جان باسىنا شاققانداعى جالپى ىشكى ءونىم – ماكروەكونوميكادا ءجيى قولدانىلاتىن كورسەتكىشتىڭ ءبىرى. بۇل كورسەتكىش مەملەكەتتىڭ ەكونوميكالىق قۋاتىن، حالىق ءال-اۋقاتىنىڭ دەڭگەيىن جانە تۇراقتى ءوسۋ قارقىنىن سيپاتتايدى.
حالىقارالىق ۆاليۋتا قورىنىڭ دەرەكتەرىنە سۇيەنسەك، قازاقستاننىڭ جان باسىنا شاققانداعى ءجىو بويىنشا رەسەيدەن وزاتىنى بولجامدى قۇبىلىس ەدى. بۇل جەردەگى نەگىزگى فاكتورلار – جەكەمەنشىك قۇقىعىنىڭ قورعالۋى، مەملەكەتتىڭ نارىقتاعى ۇلەسىنىڭ ازايۋى جانە زاڭ مەن ءتارتىپتىڭ سالتانات قۇرۋى.
حالىقارالىق ۆاليۋتا قورى 2025 جىلدىڭ قورىتىندىسى بويىنشا جان باسىنا شاققانداعى ءجىو كورسەتكىشى قازاقستاندا 14.77 مىڭ اقش دوللارى، رەسەيدە 14،26 مىڭ اقش دوللارى بولادى دەپ بولجام ايتىپ وتىر. تمد كولەمىندە ەكونوميكالىق قۋاتى مەن ماكروەكونوميكالىق كورسەتكىشتەرى جاعىنان تالاسسىز ءبىرىنشى ورىندى مەنشىكتەيتىن رەسەيدە بيىل جان باسىنا شاققانداعى ءجىو 3،6 پايىزعا دەيىن قۇلدىرايدى دەگەن پىكىر بار.
سونداي-اق، حالىقارالىق ساراپشىلار ۇستىمىزدەگى ءساۋىر ايىندا رەسەيدىڭ ەكونوميكالىق ءوسىمىن 1،5 پايىزعا باعالاسا، شىلدەدە بۇل كورسەتكىشتى 0،9 پايىزعا دەيىن ءتۇسىردى. ءدال وسى ەكونوميكالىق قۋات اڭگىمەسىندە ماۋسىم ايىندا قازاقستان ۇلتتىق ەكونوميكاسىنىڭ 6 پايىزدىق ءوسىمدى ۇستاپ كەلە جاتقانىن جانە ءجىو كولەمىن 300 ميلليارد دوللاردان اسىرۋ امبيسياسىنان اينىمايتىنىن مالىمدەدى.
قىتايمەن ساۋدا بايلانىسىن جەتىلدىرىپ، جاڭا نارىققا شىعۋ جولدارىن قاراستىرىپ، جاساندى ينتەللەكت پەن ءبىلىم يننوۆاسيالارىنا ينۆەستيسيا تارتىپ، تىكەلەي ينۆەستيسيا كولەمىن ۇلعايتىپ، قىرۋار شارۋا اتقارىپ جاتقان قازاقستاندا ۇلتتىق ەكونوميكا قۋاتىنىڭ ارتاتىنى تۇسىنىكتى. باستىسى – ساپا مەن تازالىق، ادالدىق پەن تاباندىلىق.
