ءوز ءسوزىم وزىمدىكى نەمەسە حالىق تولقىسا، نە ىستەيمىز؟ حالىق تولقىسا، نە بولادى؟ بۇل سۇراققا جاۋاپ بەرە الاسىز با؟ بىرىنشەدەن، شەك كەلتىرمەيمىن، بۇكىل قازاق ءبىر جاعادان جەڭ شىعارىپ، كۇش بىرىكتىرسە، بيلىكتى توڭكەرىلىپ تاستاۋى ابدەن مۇمكىن. ءبىراق، سول توڭكەرىلگەن تاعىڭىزعا كىم كەلەدى؟ بىلمەيسىز. رۋحتى ازامات كەلسە، قازاققا - ب ا ق، ال رۋحسىز بولسا - سور. "ساقال سۇراپ ءجۇرىپ، مۇيىزدەن ايرىلاسىز". ەكىنشىدەن، ءمۇيىز دەگەننەن شىعادى. سول سوقتالداي ءمۇيىز بىزدە جوق-اۋ! ءبىز توقال ەشكى سەكىلدىمىز. ال، بيلىك - ءمۇيىزدى بۇقا. ونى كەشەگى وقيعادان كورىپ ءبىلدىڭىز. قازاق كوشەگە شىعىپ قىرىلىپ كەتسە، ونىڭ وبالى تەك بيلىكتە عانا ما؟ جوق، سول قىرعىنعا جول بەرىپ وتىرعان ءسىز بەن ءبىز دە كىنالى بولماقپىز. ماسەلەن، جاڭاوزەندە قىرىلعان قازاقتىڭ جوقتاۋشىسى بولا الىپ ءجۇرمىز بە، بۇگىن. سول دۇربەلەڭدە وتاعاسى وپات بولىپ، قان جىلاپ قالعان وتباسىلاردىڭ جايىن ويلادىق پا؟ جانارى جاسقا تولعان سانسىز سابيلەرگە مەدەۋ بولا بىلدىك پە؟ جوق. سول كەزدە ساياسي ساحنادا "گەروي" بولعانداردىڭ دەنى ءوزى ساياسي ۇپاي جيناپ العان سوڭ، تابانىن جالتىراتتى. ەندى حالىق تولقىسا، سول سەناريي قايتالانباسىنا كىم كەپىل؟ ۇشىنشىدەن، ءبىزدىڭ بيلىك قايتكەن كۇندە دە بەيبىت شەرۋدى كۇشپەن باسىپ تاستايتىنىن دالەلدەپ بولدى. سونى بىلە تۇرا وتقا قاراي جۇگىرۋ ءبىزدى ۇشپاققا شىعارا ما؟ مەن، سەن، ول جانە ولار - حالىق وكىلدەرى. ءبىزدىڭ ءسوزىمىزدى "كوتەرىلىسقۇمار" راديكالدار دا، بيلىك تە تىڭداعان ەمەس، تىڭدامايدى دا... ولار قازاقتىڭ باسىن ساۋداعا سالىپ، قۇربان ەتۋدىڭ ويىنىن ويناي بەرمەك. 1986 جىلى دا سويتكەن. سوندىقتان دا، كوشەگە شىعا قالساق، ياكي شىققاندارعا سابىر، سالقىنقاندىلىق ءھام مادەنيەت قاجەت. قورشاۋعا العان جاساعىڭنىڭ ءوزى - ءوز قانداسىڭ، ءوز باۋىرىڭ... مەن وڭ سولىن تانىماعان جاستاردىڭ جاستىق جالىنىمەن وتقا ورانعانىن قالامايمىن. ولار ءوزى اڭساعان كۇنگە بەيبىت تۇردە ەڭبەك ەتىپ، جەتسە ەكەن دەيمىن! تورتىنشىدەن، ءبىز ماقساتىمىزعا كوتەرىلىس ارقىلى عانا جەتەمىز دەۋ بەكەر. ءبىراق، حالىق سولاي ويلاسا، ءبىز بەن ءسىزدىڭ، بيلىك پەن وپپوزيسيانىڭ وعان شەكتەۋ قويا الماسى انىق. ونداي جاعدايدا نە ىستەمەك كەرەك؟ حالىقتىڭ جاعىنا شىققان ءجون. ويتكەنى، بيلىك - ءجۇزجىلدىق، ال قازاق - ماڭگىلىك.