«قاراشا، جەلتوقسان مەن سول ءبىر ەكى اي،
قىستىڭ باسى، ءبىرى ەرتە، بىرەۋى جاي»، - دەپ اباي اتام ايتقان قىستىڭ باسى بۇل كۇندە جاڭا جىلدىڭ باسى بولىپ كەتكەن. ءبىزدىڭ بيلىك جاڭا جىلعا دايىندىقتى جەلتوقساندا باستاساق جاي بولادى دەپ، قاراشا ايىنان باستاپ كەتەدى. مىنە، جاڭا جىلدىڭ دايىندىعى باستالار قاراشا ايى دا كەلدى. اكىمدىكتەر قۇداسى كەلە جاتقانداي دايىندىعىن كورىپ جاتقان بولۋى دا مۇمكىن.
وكىنىكشكە وراي، ءبىزدىڭ قاسيەتىمىز دە قاسىرەتىمىز دە بولعان جەلتوقسان ايى شىرشالاردىڭ جارىسمەن ءوتىپ كەتەدى. باعاسى مەن بيىكتىگى ءبىر-بىرىن ارتقا قالدىرعىسى كەلەتىن ءار قالانىڭ شىرشاسى ءوز الدىنا جىر. جەلتوقسان ايى كەشەگى الاش وردانىڭ قۇرىلعان، بۇگىنگى تاۋەلسىزدىكتىڭ جاريالانعان، 86 جىلعى بوزداقتاردىڭ قانى اعىلعان اي ەدى عوي. ال، ءقازىر ونى ەسكە الۋدىڭ ورنىنا شىرشا ورناتىپ، قۇلاتىپ، ورتەپ، قايتا ورىنا قويىپ اۋرەمىز. ءبىزدىڭ ەلدە بۇعان دەيىن ەڭ بيىك شىرشا 30 مەتىردەن اسىپ، ونى بەزەندىرۋگە جۇمسالعان قاراجات 38 ميلليون تەڭگەگە دەيىن بارعان ەدى. وسىنشا ەل قارجىسىنا قويعان شىرشالاردىڭ جەلگە قۇلاپ جىعىلىپ، ورتەنىپ كەتكەنىن ايتپاعاننىڭ وزىندە، ءبىر ايدان كەيىن قوقىسقا تاستالاتىنىن ەسكەرسەك، داعدارىس جان القىمنان العاندا جاڭا جىلدىق شىرشامەن جارىسۋ نە تەڭىمىز؟ ەكونوميكالىق شىعىندارىن ايتباعان كۇننىڭ وزىندە، ءبىزدىڭ ۇلتقا مۇلدە جات دۇنيەنى ەنگىزىپ، جاس ۇرپاققا اتادان كەلە جاتقان داستۇردەي كورسەتكەندە نە ۇتامىز؟
ەستەرىڭىزدە بولسا، وسىدان 3 جىل بۇرىن وڭتۇستىك قازاقستان وبلىسىندا سول كەزدەگى اكىمى اسقار مىرزامحمەتوۆ مىرزا تاۋەلسىزدىك كۇنىنە دەيىن جاڭا جىلعا دايىندىق كورۋگە ءتيىم سالىپ، بۇكىل قازاقتىڭ مەرەيىنە بولەنگەن ەدى. مىرزاحمەتوۆ مىرزانىڭ بۇل يگى باستاماسىن جالعاستىرعان جالعىز اكىم – قاراعاندى وبلىسىنىڭ بۇرىنعى اكىمى باۋىرجان ابدەشوۆ 2013 جىلى قاراعاندى وبلىسىندا تاۋەلسىزدىك كۇنىن اتاپ وتپەيىنشە جاڭا جىلعا دايىندىققا تيىم سالاتىنىن ايتقان ەدى. باۋىرجان اكىمنىڭ بۇيرعى تەك ءبىر جىلعا جارادى، ءبىر جىلدان كەيىن تاۋەلسىزدىكتى ۇلىقتاماق تۇرماق، ءوز باسى ءىستى بولىپ شىعا كەلدى. ال، ءقازىر وڭتۇستىكتە 3 جىلدان بەرى تاۋەلسىزدىك كۇنىنەن بۇرىن جاڭا جىلدىڭ دايىندىعىن جاساماعان اكىم «نۇر وتان» پارياسى ءتوراعاسىنىڭ ءبىرىنشى ورىنباسارى.
داعدارىس ەتەكتەن تارتىپ تۇرعاندىقتان، ەلباسىنىڭ ءوزى بۇكىل قازاقستاندىقتارعا ۇنەمشىل بولۋدى ايتقان ەدى. ۇلتتىق قۇندىلىقتاردى بارىنەن جوعارى قوياتىن «نۇر وتان» ءتوراعاسىنىڭ ءبىرىنشى ورىنباسارى ۇنەمشىلدىكتى وڭتۇستىكتەگى يگى ءىسىن ودان ارى كەمەلدەندىرۋ جولىنان باستاپ، اكىمدىكتەردەن باستاپ بۇكىل مەملەكەتتىك مەكەمەلەردى جاڭا جىلدىق شىرشادان باس تارتۋعا شاقىرۋى كەرەك. شىرشانىڭ بەزەندىرەتىن زاتتارىنىڭ ءبارى شەتەلدەن كەلەتىندىكتەن داعدارىس كەزىنە ونىڭدا باعاسى ءوسىپ، ءسىز بەن ءبىزدىڭ قالتامىزدى بەكەرگە قاعاتىنىن ەسكەرسەك، اتامىز كورمەگەن شىرشاعا قوش ايتىساتىن ۋاقىتىمىز كەلدى. باستىسى شىرشا ءۇشىن ەل بيۋجەتىنەن ءبىر تيىن شىعىندالماۋى كەرەك. ال، ءوز شىرشاسىز جاڭا جىلدى وتكىزە المايمىن دەيتىندەر بولسا، ءوز قالتاسىنان شىرشاسىن تۇرعىزا بەرسىن.
جوعارىدا ايتقانداي «نۇر وتان» ءتوراعاسىنىڭ ءبىرىنشى ورىنباسارى كەشە ءبىر وبلىسقا تاۋەلسىزدىك كۇنىن تويلامايىنشا، جاڭا جىلدىڭ دايىندىق جۇمىستارىن جاساتپاعان. ەندى، باس پاريانىڭ بۇكىل قازاقستانعا تاۋسىزدىك كۇنى مەن الاش وردا كۇنىن اتاپ وتپەيىنشە جاڭا جىلعا دايىندىق جاساتپاۋعا شاماسى جەتەدى دەگەن سەنىمدەمىز. بۇل عانا ەمەس، شىرشامەن قوش ايتتىرسا مىرزامحمەتوۆ مىرزانىڭ اتى ەل تاريحىندا التىن ارىپپەن جازىلارى انىق.
تۇردىبەك قۇرمەتحان
