1 قاراشادان باستاپ الماتىداعى ترامۆاي دەپوسىنىڭ جۇمىسى ۋاقىتشا توقتاتىلعانى تۋرالى بۇرىن  دا حابارلاعان بولاتىنبىز. قالا باسشىلىعى بۇل تاريحي كولىكتى ءبىرجولاتا قولدانىستان شىعارۋ ماسەلەسى  كۇن تارتىبىنە قويىلىپ وتىرعان جوق دەگەنىمەن، دەپو جۇمىسى قاشان جانداناتىنىن ناق باسىپ ايتا الماي وتىر. سودان دا بولار، تۇرعىندار اراسىندا ترامۆاي تاعدىرىنا قاتىستى ءتۇرلى اڭگىمەلەر بەلەڭ الا باستادى. سولاردىڭ ءبىرى – الماتى ورتالىعىنداعى ترامۆاي دەپوسى ورنالاسقان جەر قالتالىلاردىڭ كوز قۇرتىنا اينالدى، دەپونى جابۋ ارقىلى سول جەردى ساتۋدى، ساتىپ الۋدى كوكسەيتىندەر بولۋى مۇمكىن دەگەن اڭگىمە.

سونىمەن، الماتىداعى ورتالىق اۋدان سانالاتىن بايتۇرسىنوۆ-گوگول- ماسانچي-ايتەكە بي كوشەلەرىنىڭ كۆادراتىنداعى كولەمى شامامەن 2،5 گەكتارعا جۋىقتايتىن بۇل جەر تەلىمى ساتىلىمعا شىعارىلعان جاعدايدا قانشاعا باعالانۋى مۇمكىن؟ «ابسوليۋت» جىلجىمايتىن مۇلىك اگەنتتىگىنىڭ باس ديرەكتورى سەرگەي پوگرەبنياك  ۇلتتىق ۆاليۋتا «ەركىن جۇزۋگە» جىبەرىلمەي تۇرىپ بۇل اۋدانداعى 1 سوتىق جەر باعاسىنىڭ قۇنى 30-35 مىڭ اقش دوللارىن قۇراعانى، قازىرگى باعاممەن 20-25 مىڭ اقش دوللارى كولەمىندە باعالاناتىنىن ايتادى. ياعني، ەل اۋزىنداعى اڭگىمە شىندىققا اينالسا، دەپو اۋماعى 5 ميلليون دوللارعا ساتىلۋى مۇمكىن. قالا ىشىندە ءۇي سالاتىن جەر تاپشىلىعىن ەسكەرسەك، بۇل ايماق ءىرى قۇرىلىس كومپانيالارى تاراپىنان سۇرانىسقا يە ەمەس دەپ ايتا المايسىز.  

«ترامۆاي دەپوسى ءبىرجولا جابىلىپ جاتقان جوق، ونداعى تەحنيكا مەن جولدى قالپىنا كەلتىرۋ ءۇشىن جۇمىستى ۋاقىتشا توقتاتا تۇرۋ تۋرالى شەشىم قابىلداندى» دەگەن قالالىق جولاۋشىلار كولىگى باسقارماسىنىڭ باستىعى ەرلان ءادىلوۆ  بۇل «ۋاقىتشا توقتاتۋدىڭ» قانشاعا سوزىلاتىنىن ناقتى ايتا المادى. الايدا، بۇگىندە دەپو جۇمىسشىلارىن تروللەيبۋس، اۆتوبۋس جۇرگىزۋشىلىگىنە قايتا وقىتۋ، باسقا جۇمىستارعا اۋىستىرۋ ماسەلەلەرى قىزۋ قاراستىرىلۋدا. سوعان قاراعاندا، 7 قاراشادا اشىلعانىنا 78 جىل تولاتىن دەپو جۇمىسىن جانداندىرۋ اكىمدىكتىڭ جاقىن ۋاقىتتاعى جوسپارىندا جوق سياقتى.  

دارحان مۇقان