قازاقستاندا ەڭ تومەنگى كۇنكورىس دەڭگەيى كەيىنگى ءبىر اي ىشىندە 2 پايىزعا ارتىپ، 54 408 تەڭگەگە جەتكەن. ساراپشىلار بۇل قاراجات ازىق-تۇلىكتى ايپاعاندا، كومۋنالدىق قىزمەت پەن جولپۇلعا جەتپەيتىنىن ايتىپ، تۇتىنۋ سەبەتىن ەڭ تومەنگى جالاقى دەڭگەيىندە بەلگىلەۋدى ۇسىندى.

سوڭعى دەرەكتەرگە سۇيەنسەك، قازاقستاندا ءبىر ميلليونعا جۋىق ادامنىڭ تابىسى ەڭ تومەنگى كۇنكورىس دەڭگەيىنەن دە تومەن. اتالعان كورسەتكىش ءساۋىر ايىندا 2%-عا ءوسىپ، 55 مىڭ تەڭگەگە جەتتى. الايدا بۇل سوماعا ازىق-تۇلىك، كوممۋنالدىق قىزمەت، جولاقى سياقتى نەگىزگى قاجەتتىلىكتەردى جابۋ مۇمكىن ەمەس.

تۇرعىندار قازىرگى نارىقتاعى باعالار جاعدايىندا 50 مىڭ تۇگىلى، 350–400 مىڭ تەڭگەنىڭ ءوزى جەتكىلىكسىز ەكەنىن ايتادى.

"ەتتىڭ كەلىسى 3 مىڭ تەڭگەدەن باستالادى. 50 مىڭ تەڭگە ءبىر كۇنگە دە جەتپەيدى"، – دەيدى ولار.

ەكونوميستەردىڭ ايتۋىنشا، ەڭ تومەنگى تابىس مولشەرى كەمىندە ورتاشا ايلىقتىڭ ۇشتەن بىرىنە تەڭ بولۋى ءتيىس. سونىمەن قاتار تۇتىنۋ سەبەتى قازىرگى 50-55 مىڭ ەمەس، كەمى 130 مىڭ تەڭگەگە ەسەپتەلۋى كەرەك.

"ءبىر ادامعا 85 مىڭ تەڭگە جالاقى بەلگىلەيمىز دە، شىعىندى 50 مىڭمەن جوسپارلايمىز – بۇل قيسىنسىز. ارينە، كۇنكورىس شەگىن كوتەرۋ بيۋدجەتكە سالماق تۇسىرەدى، ءبىراق ول ازاماتتاردىڭ قاجەتتىلىگىن قامتاماسىز ەتۋگە جول اشادى"، – دەيدى ەكونوميست باۋىرجان ىسقاقوۆ.

ونىڭ ايتۋىنشا، قازىرگى تۇتىنۋ سەبەتى حالىقارالىق ستاندارتتارعا ساي ەمەس. سەبەتتەگى تاۋارلار مەن قىزمەت تۇرلەرىنىڭ سانى تىم از، بۇل ءوز كەزەگىندە كۇنكورىس شەگىنىڭ جاساندى تۇردە تومەن بولۋىنا اكەلىپ وتىر. ساراپشى سەبەتتى ناقتى قاجەتتىلىكتەرگە ساي قايتا قاراۋدى ۇسىندى.