اقپاننىڭ 16-سى كۇنى الماتىداعى تاۋەلسىزدىك ەسكەرتكىشى تۇرعان ورتالىق الاڭعا ۇلتتىق ۆاليۋتا - تەڭگەنىڭ ديەۆالۆاسياسىنا نارازىلىق بىلدىرۋگە كەلگەن ادامداردىڭ كەيبىرەۋىن پوليسيا ۇستاپ الىپ كەتتى. ازاتتىق تىلشىلەرىنىڭ حابارلاۋىنشا، پوليسەيلەر سوڭعى ءبىر ساعاتتىڭ ىشىندە تاعى دا جەتى ادامدى ۇستاپ، بوستاندىق اۋداندىق ىشكى ىستەر باسقارماسىنا الىپ كەتكەن. سونىمەن بىرگە پوليسيا قىزمەتكەرلەرى الاڭداعى وقيعاعا كۋا بولعان جاس ازاماتتاردىڭ كەيبىرىنىڭ ءموبيلدى تەلەفوندارىن اشىپ قاراپ، وعان نە تۇسىرگەندەرىن تەكسەرگەن. ساعات ون ەكىلەر شاماسىندا تاۋەلسىزدىك ەسكەرتكىشىنە وتۋگە ارەكەت جاساعان بەلسەندىلەر جاننا بايتەلوۆا مەن ەۆگەنيا پلاحينانى پوليسيا قىزمەتكەرلەرى ۇستاپ، الىپ كەتكەن. سونىمەن بىرگە باسىنا ايەلدىڭ شىلتەر ىشكيىمىن كيىپ العان بەلسەندى ۆالەريا يبرايەۆانى دا پوليسيا ۇستاعان (بۇعان دەيىن كەدەندىك وداق اۋماعىندا «رەگلامەنتكە ساي ەمەس» دەپ تانىلعان الگىندەي ىشكيىمدى شىعارۋعا، ەنگىزۋگە جانە ساتۋعا تىيىم سالىنعانى تۋرالى حابار تاراعان ەدى). پوليسيا قىزمەتكەرلەرى الاڭدا بولىپ جاتقان وقيعانى تۇسىرمەك بولعان جۋرناليستەردى ول جەردەن ىعىستىرىپ تاستاعان.
تاڭەرتەڭنەن قىزىل جولاقتى لەنتامەن قورشالىپ، «جوندەۋ جۇمىستارى جۇرگىزىلىپ جاتىر» دەگەن جازۋ ىلىنگەن تاۋەلسىزدىك ەسكەرتكىشى ورنالاسقان الاڭدا ءقازىر تەك ونداعان پوليسيا قىزمەتكەرلەرى مەن پروكۋراتۋرا وكىلدەرى ءجۇر، ءبىر شەتتە ەكى اۆتوبۋس مەن بىرنەشە پوليسيا كولىگى تۇر دەپ حابارلادى ازاتتىق ءتىلشىسى. بۇعان دەيىن بيلىك وكىلدەرى تاۋەلسىزدىك ەسكەرتكىشى الدىنان ءۇش ايەلدى - جاننا بايتەلوۆا، ەۆگەنيا پلاحينا مەن ۆالەريا يبرايەۆانى ۇستاپ اكەتكەن ەدى. قازاقستاننىڭ ۇلتتىق ۆاليۋتاسى - تەڭگەنىڭ ديەۆالۆاسياسىنا نارازى ازاماتتار اقپاننىڭ 16-سى كۇنى الماتىداعى تاۋەلسىزدىك ەسكەرتكىشى تۇرعان ورتالىق الاڭعا جينالاتىنى تۋرالى بۇعان دەيىن الەۋمەتتىك جەلىلەر ارقىلى اقپارات تاراعان بولاتىن. ازاتتىق راديوسى
(تاقىرىپ وزگەرتىلىپ بەرىلدى)
پىكىر قالدىرۋ