«بلاگودات» پرەسۆيتەريان شىركەۋىنىڭ 67 جاستاعى پاستورى باقىتجان قاشقىمبايەۆ ىسىنە قاتىستى سوت كۋاگەرلەردەن جاۋاپ الۋعا كىرىستى. پاستورعا «بۇرىن شىركەۋگە كەلگەن ايەلدەردىڭ ءبىرىنىڭ پسيحيكاسىنا گيپنوز ارقىلى زالال كەلتىردى جانە قۇلشىلىق ەتۋ كەزىندە گالليۋسينوگەندىك سۋسىندار قولداندى» دەگەن ايىپتار تاعىلعان. استانا قالاسى الماتى اۋداندىق 2-سوتىنىڭ سۋدياسى گۇلجاھان ۇباشيەۆا ءتوراعالىق ەتەتىن سوت پروسەسى سوتتالۋشى مەن ونىڭ ادۆوكاتىنسىز ءوتىپ جاتىر. پاستور باقىتجان قاشقىمبايەۆ ءوز ءىسىن باسقا سۋدياعا بەرۋدى سۇرايدى. ول ادۆوكاتى نۇرلان بەيسەكەيەۆكە العاشقى سوتقا قاتىسۋىنا تىيىم سالعانىمەن، ونىڭ زاڭدىق كومەگىنەن باس تارتقان جوق. سۋديانى اۋىستىرۋ جونىندەگى ءوتىنىشى ورىندالماعاندىقتان، قاڭتاردىڭ 22ء-سى كۇنى وتكەن العاشقى سوت وتىرىسىندا باقىتجان قاشقىمبايەۆ پروسەسكە قاتىسۋدان باس تارتاتىنىن جانە ادۆوكاتىنا دا تىيىم سالاتىنىن مالىمدەگەن. "بلاگودات" شىركەۋىنە كەلۋشىلەر پاستور باقىتجان قاشقىمبايەۆقا قاتىستى سوت پروسەسىندە وتىر. استانا، 22 قاڭتار 2014 جىل. قورعاۋشى تاراپ «ەگەر سۋديا بۇرىن بۇل قىلمىستىق ءىس بويىنشا پروسەسسۋالدىق شەشىم شىعارۋعا قاتىسسا، ءىستى قاراۋعا قاتىسا المايدى» دەپ ەسەپتەيدى. 2012 جىلى جەلتوقساننىڭ 20-سى كۇنى وتكەن الدىن الا سوت تەرگەۋى كەزىندە سۋديا ۇباشيەۆا بۇل ءىس بويىنشا جابىرلەنۋشى دەپ تانىلعان ءلاززات المەنوۆانى ءتورتىنشى رەت پسيحياتريالىق ساراپتامادان وتكىزۋ ءۇشىن پسيحياتريالىق اۋرۋحاناعا ەركىنەن تىس جاتقىزۋ تۋرالى قاۋلى شىعارعان. وسىنداي ساراپتامانىڭ ءبىرى جابىرلەنۋشىنى «وزدىگىنەن ارەكەت ەتۋگە قابىلەتسىز» دەپ تانىعان. كەيىن تەرگەۋ ورگانى المەنوۆانىڭ وكىلى رەتىندە اپكەسىن بەكىتكەن سوڭ جابىرلەنۋشى سوتتا سويلەۋ قۇقىعىنان ايىرىلعان. ءبىراق پروسەسس سوت تاعايىنداعان جاڭا ادۆوكاتتىڭ قاتىسۋىمەن اقپاننىڭ 4-ىندە قايتا باستالدى. نۇرلان بەيسەكەيەۆ ادۆوكاتتى تاعايىنداۋ كەزىندە «سوتتالۋشىنىڭ پىكىرى ەسكەرىلۋى ءتيىس» دەگەن زاڭ تالابى بۇزىلعانىن ايتادى. قىلمىستىق-پروسەسسۋالدىق كودەكستە «قورعاۋشىنى ىسكە قاتىسۋعا شاقىرۋ قۇقىعى سوتتالۋشىعا عانا بەرىلەدى»، ال «بەلگىلى ءبىر تۇلعانى قورعاۋشى رەتىندە ۇسىنۋعا، شاقىرۋعا سوتتىڭ قۇقىعى جوق» دەپ جازىلعان. قازاقستان بيلىگى قۇرامىنا استانالىق «بلاگودات» شىركەۋى كىرەتىن «گرەيس» ميسسياسىن «الاياقتىق ارەكەتتەرمەن اينالىستى، ەكسترەميستىك ماتىندەردى تاراتتى، قۇلشىلىق ەتۋ كەزىندە گالليۋسينوگەندىك سۋسىندار قولداندى» دەپ ايىپتايدى. ال شىركەۋ مەن ونىڭ باسشىلارى بۇل ايىپتاردى مويىندامايدى. پاستور باقىتجان قاشقىمبايەۆ بۇل ءىستى «قولدان جاسالعان پروسەسس» دەپ اتايدى. ول ءىسىن باسقا سۋديانىڭ قاراۋىنا تاپسىرمايىنشا، پروسەسكە قاتىسپايتىنىن مالىمدەدى.

"ازاتتىق.org"