ءازىربايجاندا نارەستەگە تۇركى الەمىنىڭ ۇلى تۇلعاسى اتاتۇرىكتىڭ ەسىمىن بەرۋگە تىيىم سالىندى. بۇل تۋرالى اپا اگەنتتىگىنە ۇكىمەت جانىنداعى تەرمينولوگيا جونىندەگى كوميسسيا ءتوراعاسىنىڭ ورىنباسارى سايالى سادىعوۆا ءمالىم ەتتى.
ونىڭ ايتۋىنشا، بۇل تىيىم بەيرەسمي سيپاتقا يە. سوعان قاراماستان، ەل بيلىگى سابيىنە تانىمال ساياساتكەردىڭ ەسىمىن بەرەمىن دەپ كەلگەندەرگە كەلىسىم بەرمەي وتىر. ءازىربايجان بيلىگىنىڭ بۇل شەشىمدى قابىلداۋىنا تۇركيا ۇكىمەتىنىڭ ءوتىنىشى سەبەپ بولعان ەكەن. الايدا، تۇرىك اعايىنداردىڭ مۇنداي ءوتىنىشتى قاشان ايتىپ جۇرگەنى بەلگىسىز.
وتكەن جىلدىڭ مامىر ايىندا سادىعوۆا جەرگىلىكتى تۇرعىندارعا تۇركيانىڭ تۇڭعىش پرەزيدەنتىنىڭ ەسىمى بەرۋگە توسقاۋىل قويىلاتىنى تۋرالى ايتىپ ەدى.
«اتاتۇرىك - تاريحي تۇلعا، سوندىقتان ول تەك تۇرىك ەلىنە تيەسىلى بولۋى كەرەك»، - دەگەن. س.سادىعوۆا قازىرگى كۇنى ءازىربايجاندا كوشباسشىنىڭ ەسىمىن يەلەنگەن 18 ادام تۇراتىنىن ايتتى.
جالپى، اتالمىش كوميسسيا بۇعان دەيىن ادام اتىنا قاتىستى ءبىرقاتار مالىمدەمە جاساعان-دى. ماسەلەن، 2011 جىلى كوميسسيا مۇشەلەرى ەلدەگى ءاربىر ونىنشى ەسىم ستاندارتتارعا ساي ەمەستىگىن ايتسا، 2013 جىلى جاڭا تۋعان بالاعا قويىلىپ جاتقان ەسىمدەردىڭ كوبى شەتەلدىك بولىپ وتىرعانىن العا تارتىپ ماسەلە كوتەرگەن بولاتىن، دەپ جازادى Lenta.ru.
پىكىر قالدىرۋ