ازاتتىق ءتىلشىسىنىڭ حابارلاۋىنشا، 15 اقپان كۇنى ساعات كۇندىزگى 12:00 شاماسىندا دوستىق جانە اباي كوشەلەرىنىڭ قيىلىسىنداعى اباي ەسكەرتكىشى ماڭىنا ونداعان نارازى ازامات جينالعان.

ولار اباي ەسكەرتكىشى تەمىر تۋرنيكەتتەرمەن قورشالعاندىقتان، نارازىلىق جيىنىن قورشاۋ سىرتىندا، دوستىق كوشەسىنىڭ تروتۋارىندا وتكىزىپ جاتىر. ءوزىن روزاگۇل تەلەبايەۆا دەپ تانىستىرعان جالعىزىلىكتى انا جينالعانداردىڭ ەشقانداي ساياسي ۇيىمعا جاتپايتىنىن، جەكە ازاماتتار ەكەنىن ايتىپ، تالاپتارى "پروبلەمالىق نەسيەلەرىن جويۋ" ەكەنىن مالىمدەگەن. تۇسكى ساعات 13:00 شاماسىندا نارازىلارعا ازاماتتىق بەلسەندىلەر قاناعات تاكەيەۆا، جاسارال ءقۋانىشالين، ديلنار ينسەنوۆا كەلىپ، وزدەرىنىڭ الماتى قالاسىنىڭ اكىمى احمەتجان ەسىموۆپەن جولىققاندارىن ايتقان. جاسارال ءقۋانىشاليننىڭ ايتۋىنشا، ەسىموۆكە ولار "پروبلەمالىق نەسيەلەردى جويۋ، ديەۆالۆاسيادان كەيىنگى قىمباتشىلىقتى بولدىرماۋ جانە مۇقتاج ازاماتتارعا الماتىدان 10 سوتىقتان جەر بەرۋ" تۋرالى ءۇش تالاپ قويعان. الماتى قالاسىنىڭ اكىمى پروبلەمالىق نەسيەلەرگە قاتىستى ۇكىمەت شەشىمىن كۇتىپ وتىرعانىن، اكىمدىكتىڭ قىمباتشىلىقتى بولدىرماۋعا تىرىساتىنىن، الماتىدا بوس جەر جوق ەكەنىن ايتقان. بەلسەندىلەر "ەسىموۆكە كەلەسى اپتانىڭ سارسەنبىسىندە قايتا كەزدەسۋگە ۇسىنىس جاساعاندارىن، اكىم وعان "ويلانايىن" دەپ جاۋاپ بەرگەنىن" ايتتى. نارازىلار بۇدان سوڭ قورشاۋدان اباي ەسكەرتكىشىنە قاراي وتپەك بولعان. الايدا ولاردى پوليسيا جىبەرمەگەن. ون شاقتى ادام "شال، كەت!" دەپ ايعايلاعان. ازاتتىق ءتىلشىسىنىڭ ايتۋىنشا، "كوشەدە شىلىم شەككەنى ءۇشىن" پوليسيا ءبىر ادامدى ۇستاعان. 11 اقپان كۇنى قازاقستان ۇلتتىق بانكى تەڭگەنىڭ اقش دوللارىنا شاققانداعى بۇرىنعى باعامىن ۇستاپ تۇرۋدان باس تارتىپ، دوللار باعامىن 185 تەڭگە دەپ بەلگىلەگەن ەدى. ەرتەڭىندە ديەۆالۆاسياعا نارازىلار كەشە دە الماتىدا قالالىق اكىمدىككە، ۇلتتىق بانككە بارىپ، قارسىلىقتارىن بىلدىرگەن. 13 اقپان كۇنى نارازىلار قالاداعى بازارلاردا تاۋار باعالارىنىڭ قىمباتتاپ كەتكەنىن ايتىپ، ەسىموۆتەن باعانىڭ قىمباتتاۋىنا باقىلاۋ جاساۋدى تالاپ ەتكەن ەدى. ازاتتىق.org "قامشى" سىلتەيدى