فرانسۋزدىڭ سوت بيلىگى رف باس پروكۋراتۋراسىنىڭ بۇرىنعى قارجى ءمينيسترى الەكسەي كۋزنەسوۆ پەن بتا بانكتىڭ ەكس-باسشىسى مۇحتار ءابليازوۆتى قولدارىنا وتكىزىپ بەرۋ تۋرالى ءتالاپ-وتىنىشىن نەگىزدى دەپ شەشتى جانە ولارعا قاتىستى ىستەن قانداي دا ءبىر ساياسي استار تاپپادى دەپ مالىمدەيدى "ينتەرفاكس" اقپارات اگەنتتىگىنە بەرگەن سۇحباتىندا رف باس پروكۋراتۋراسىنىڭ اسا ماڭىزدى ىستەر بويىنشا حالىقارالىق ارىپتەستىك ءبولىمىنىڭ باستىعى دەنيس گرۋنيس. بۇل تۋرالى "ينتەرفاكس-قازاقستان" حابارلايدى.

ونىڭ ايتۋىنشا، ول بانكيردى ەكستراديسيالاۋ تۋرالى وتىنىشتەر قاراستىرىلىپ جاتقان سوتتا فرانسۋز تىلىندە بۇل ماسەلەنىڭ ءمان-جايىن ابدەن ءتۇسىندىرىپ بەرگەن. ابليازوۆتىڭ شەكتەن شىققان قىلمىستىق تەتىكتەرىن بۇگە-شىگەسىنە دەيىن ءتۇسىندىرىپ، فرانسۋز سوتىن رەسەيدە ءابليازوۆ سىبايلاستارىنا شىققان ۇكىمنەن دە حاباردار ەتىپتى.

"مەن ونىڭ قىلمىستىق قۋدالاۋ ىسىندە ەشقانداي ساياسات جوق ەكەنىن دالەلدەدىم" دەپ اتاپ وتكەن گرۋنيس. سونداي-اق ول سوتقا "ءابليازوۆتى قولىمىزعا وتكىزىپ بەرىپ جاتقان جاعدايدا، وعان قاتىستى جالپى مويىندالعان ادام قۇقىعى مەن بوستاندىعى ساقتالاتىندىعىن" ايتقان. رەسەي باس پروكۋراتۋراسىنداعىلاردىڭ ايتۋىنشا، وسى سوت وتىرىسىندا اعا ادۆوكات (باس پروكۋروردىڭ ورىنباسارى) فرانسيانىڭ اپەللياسيالىق سوتى رف باس پروكۋراتۋراسىنىڭ ەكستراديسيا جونىندەگى ءتالاپ-وتىنىشىن تولىقتاي نەگىزدى ەكەنىن ناقتىلاعانىن جەتكىزگەن.

"ول رەسەيلىك قۇقىققورعاۋ ورگاندارى ءابليازوۆتى فرانسيادا دا اۋىر قىلمىس بوپ تابىلاتىن باپ بويىنشا ايىپتاپ وتىرعانىن ايتتى. سونىمەن قاتار اعا ادۆوكات ابليازوۆ وليگارح رەتىندە ءبارىن ساتىپ الا الادى، ول وپپوزيسيالىق ساياسي پارتيالاردى قارجىلاندىرۋعا قاۋقارلى، ءوزىن قورعاۋ ءۇشىن حالىقارالىق قۇقىققورعاۋ ۇيىمدارىنان كوميتەت تە جاساقتاي الادى، ءبىراق ول فرانسۋز سوتى ادىلدىگىن ساتىپ الا المايدى دەپ مالىمدەدى" دەيدى گرۋنيس. "قورتىندىسىندا سوت رف باس پروكۋراتۋراسىنىڭ ەكستراديسيا جونىندەگى ءتالاپ-وتىنىشىن تولىقتاي نەگىزدى دەپ تاپتى" دەيدى رەسەيلىك مامان.

serke.org