جول تورىپ، وتكەن-كەتكەن جۇرگىزۋشىلەردى بوپسالاعان ەكى پوليسەي بەيسەنبى كۇنى جەمقورلىققا قارسى قىزمەتتىڭ قۇرىعىنا ءىلىندى. تەكسەرۋ بارىسىندا ولاردىڭ ءبىر كۇندىك زاڭسىز تابىسى 500 مىڭ تەڭگە ەكەنى انىقتالدى. بۇل تۋرالى «قامشى» پورتالى مەملەكەتتىك قىزمەت ىستەرى جانە جەمقورلىققا قارسى ءىس-قيمىل اگەنتتىگىنىڭ جامبىل وبلىستىق دەپارتامەنتىنە سىلتەمە جاساي وتىرىپ حابارلايدى.
29 تامىز كۇنى مەملەكەتتىك قىزمەت ىستەرى جانە جەمقورلىققا قارسى ءىس-قيمىل قىزمەتىنىڭ جامبىلدىق دەپارتامەنتىنە ءبىر ازامات اكىمشىلىك جاۋاپكەرشىلىككە تارتپاۋ ءۇشىن پوليسەيلەر وزىنەن 40 مىڭ تەڭگە اقشا بوپسالاپ جاتقانىن ايتىپ شاعىمدانعان. ەكى قولىن ىسقىلاپ دايىن وتىرعان جەمقورلىقپەن كۇرەسكەرلەر بۇل ىسكە دەرەۋ ارالاسىپ، كۇدىكتى پوليسەيلەردى ۇستاۋدىڭ قامىنا كىرىسەدى. سول كۇنى، جول-پاترۋلدىك پوليسيانىڭ اعا سەرجانت جانە سەرجانت شەنىندەگى 2 قىزمەتكەرى حيۋنداي ماركالى اۆتوكولىك بازاسىندا جاسالعان «اۆتوۋراگان» ارنايى كولىگىنىڭ سالونىندا 30 مىڭ تەڭگە كولەمىندە پارا الىپ جاتقان جەرىندە قولعا ءتۇستى.
الايدا، قوس پوليسەي دە قۋلىق-سۇمدىقتان قۇر الاقان ەمەس ەكەن. وڭايلىقپەن بەرىسپەگەن. ۇستاۋ كەزىندە بەلسەندى تۇردە قارسىلىق كورسەتىپ، ارنايى ماشينامەن وقيعا ورنىنان تايىپ تۇرعان. ءسويتىپ، تاراز كوشەسىندە ادەتتە قىلمىسكەرلەردىڭ ىزىنە ءتۇسۋى ءتيىس پوليسيا كولىگى ءوزى قاشىپ بارا جاتقان كورىنىس بىلايعى جۇرتتىڭ تاڭدايىن قاققىزدى. كولىكتى تىزگىندەگەن پوليسەي قاتتى ساسقالاقتاسا كەرەك، ءبىرازدان سوڭ رولگە يە بولا الماي جول جيەگىندەگى ارىققا ءتۇسىپ كەتكەن. توقتاپ قالعان ارنايى كولىكتەن پوليسەيدىڭ بىرەۋى سەكىرىپ ءتۇسىپ، جول بويىندا جايباراقات تۇرعان «مەرسەدەس» ماركالى كولىكتىڭ جۇرگىزۋشىسىنە تاپانشا كەزەگەن. ءسويتىپ، «پوليسيا قۋۋ» وپەراسياسى جەكە مەنشىك كولىكتىڭ قاتىسۋىمەن جالعاسىن تاپقان. الايدا، كوپ ۇزاماي قوس پوليسەي دە قولعا ءتۇستى. سويتسە، ەكىنشى پوليسەي بەكەرگە الا شاپقىن بولماپتى. قالتاسىنان ءتىنتۋ كەزىندە سوڭعى العان 30 مىڭنان باسقا 200 مىڭ تەڭگەدەن استام اقشا، قىرعىز سومى، ورىس ءرۋبلى، ءتىپتى ەۋرونىڭ بىرنەشە كۋپيۋراسى، بىرنەشە ادامنىڭ، ونىڭ ىشىندە قىرعىز رەسپۋبليكاسى ازاماتتارىنىڭ قۇجاتتارى تاركىلەنگەن. ۇستالعان پوليسەي بۇل اقشالاردىڭ بارلىعى ءوزىمنىڭ جەكە قاراجاتىم دەپ اقتالعان. ءقازىر ولار تەرگەۋ اباقتىسىنا جابىلىپ، ۇستىلەرىنەن قىلمىستىق ءىس قوزعالعان.
