ماڭعىستاۋ وبلىسىنىڭ دەلەگاسياسى بىرىككەن اراب امىرلىكتەرىنىڭ استاناسى ابۋ-دابيگە جوعارى مارتەبەلى شەيح سۋرۋر بەن مۇحاممەد ءال ناحاياننىڭ شاقىرۋىمەن ىسساپارمەن باردى.
كەزدەسۋ بارىسىندا تۋريزم، كولىك جانە لوگيستيكا، مۇنايدى تەرەڭ وڭدەۋ جانە وزگە دە پەرسپەكتيۆالى سالالارعا ينۆەستيسيا تارتۋ ماسەلەلەرى تالقىلاندى. تاراپتار اتالعان باعىتتار بويىنشا ىنتىماقتاستىق ورناتۋ جونىندە ءوزارا تۇسىنىستىككە قول جەتكىزدى.
سونىمەن قاتار جوعارى مارتەبەلى شەيح سۋرۋر بەن مۇحاممەد ءال ناحايان الداعى ۋاقىتتا ماڭعىستاۋ وبلىسىنا ارنايى ساپارمەن كەلۋدى جوسپارلاپ وتىرعانىن مالىمدەدى.
ايتا كەتەيىك، مەملەكەت باسشىسى قاسىم-جومارت توقايەۆ حالىققا ارناعان «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى سيفرلىق وزگەرىستەر ارقىلى شەشۋ» اتتى جولداۋىندا وبلىس اكىمدەرىنە وڭىرلەرگە ينۆەستيسيا تارتۋ جۇمىستارىن جانداندىرۋدى تاپسىرعان بولاتىن. وسىعان وراي، ماڭعىستاۋ وبلىسىنىڭ اكىمدىگى بەرىلگەن تاپسىرمالاردى جۇزەگە اسىرۋ باعىتىندا العاشقى قادامدارىن باستاپ كەتتى.
ماڭعىستاۋ وبلىسى اكىمىنىڭ باسپا ءسوز قىزمەتى
