مەملەكەت – بەلگىلى ءبىر اۋماققا يەلىك ەتىپ، سول جەردەگى حالىقتىڭ ەركىن دامۋىنا مۇمكىندىك بەرەتىن، قوعام تابيعاتىنان تۋىندايتىن ورتاق ىستەردى اتقارۋعا قاجەتتى باسقارۋدىڭ جوعارعى دارەجەدە ۇيىمداسقان جۇيەسى، ساياسي بيلىك ۇيىمى. ەگەمەندىككە يە جانە قوعامدى باسقارۋدى ارنايى مەحانيزمدەر (اپپارات) ارقىلى جۇزەگە اسىراتىن قوعامداعى ساياسي بيلىكتى ۇيىمداستىرۋدىڭ ەركەشە ءتۇرى، ساياسي جۇيەنىڭ ورتالىق ينستيتۋتى دەپ جاتامىز. قاشان بولماسىن مەملەكەتتىڭ ءوز ازاماتتارىنىڭ ءومىرى مەن قۇقىقتارىنىڭ قورعالۋى الدىنداعى جاۋاپكەرشىلىگىن جوققا شىعارا المايمىز. ياعني، مەملەكەت ءوز ازاماتتارىنىڭ الەۋمەتتىك تۇرعىدا تولىسۋىنا، قوعامعا پايدالى ءبىلىم الىپ، ءبىلىمى مەن تاجىريبەسىن قوعام يگىلىگىنە جۇمساۋعا قاجەت جاعدايلار تۋعىزۋعا مىندەتتى بولسا، ازاماتتار ءوز كەزەگىندە سوعان لايىقتى جاۋاپ قاتادى. كۇش-جىگەرىن ورتاق ىسكە – وتانىن گۇلدەندىرۋگە جۇمسايدى.
ءبىر قاراعاندا جالىندى پافوسقا ۇقساعانىمەن، بۇل – ءومىر زاڭى. وسى تۇراقتى ءۇردىستىڭ كىدىرمەي قوزعالىستا بولۋىن، تاراپتاردىڭ ءبىر-بىرى الدىنداعى مىندەتتەمەلەرىن بۇلجىتپاي ورىنداۋىن قامتاماسىز ەتەتىن ءبىر كۇش بار. ول كۇش – ادىلدىك كۇشى. ادىلدىك بولماعان جاعدايدا ءوزارا سەنىم دە بولمايدى. سەنىم جوعالعان جەردە سۇيىسپەنشىلىك پەن ادالدىققا ورىن جوق ەكەنى تاعى بەلگىلى.
كۇندەلىكتى قات-قابات تىرشىلىك بارىسىندا، سان تاراپتان اعىلعان اقپارات لەگىنىڭ ىشىندە ءجۇرىپ ادام مەن قوعام، مەملەكەتتىڭ دامۋىنداعى ادام فاكتورى، ادامداردىڭ تۇلعالىق دامۋىنداعى مەملەكەتتىڭ ءرولى دەگەن ماسەلەلەر تۋرالى ويلانىپ ءجۇرمىز بە؟ ءبىز ءوزىمىزدى قوعامنىڭ تولىققاندى مۇشەسى رەتىندە سەزىنە الامىز با؟ قوعام ءبىزدى قانشالىقتى قاجەتسىنىپ وتىر؟ مەملەكەت پەن ادامنىڭ بايلانىسىن قامتاماسىز ەتۋشى التىن كوپىر – الەۋەمەتتىك ادىلدىك دەگەن بار ما ءوزى؟ «بار» دەۋگە اۋىز بارمايتىن سياقتى. ءيا، ەشكىم قولىنا شوقپار الىپ، مەملەكەتكە قارسى شاۋىپ جاتقان جوق. اركىم، حال-قادىرىنشە ەڭبەك ەتىپ، ارەكەت جاساۋدا. «ايتە قويمادىڭ، بۇيتە قويمادىڭ. انا جەردە انانى بەرمەدىڭ، مىنا جەردە مىنادان قۇر قالدىم» دەيتىن ماسىلدىق ساناداعى جاندار دا سيرەگەن ءقازىر. ءبىراق، سوندا دا ادام مەن مەملەكەت اراسىندا سەنىمنەن گورى، ساناسۋشىلىق باسىم سياقتى كورىنەدى. قوعامدىق ۇدەرىستەردى رەتتەيتىن زاڭدار دا سول سەنىمسىزدىك قاعيدالارىنا نەگىزدەلگەندەي.
سەنىم – ەرتەڭگى كۇنگە دەگەن تالپىنىستى قوزعاۋشى كۇش دەيمىز. ءبىز ەرتەڭىمىز تۋرالى نە ويلايمىز. ارماندارىمىز قانداي؟ بىزدە ارمان دەگەن بار ما جالپى؟ جوق سياقتى ما؟ ءيا. ارمانداۋدى قويعانبىز. ارمانداۋ ءۇشىن ۇمىتتەندىرۋشى ءبىر كۇشتەر بولۋ كەرەك سياقتى. ال، ءبىز بولاشاعىمىزدى كوز الدىمىزعا ەلەستەتە المايمىز. ەلەستەتكەن كۇندە دە بۇلىڭعىر ەلەستەن ارى ەشتەڭە كورە المايمىز. ەرتەڭگە سەنبەيمىز. تەك بۇگىنگىنىڭ كۇيبەڭىنە باس قاتىرۋدان ءارى اسپايمىز. تەك بۇگىنمەن ءومىر ءسۇرۋ اڭگىمە باسىندا ايتىلعان ادامعا دا، سول ادامدار الدىندا بەلگىلى ءبىر جاۋاپكەرشىلىك ارقالايتىن مەملەكەتكە دە ءتان قاسيەت. بالكىم، قاسىرەت...
