ديەۆالۆاسيا مىناداي جاعدايدى ايقىنداپ بەردى: قازاقستان قازىنا بايلىعى مول مەملەكەت ەدى. ءبىراق ونىڭ بيلىگى بۇل بايلىقتىڭ نەگىزگى مىندەتى حالىقتىڭ ماقساتىنا قىزمەت ەتۋى ءتيىس ەكەنىن دەر كەزىندە ۇعا المادى. بيلىك جۇيەسى ۇلتتىق ماقساتتى وزدەرىنىڭ جەكە ماقساتتارىمەن شاتاستىرىپ الدى دا، تۇ كورپوراسيالاردىڭ قۇيتىرقى ساياساتىنىڭ جەتەگىمەن كوررۋپسياعا ۇرىنىپ، اقىر سوڭىندا مول بايلىقتىڭ "ۇلتقا قىزمەت ەتۋشى" تەتىكتەرىنەن دە جانە سول "بايلىقتىڭ" وزىنەن دە اجىراپ قالدى. ازعانا ادامدار اسا ءىرى - "حالىقارالىق دارەجەدەگى" بايلارعا اينالسا دا، ەل بايلىعى قولدان كەتتى. ونىڭ ميللياردتاعان پايدا اكەلەتىن ۇلەسى حالىقارالىق الاياقتاردىڭ قولىندا كەتتى. ونىڭ ورنىن ەش نارسەمەن تولتىرۋ مۇمكىن ەمەس. تىپتەن، ورتا-شاعىن بيزنەستىڭ دامۋى دا مەملەكەتكە ونداي كولەمدەگى كىرىس كىرگىزە المايدى. سوندىقتان قازىرگى "جانتالاس" سودان تۋىنداعان. ونى بيلىكتىڭ ءوزى دە ءتۇسىنىپ وتىر، شىنتاعىن تىستەپ وتىر. الايدا ولار ماشكەيەۆيچ جانە ونىڭ كومپانياسى، ميتتال جانە ونىڭ كومپانياسى، جۇڭگو (تۇرىك، ەۋروپا، اقش، رەسەي ت.ب.) كومپانيالارى جانە ت.ب. سياقتىلاردىڭ كۇرەپ جاتقان اقشاسىنا قىزىعىپ-قىزعانىپ قاراۋدان باسقاعا بارا المايدى. ال قازىرگى جاعدايدا ءبىزدىڭ بيلىك مەملەكەت اقشاسىن مەيلىنشە ۇنەمدەۋگە، باسى ارتىق داڭعازا شارالاردى وتكىزىپ بوسقا شىعىندالۋدان باس تارتپاسا، ءوز قىزمەتىن تيىمدىلىك جاعىنا قاراي رەتتەمەسە، حالىقتىڭ ادامي دەڭگەيىن جانە الەۋمەتتىك جاعدايىن شۇعىل جاقسارتۋعا قاراي بەت بۇرماسا، "مەملەكەت دەگەنىمىز ونىڭ حالقى - سونىڭ كوركەيۋىنە ءبارىمىز جاپپاي (ءبىرىنشى كەزەكتە - مەملەكەتتىك قىزمەتكەرلەر مەن كۇشتىك قۇرىلىمدار) قىزمەت ەتۋگە ءتيىسپىز" دەگەن ءپرينسيپتى قالىپتاستىرماسا، قازاقستاندا قازاق ۇلتتىلىعىن تەز دامىتپاسا، وندا كۇنى ەرتەڭ حالىق تا، بايىپ ۇلگەرگەن شەنەۋنىكتەر دە كەدەيلەرگە اينالادى - كەدەي حالىق قاشاندا بايلاردى "جۇتىپ" قوياتىنى انىق. مەيلى، قانشاما باي بولسا دا! بولماسا، بايلار ونداي - "جۇتىپ قويۋعا ءازىر كەدەي حالىقتان" قاشىپ، شەت ەل اسىپ، وندا بارىپ وزگەلەرگە ءباسىبۇتىن جۇتىلادى، ياعني، قازاقتىعىنان تۇتاس اجىرايدى... ەندەشە، بۇل ديەۆالۆاسيا قولىندا ەندىگى جوعالتاتىن تۇگى جوق حالىقتىڭ عانا ەمەس، الدىمەن مەملەكەتتى باسقارىپ وتىرعانداردىڭ (بايلاردىڭ) وزدەرىنە قاتتى ەسكەرتۋ بولۋى ءتيىس دەپ ەسەپتەيمىن! اقىل مەن بايلىق ەگىز ۇعىم ەكەنى وسىنداي كەزدە كورىنۋى ءتيىس. سوندىقتان بيلىك ميتينگىلەگەن حالىقتى جاۋ ساناماي، كەرىسىنشە، ولارمەن بىرگە سول ميتينگىلەردە جاعدايدى بىرلەسە تالقىلاۋلارى قاجەت. انشەيىندە ونداي شارانى ۇيىمداستىرۋعا كوپ رەسۋرc جۇمسالادى. ال، مىنا جەردە حالىقتىڭ ءوزى كەلىپ وتىر، سونى نەگە ءتيىمدى باعىتقا بۇرماسقا! ولاي بولماسا، "كوز تۇماندانعان" دەگەن اۋرۋدىڭ ەمى جوق دەر ەدىم! ال حالىق "بيلىك، سەن مەنىڭ كوزىمە تۋرا قارا!" دەپ ايتاتىن بولادى. وعان ونىڭ تولىق مورالدىك جانە ادىلەتتىلىك تۇرعىسىنان قۇقى بار: ول - جيىرما جىلدان استام ۋاقىت بويى بيلىگىنە سەنىپ كەلگەن!

ءابدىراشيت باكىر ۇلى 

فيلوسوف