قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ ۇلىبريتانيا پرەمەر-مينيسترىمەن وتكەن كەزدەسۋدەن سوڭ جۋرناليستەرگە ارناپ بريفينگ وتكىزدى، - دەپ حابارلايدى «قامشى» پورتالى.

بريفينگ بارىسىندا ەلباسى قازاقستان تاراپىنا ساپار اياسىندا ايرىقشا جوعارى قۇرمەت كورسەتىلىپ وتىرعانىن ايتتى. نۇرسۇلتان نازاربايەۆ سونداي-اق، بىرىككەن كورولدىك ەكىجاقتى قارىم-قاتىناستار دامۋىنىڭ وسى كەزەڭىندە قازاقستانعا 12 ميلليارد دوللار ينۆەستيسيا سالعانىن، ءقازىر ەلىمىزدە بريتان كاپيتالىنىڭ قاتىسى بار 500 كومپانيا جۇمىس ىستەيتىنىن اتاپ ءوتتى.

وسى جاڭا عانا قازاقستان-بريتانيا بيزنەس-فورۋمى اياقتالدى. كەشكە قاراي بريتانيا بيزنەسىنىڭ «كاپيتاندارىمەن» كەزدەسۋ وتەدى. بۇل ءبىزدىڭ ەل ءۇشىن اسا ماڭىزدى دەپ ويلايمىن. ىسكەر توپتارىمىز قۇنى 5 ميلليارد دوللار بولاتىن كەلىسىمشارتتار مەن مەموراندۋمدار جاساستى. بۇل جوبالاردىڭ بارلىعى قازاقستاننىڭ شيكىزاتتىق سەكتورىن دامىتۋعا عانا باعىتتالىپ وتىرعان جوق، – دەدى قازاقستان پرەزيدەنتى.

مەملەكەت باسشىسى كەلىسسوزدەر بارىسىندا كۇن تارتىبىندەگى حالىقارالىق ماسەلەلەر، سونىڭ ىشىندە ۋكراينا مەن تاياۋ شىعىستاعى احۋال قاراستىرىلعانىن دا اتاپ ءوتتى. 

سونىمەن قاتار، مەملەكەت باسشىسى ساپار بارىسىندا قول قويىلعان كەلىسىمدەر مازمۇنىنا توقتالىپ، بۇل قۇجاتتاردىڭ بولاشاقتاعى دامۋعا باعىتتالعانىن ايتتى. سونىڭ ىشىندە گاز، ەنەرگەتيكا، مۇناي حيمياسى جانە فارماسيەۆتيكا سالالارىنداعى بىرلەسكەن جوبالار اتاپ كورسەتىلدى. نۇرسۇلتان نازاربايەۆ بريتانيا تاراپىمەن استانا جانە لوندون اراسىندا قوسىمشا اۋە رەيسىن اشۋ تۋرالى كەلىسىم جاسالعانىنا دا نازار اۋدارتتى.

ءبىلال قۋانىش

لوندون