ۇلىبريتانيا ساپارىندا پرەزيدەنت نۇرسۇلتان نازاربايەۆ بريتاندىق كومپانيا باسشىلارىمەن كەزدەستى. بۇل تۋرالى «قامشى» پورتالى حابارلايدى.

نۇرسۇلتان ابىشۇلىمەن العاشقىلاردىڭ قاتارىندا كەزدەسۋ مۇمكىندىگىنە Shell كومپانياسىنىڭ اتقارۋشى ديرەكتورى بەن ۆان بەردەن يە بولدى. كەزدەسۋ بارىسىندا ەنەرگەتيكا جانە مۇناي حيمياسى سالالارىنداعى ىنتىماقتاستىقتى بۇدان ءارى دامىتۋدىڭ پەرسپەكتيۆالارى تالقىلاندى.

مەملەكەت باسشىسى كومپانيا ءبىزدىڭ ەلىمىزگە كەلگەلى بەرى ءبىرقاتار ءىرى جوبالاردى جۇزەگە اسىرعانىن، سونىڭ ارقاسىندا قازاقستان ەكونوميكاسىنداعى جەتەكشى ينۆەستورلاردىڭ ءبىرى بولىپ وتىرعانىن اتاپ ءوتتى.

ب. ۆان بەردەن ءوز سوزىندە ءبىزدىڭ رەسپۋبليكامەن ىنتىماقتاستىق كونسەرن جۇمىسىنىڭ باسىمدىعى بار باعىتتارىنىڭ ءبىرى ەكەنىن ايتتى. ول سونداي-اق نۇرسۇلتان نازاربايەۆتى قازاق حاندىعىنىڭ 550 جىلدىعىمەن قۇتتىقتادى.

سونداي-اق، مەملەكەت باسشىسى «ارسەلور ميتتال» باسشىسى لاكشمي ميتتالمەن دە كەزدەسىپ، مەتاللۋرگيا سالاسىنداعى ارىپتەستىك، شيكىزات نارىعىنداعى وزگەرىستەر جايىن ءسوز ەتتى. ل. ميتتال پرەزيدەنت ن. نازاربايەۆقا شەتەلدىك ينۆەستورلاردىڭ جۇمىسىنا لايىقتى جاعداي تۋعىزىپ وتىرعانى ءۇشىن العىس ءبىلدىردى.

ەلباسىمەن سونىمەن قاتار، «J Rothschild Capital Management» كومپانياسىنىڭ باسشىسى لورد دجەيكوب روتشيلدپەن جۇزدەستى. ينۆەستيسيالىق ارىپتەستىك جايى ءسوز بولعان كەزدەسۋدە نۇرسۇلتان نازاربايەۆ استانادا حالىقارالىق قارجى ورتالىعىنىڭ قۇرىلاتىنىن ايتىپ، وسى باعىتتاعى ارىپتەستىك قارىم-قاتىناستارعا سەنىم ارتاتىنىن جەتكىزدى. د. روتشيلد قازاقستاننىڭ ورتالىق ازياداعى قارجىلىق حاب مارتەبەسىن يەلەنۋدەگى زور پەرسپەكتيۆالارىنا توقتالدى.

ەلباسىمەن كەزدەسكەندەردىڭ ءبىرى «ريو تينتو» كومپانياسىنىڭ باس ديرەكتورى سەم ۋولش. كەزدەسۋ بارىسىندا تاراپتار گەولوگيالىق بارلاۋ سالاسىنداعى جوبالاردى بىرلەسىپ جۇزەگە اسىرۋ ماسەلەلەرى ءسوز بولدى. پرەزيدەنت ن. نازاربايەۆ قازاقستاننىڭ تابيعي رەسۋرستارعا باي ەل ەكەنىن ايتىپ، كومپانيانىڭ ەلىمىزدەگى جۇمىسىنان كوپ جاڭالىقتار كۇتەتىنىن جەتكىزدى. ۋولش تا قازاقستاننىڭ «ريو تينتو» كومپانياسىنىڭ زور قىزىعۋشىلىعىن تۋعىزاتىنىن ايتتى.

«حيكما فارماسيۋتيكالس» كومپانياسى ديرەكتورلار كەڭەسىنىڭ ءتوراعاسى سايد دارۆازبەن كەزدەسۋ كەزىندە كومپانيانىڭ قىزمەتى قازاق مەملەكەتى ءۇشىن ۇلكەن ماڭىزعا يە ەكەندىگىن ءبىلدىردى. كەزدەسۋدە فارماسيەۆتيكا سالاسىنداعى ارىپتەستىكتى دامىتۋ جايى ءسوز بولدى. دارۆازدىڭ پىكىرىنشە، قازاقستان – دارى-دارمەك شىعارۋ سالاسىن دامىتۋدا ۇلكەن الەۋەتكە يە ەل.

پرەزيدەنت ن. نازاربايەۆتىڭ بريتاندىق ىسكەرلەرمەن بولعان كەزدەسۋىنە سونداي-اق، «Royal Dutch Shell»، «BG Group»، «Barclays Bank»، «Vitol Group»، «De La Rue»، «Glencore»، تاعى باسقا كومپانيا باسشىلارى قاتىستى.

ءبىلال قۋانىش

لوندون