كەشە ەلباسى نۇرسۇلتان نازاربايەۆتىڭ ۇلىبريتانياعا ساپارى بارىسىندا ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ ءىى وتىرىس ءوتتى، - دەپ حابارلايدى «قامشى» پورتالى.
ءىس-شاراعا سونداي-اق ۇلىبريتانيا پرەمەر-مينيسترى د.كەمەرون قاتىستى.
مەملەكەت باسشىسى سويلەگەن سوزىندە فورۋمعا قاتىسۋشىلارعا تاۋەلسىز قازاقستاننىڭ قالىپتاسۋ تاريحى مەن بۇگىندە مەملەكەت جۇرگىزىپ جاتقان ەكونوميكالىق ساياسات تۋرالى اڭگىمەلەپ بەردى.
ماسەلەن، نۇرسۇلتان نازاربايەۆ قازاقستان شەكاراسىنىڭ ۇزاقتىعى مەن جەرىنىڭ كەڭدىگى ەۋرازيا كەڭىستىگىندە ماڭىزدى ستراتەگيالىق جانە كولىك-لوگيستيكالىق قىزمەت اتقارۋعا مۇمكىندىك بەرەتىنىنە نازار اۋداردى.
مەملەكەت باسشىسى ەلدە 100-دەن اسا ەتنوس وكىلدەرى تۇرىپ جاتقانىن، وسى ۋاقىت ىشىندە ولاردىڭ تەڭ قۇقىقتارى مەن مۇمكىندىكتەرى ساقتالعانىن، سونىڭ ارقاسىندا تۇراقتىلىق قامتاماسىز ەتىلىپ وتىرعانىن دا اتاپ ءوتتى.
سونىمەن قاتار، قازاقستان پرەزيدەنتى تاۋەلسىزدىك جىلدارىنداعى ەكونوميكانىڭ دامۋ قارقىنى تۋرالى دا ايتتى.
«وسى كەزەڭدە حالىقتىڭ جان باسىنا شاققانداعى ىشكى جالپى ءونىمى 700 دوللاردان 13 مىڭ دوللارعا دەيىن ۇلعايدى. بۇل ءبىز ءۇشىن زور تابىس دەپ ەسەپتەيمىز»، – دەدى نۇرسۇلتان نازاربايەۆ.
قازاقستاننىڭ 90-جىلدارى ەكونوميكانى جەكەشەلەندىرۋدىڭ اسا اۋقىمدى شاراسىن جىلدام ءارى زور تابىسپەن وتكىزگەنى دە ايتىلدى.
مەملەكەت باسشىسى بۇگىندە ەكونوميكامىزدى دامىتۋدىڭ جاڭا كەزەڭى كەلگەنىن اتاپ ءوتتى.
«ءقازىر داعدارىس، ەنەرگيا تاسىمالداۋشى ونىمدەر باعاسى تومەندەدى. مەن مۇنداي جاعدايدى بولجادىم، ويتكەنى بۇل – كاپيتاليستىك ەكونوميكانىڭ سيكلدى دامۋىنداعى زاڭدىلىق. وسى جاعدايدا ءبىز ەلدى جاڭعىرتۋ ءۇشىن بەس ينستيتۋسيونالدىق رەفورما مەن «100 ناقتى قادام» جوسپارىن ازىرلەدىك»، – دەدى قازاقستان پرەزيدەنتى.
نۇرسۇلتان نازاربايەۆ بۇگىن قول قويىلعان ۇلىبريتانيانىڭ ەكسپو-2017 كورمەسىنە قاتىسۋى تۋرالى كەلىسىمدى جوعارى باعالايتىنىن اتاپ ءوتتى جانە «استانا» حالىقارالىق قارجى ورتالىعىن قۇرۋ جوسپارى تۋرالى ايتتى.
«بۇل جوباعا بريتاندىق كومپانيالاردىڭ قاتىسۋى اسا ماڭىزدى بولادى دەپ ويلايمىن»، – دەدى ەلباسى.
سونىمەن قاتار نۇرسۇلتان نازاربايەۆ قازاقستاننىڭ ينۆەستيسيالىق تارتىمدىلىعىن ارتتىرۋ، يندۋستريالاندىرۋ باعدارلاماسىن جۇزەگە اسىرۋ، «جاڭا جىبەك جولى» جوباسىنا قاتىسۋ ءۇشىن قولعا الىپ جاتقان شارالارعا ەگجەي-تەگجەيلى توقتالدى.
سوڭىندا مەملەكەت باسشىسى بريتاندىق كومپانيالاردى بىرلەسكەن جوبالارعا قاتىسۋعا شاقىردى.
«ءبىز لوندوننان ەشتەڭە سۇرامايمىز. سىزدەردى قازاقستانعا كەلۋگە جانە بىزبەن بىرگە تابىس تابۋعا شاقىرامىز»، – دەدى نۇرسۇلتان نازاربايەۆ.
ۇكىمەتارالىق كوميسسيا وتىرىسى بارىسىندا جالپى سوماسى 9 ميلليارد دوللاردى قۇرايتىن 26 كەلىسىمگە قول قويىلدى.
ءبىلال قۋانىش
لوندون
