استانادا قازاقستان رەسپۋبليكاسىنىڭ قورعانىس ءمينيسترى يمانعالي تاسماعامبەتوۆ ءازىربايجان قورعانىس ۆەدومستۆوسىنىڭ باسشىسى گەنەرال-پولكوۆنيك زاكير گاسانوۆپەن كەزدەستى. بۇل تۋرالى «قامشى» پورتالى قر-ى قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
كەزدەسۋ بارىسىندا قوس مينيستر 2016 جىلعا ارنالعان ارىپتەستىك جوسپارىن بەكىتتى.
«قازىرگى تاڭدا ءازىربايجان مەن قازاقستاننىڭ تەڭىز فلوتتارى اراسىندا بايلانىس ورناتۋعا اسا زور ءمان بەرىلۋى كەرەك. بۇل باعىتتا كاسپييدەگى تاتۋ كورشىلىك پەن قاۋىپسىزدىك ماسەلەسىن نىعايتۋدا ەكى ەل باسشىلارى دەڭگەيىندە شەشىلگەن ماڭىزدى ماسەلەلەر بار»، - دەدى ءوز سوزىندە يمانعالي تاسماعامبەتوۆ.
ءازىربايجان رەسپۋبليكاسىنىڭ قورعانىس ءمينيسترى زاكير گاسانوۆ كاسپيي اكۆاتورياسىندا بىرىككەن وقۋ-جاتتىعۋلار وتكىزۋدىڭ ماڭىزدىلىعىنا توقتالدى. يمانعالي تاسماعامبەتوۆ ارىپتەسىن كەلەسى جىلى استانادا وتەتىن «كادەكس-2016» اسكەري قارۋ-جاراق پەن تەحنيكالاردىڭ حالىقارالىق كورمەسىنە قاتىسۋعا شاقىردى جانە ۇلتتىق قورعانىس ۋنيۆەرسيتەتىندە اسكەري كادرلار دايارلاۋدى ۇسىندى.
ۆەدومستۆونىڭ باسپا ءسوز قىزمەتى سونداي-اق، جاقىن ۋاقىتتا ەكى ەل اسكەريلەرى بىرىككەن جاتتىعۋلار وتكىزۋدى قولعا الاتىنىن حابارلادى.
