مەملەكەت باسشىسى قاسىم-جومارت توقايەۆ وڭىرگە وتاندىق جانە شەتەلدىك ينۆەستورلاردى كوپتەپ تارتۋ ءۇشىن «اقتاۋ تەڭىز پورتى» اەا الەۋەتىن دامىتۋدى تاپسىرعان بولاتىن. وسى باعىتتا وبلىس اكىمدىگىنە ۇكىمەتپەن بىرلەسە وتىرىپ ەكونوميكالىق ايماقتىڭ اۋماعىن جانە باسىم قىزمەت تۇرلەرىنىڭ تىزبەسىن كەڭەيتۋ جونىندە نورماتيۆتىك-قۇقىقتىق اكتىلەر قابىلداۋدى قامتاماسىز ەتۋ جۇكتەلگەن ەدى. بۇل باعىتتا ماڭعىستاۋ وبلىسى اكىمىنىڭ باستاماسىمەن كەشەندى جۇمىستار جۇرگىزىلدى، دەپ حابارلايدى قوعامدىق كوممۋنيكاسيا ورتالىعى.

2024–2025 جىلدارى ەكونوميكالىق ايماقتىڭ اۋماعى ەكى جارىم ەسە ياعني 1926 گەكتاردان 4407 گەكتارعا دەيىن ۇلعايدى. ونىڭ قۇرامىنا بيىل اقتاۋ حالىقارالىق اۋەجايى، اقتاۋ قالاسىنىڭ جاعالاۋ بولىگى، جاڭاوزەننىڭ وندىرىستىك ايماعى جانە سارجا تەڭىز تەرمينالى كىردى. 

-الداعى ۋاقىتتا «اقتاۋ تەڭىز پورتى» اەا اۋماعى تاعى دا وسەدى. مۇنايلى اۋدانىنان ينۆەستيسيالىق جوبالاردى ىسكە قوسۋ ءۇشىن ارنايى جەردى، كاسپييەرساي كەمە جاساۋ زاۋىتىن، كەندىرلى كۋرورتتىق ايماعىن ەكونوميكالىق ايماققا كىرگىزۋ جۇمىستارى باستالىپ كەتتى. وسى اۋماقتار قوسىلعان جاعدايدا اەا كولەمى شامامەن 21 مىڭ گەكتارعا جەتەدى. بۇل ءوڭىر قازىناسىنا جاڭا ينۆەستيسيالاردىڭ قۇيىلۋىمەن جاڭا سالالاردىڭ دامۋىنا ۇلكەن مۇمكىندىك بەرەدى،-دەدى «اقتاۋ تەڭىز پورتى» اەا» اق باسقارما ءتوراعاسى مۇباراك تولەگەنوۆ.

«اقتاۋ تەڭىز پورتى» اەا تاعى ءبىر جاسالعان ماڭىزدى قادام – باسىم قىزمەت تۇرلەرىنىڭ ءتىزىمى كەڭەيتىلىپ، بۇرىنعى 24 باعىتتىڭ ورنىنا 45 جاڭاباعىت بەكىتىلدى. ولاردىڭ قاتارىندا: قۇرىلىس، اباتتاندىرۋ، تۋريزم، ساناتورلى-كۋرورتتىق قىزمەتتەرى، توقىما بۇيىمدارى ءوندىرىسى، سۋ وڭدەۋ، كەمە جانە اۋە كەمەلەرىن جوندەۋ، كولىك جانە باسقا ءداوندىرىس تۇرلەرى بار. 

«اقتاۋ تەڭىز پورتى» ارنايى ەكونوميكالىق ايماعى 2002 جىلى پرەزيدەنت جارلىعىمەن قۇرىلعان بولاتىن. سول ۋاقىتتان بەرى ول ماڭعىستاۋ وبلىسىنىڭ وسىپ-وركەندەۋىنىڭ ماڭىزدى ورتالىعىنا، ورتالىق ازيانى الەمدىك نارىقتارمەن بايلانىستىراتىن سەنىمدى كوپىرىنە اينالدى. 

2024 جىلى وبلىس اكىمدىگىنىڭ باستاماسىمەن جانە ۇكىمەتتىڭ قولداۋىمەن ەكونوميكالىق ايماقتىڭ قىزمەت ەتۋ مەرزىمى 2052 جىلدىڭ 31 جەلتوقسانىنا دەيىن ۇزارتىلدى. بۇل الداعى ونداعان جىلدارعا ۇلكەن جوسپارلاردى جۇزەگە اسىرۋعا زور مۇمكىندىك بەرەدى.

ارنايى ەكونوميكالىق ايماقتىڭ ارتىقشىلىعى ونىڭ كاسىپكەرلەرگە كوپ جەڭىلدىك جاساۋىندا. ايماقتا ءوز جوباسىن جۇزەگە اسىرعان ينۆەستور كورپوراتيۆتىك تابىس، مۇلىك جانە جەر سالىعى مەن يمپورت ققس-تان، كەدەندىك باجداردان بوساتىلادى. جوبالارعا تولىق اكىمشىلىك جانە تەحنيكالىق قولداۋ كورسەتىلەدى. 

بۇگىندە ەكونوميكالىق ايماقتا وتاندىق كاسىپكەرلەردەن وزگە يتاليا، تۇركيا، گەرمانيا، ازەربايجان، جۇڭگو جانە سينگاپۋر كومپانيالارى ءوندىرىس اشىپ، جوبالارىن ءساتتى جۇزەگە اسىرۋدا.