سىرداريا وزەنىنە جاقىن ورنالاسقان وڭتۇستىك قازاقستان وبلىسىنىڭ ارىس اۋدانى قوجاتوعاي اۋىلىنىڭ جايىلىمدىق جەرلەرىن سۋ باستى. بۇل تۋرالى ازاتتىق تىلشىسىنە وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتىنەن مالىمدەدى.

دەپارتامەنتتىڭ حابارلاۋىنشا، كوكساراي سۋ رەتتەگىش ءشليۋزى ماڭىن سەڭ باسقان. شاردارا سۋ قويماسىنان ءقازىر سىرداريا وزەنىنە سەكۋندىنا 900 تەكشە مەتر سۋ اعىپ كەلىپ جاتىر. وسىنىڭ سالدارىنان ارىس اۋدانى قوجاتوعاي پوسەلكەسىنىڭ جايلىمدىق جەرلەرىن سۋ العان. وسى ماڭداعى بوگەتتە دە سۋ دەڭگەيى كوتەرىلىپ، سەڭ پايدا بولعان. بوگەتتى نىعايتۋ ءۇشىن 3 جۇزدەن اسا ادام تارتىلىپ، 23 تەحنيكا جۇمىلدىرىلدى. 12 مىڭ قۇم سالىنعان قاپتار تاسىلىپ، دامبى جاسالدى. توتەنشە وقيعاعا بايلانىستى ارنايى كوميسسيا قۇرىلىپ، سىردارياداعى سۋ دەڭگەيى باقىلاۋعا الىنعان. ءبىراق ءالى دە بولسا كوكساراي سۋ رەتتەگىشىنىڭ باستى تورابىنان قوجاتوعاي اۋىلىنا دەيىن جانە اۋىلدان قىزىلوردا وبلىسىنىڭ شەكاراسىنا دەيىن وزەننىڭ بەتىندە مۇز قاتىپ تۇر. «الايدا ودان ەلدى مەكەندەرگە تونەتىن ءقاۋىپ جوق، بوگەتتى بەكىتۋ جۇمىستارى ءالى جالعاسىپ جاتىر، ماماندار مۇزدى قاي تۇستان جارۋ كەرەكتىگىن انىقتاۋعا كىرىستى" دەيدى توتەنشە جاعدايلار دەپارتامەنتىنىڭ وكىلى.

"ازاتتىق راديوسى"