن» ءتۇسىندىردى.

اينۇر تۇرسىنبايەۆامەن ايتىسى كەزىندە اقىن ايگىلى «توي جىرى» ءانىنىڭ ماقامىنا سالىپ، ءوز ويىن بىلاي اياقتادى.

تالدىقورعاندا ءتاتتى كۇندەر، ءتاتتى كۇندەر!

بۇل ايتىسقا شات كۇلىندەر، شات كۇلىڭدەر.

وسىمەن مەن كەتەمىن پەنسياعا،

بالعىنبەكتىڭ سوڭعى ايتىسى دەپ بىلىڭدەر.

اقىننىڭ ونەردە بىرگە كەلە جاتقان زامانداسى ايبەك قالييەۆ دوسىنىڭ مۇنداي مالىمدەسىن ەستىگەن كەزدە:

نەمەنەڭە جەتىستىڭ، بالا باتىر،

شال اقىندار ازايىپ بۇل ايتىستا،

شالا اقىندار كوبەيىپ بارا جاتىر.

بالعىن دوسىم قوشتاسىپ ايتىسپەنەن،

ايبەك كەلىپ ەندىگى جاعادا تۇر، — دەپ بالعىنبەكتىڭ ايتىستان كەتكەنىن قيمايتىنىن ءبىلدىردى.

ايتا كەتەيىك، «مەنىڭ ءپىرىم – ءسۇيىنباي» اتتى حالىقارالىق ايتىستىڭ باس جۇلدەسىن جەرگىلىكتى اقىن جانداربەك بۇلعاقوۆ جەڭىپ الدى. وعان جەڭىل اۆتوكولىكتىڭ كىلتى تاپسىرىلدى.

ال، ءبىرىنشى ورىن استانالىق سىرىم اۋەزحانعا (1 ملن تەڭگە)، ەكىنشى ورىن اينۇر تۇرسىنبايەۆاعا (700 مىڭ تەڭگە)، قوس ءۇشىنشى ورىن اياگوز سەرىك قىزى مەن جۇڭگو ەلىنەن كەلگەن ارزىگۇل قايىمبەكقىزىنا (ءارقايسىسىنا 500 مىڭ تەڭگەدەن) بۇيىردى.