قاراعاندى وبلىسىندا الەۋمەتتىك ماڭىزى بار 33 ءونىمنىڭ 14ء-ىنىڭ باعاسى قىمباتتادى، دەپ حابارلايدى وبلىستىق ستاتيستيكا دەپارتامەنتىنىڭ باسشىسى جانات سادىقوۆا.
«الەۋمەتتىك ماڭىزى بار نەگىزگى ازىق-تۇلىك ونىمدەرىنىڭ باعاسىنا كۇندەلىكتى باقىلاۋ قورىتىندىسى بويىنشا، ءبىر اپتانىڭ ىشىندە 33 ءونىمنىڭ 14ء-ىنىڭ قىمباتتاعانى تىركەلدى»، - دەدى بۇگىن وبلىس اكىمدىگىندە وتكەن جيىن بارىسىندا ج.سادىقوۆا.
ونىڭ اتاپ وتۋىنشە، نەگىزىنەن وبلىس اۋماعىنا ەنگىزىلگەن تاۋارلاردىڭ باعاسى ارتۋدا. «كۇنباعىس مايى ورتا ەسەپپەن 10 تەڭگەگە، قارا شاي - 15-تەن 31-تەڭگەگە دەيىن، مايونەز ورتا ەسەپپەن 23 تەڭگەگە، مايەكتى ىرىمشىكتەر - 100 تەڭگەگە، قيار - 45-50 تەڭگەگە، قىزاناقتار ورتا ەسەپپەن 27 تەڭگەگە كوتەرىلگەن»،- دەپ ناقتىلادى ستاتيستيكا دەپارتامەنتىنىڭ باسشىسى.
ج.سادىقوۆانىڭ سوزىنە قاراعاندا، ازىق-تۇلىكتىڭ 15 ءتۇرىنىڭ: نان، ءسۇت، ەت، سارى ماي، تۇز بەن باسقا ونىمدەردىڭ باعالارى وزگەرمەگەن. ستاتيستيكا ۆەدومستۆوسىنىڭ مالىمەتتەرى بويىنشا، ءتۇرلى ساۋدا ورىندارىندا 1 سۇرىپتى ۇن، ماكارون ونىمدەرى مەن جارما باعاسى تومەندەگەن.
«سوڭعى ەكى تاۋلىكتە ءتۇرلى ساۋدا ورىندارىندا كوكونىس ونىمدەرىنىڭ باعاسى تومەندەگەنى بايقالادى: كارتوپ 13-تەن 18 تەڭگەگە دەيىن، ءسابىز 5-6 تەڭگەگە، قىزىلشا 12-25 تەڭگەگە، پيازدىڭ ءبىر كەلىسى ءۇشىن 7-دەن 237 تەڭگەگە دەيىن باعانىڭ تومەندەۋى بايقالادى»، - دەپ اتاپ ءوتتى ج.سادىقوۆا.
وبلىستىق اۋىل شارۋاشىلىعى باسقارماسىنىڭ باسشىسى باۋىرجان اسانوۆتىڭ حابارلاۋىنشا، بۇگىنگى تاڭدا ايماقتىق تۇراقتاندىرۋ قورىنان 150،6 توننا كوكونىس ونىمدەرى: 132،3 توننا كارتوپ، 8،6 توننا ءسابىز، 9،7 توننا قىرىققابات وتكىزىلگەن. ول سونداي-اق باعانى ۇستاپ تۇرۋ ماقساتىندا جەرگىلىكتىوندىرۋشىلەردىڭ قاتىسۋمەن اۋىل شارۋاشىلىعى جارمەڭكەلەرى ۇيىمداستىرىلىپ جاتقانىن جەتكىزدى.
«15 اقپان كۇنى وتكىزىلگەن جارمەڭكەدە 21 توننادان استام ەت ءونىمى، 1،3 توننا ءسۇت ءونىمى، 100 مىڭ دانادان استام جۇمىرتقا، جالپى العاندا 24 ملن تەڭگەنىڭ ءونىمى ساتىلدى. بۇل ساۋدا-ساتتىقتاعى باعا نارىقتاعى باعادان 15-20 پايىزعا تومەن بولدى»، - دەدى ب.اسانوۆ.
وتاندىق تاۋارلار بويىنشا باعانىڭ وسۋىنە نەگىز جوق، دەپ اتاپ ءوتتى وبلىس اكىمى باۋىرجان ابدىشيەۆ. «باقىلاۋدى جالعاستىرىڭىزدار. ەگەر ونى ورىندامايتىندار بولسا، شارا قولدانىپ، قاتاڭ تۇردە جازالاپ، جولىن كەسەتىن بولامىز»، - دەپ مالىمدەدى ءوڭىر باسشىسى.
پىكىر قالدىرۋ