بۇگىن ەلباسى نۇرسۇلتان نازاربايەۆتىڭ پاريجدە ىسكەر قاۋىمداستىق وكىلدەرىمەن كەزدەسۋى ءوتتى. بۇل تۋرالى «قامشى» پورتالى حابارلايدى.

كەزدەسۋگە بۇگىندە ەۋروپادا «فرانسيا ونەركاسىبىنىڭ كاپيتاندارى» اتالىپ كەتكەن ءىرى-ىرى 13 كومپانيانىڭ باسشىلارى قاتىستى. ولاردىڭ ىشىندە Airbus، Alstom Transport، Vicat، Soufflet، Rothschild Group، Veolia Asia، Areva سىندى الەمگە ايگىلى كومپانيالاردىڭ جەتەكشىلەرى بار.

ەلباسى كەزدەسۋگە قاتىسۋشىلارعا قازاقستان تۋرالى تانىتقان قىزىعۋشىلىقتارى ءۇشىن العىسىن ءبىلدىردى.

«ەڭ الدىمەن بارلىقتارىڭىزعا ءبىزدىڭ رەسپۋبليكاعا قىزىعۋشىلىق بىلدىرگەندەرىڭىز ءۇشىن العىس ايتامىن. سىزدەردىڭ ارالارىڭىزدا قازاقستاندا قازىرگى تاڭدا جۇمىس ىستەپ جاتقان كومپانيالار دا جەتكىلىكتى جانە ولار ءبىزدىڭ ەلدىڭ ۇزاق مەرزىمدى دامۋ پەرسپەكتيۆالارىمەن جاقسى تانىس»، - دەدى ءوز سوزىندە ن. نازاربايەۆ. قازاقستاننىڭ تابيعي رەسۋرستارعا باي مەملەكەت ەكەنىن، الەمدىك داعدارىس سالدارىنان قوسىمشا ينۆەستيسيالار تارتۋ مۇمكىندىگى قاراستىرىلىپ جاتقانىن ايتقان پرەزيدەنت فرانسۋز كاسىپكەرلەرى ەلگە ينۆەستيسيا قۇيسا، ولاردىڭ الدىندا جالپى حالىق سانى 170 ميلليوننان اساتىن تۇتاستاي ەۋرازيالىق ەكونوميكالىق وداقتىڭ نارىعى اشىلاتىنىن جەتكىزدى. قازاقستاندا شەتەلدىك ينۆەستورلاردىڭ جۇمىسىنا مۇمكىندىكتەردىڭ مولدىعى مەن مەملەكەت تاراپىنان جاسالىپ وتىرعان قولايلى جاعدايعا نازار اۋدارتتى.

سونىمەن قاتار، ەلباسى سوڭعى ۋاقىتتا جۇزەگە اسىپ جاتقان بىرىككەن جوبالار تۋرالى دا ءسوز ەتتى.

«الستوم» ەلەكتروۆوزدارىن شىعارۋ، «ەۋروكوپتەر» تىكۇشاقتارى، «پەجو» مەن «سيتروەن» كولىكتەرىن قۇراستىرۋ، كۇن باتارەياسى، سەمەنت شىعارۋ، «دانون» ماركالى ءسۇت ونىمدەرى، تاعى باسقا جوبالار ءساتتى جۇزەگە اسۋدا»، - دەگەن ەلباسى الداعى ارىپتەستىككە دە ۇلكەن سەنىم ءبىلدىردى.

سونىمەن قاتار، پرەزيدەنت فرانسۋز بيزنەسمەندەرىن 2017 جىلى استانادا وتەتىن ەكسپو حالىقارالىق كورمەسىنە شاقىردى.

ايتا كەتۋ، كەرەك ەلباسى كەزدەسۋگە قاتىسقان 13 كومپانيانىڭ باسشىلارى تاراپىنان قويىلعان سۇراقتار مەن وتىنىش-تىلەكتەردىڭ بارلىعىنا ءوزى جاۋاپ بەرىپ وتىردى. 

ءدال قازىرگى ۋاقىتتا ەكى جاقتى كەلىسسوزدەر بارىسىندا جالپى قۇنى 1،5 ميلليارد اقش دوللارى بولاتىن كەلىسىم-شارتتارعا قول قويىلدى.

قازاقستاندا فرانسيانىڭ 24 كومپانياسى قۇنى 2 ميلليارد دوللاردان اساتىن 14 جوبا بويىنشا جۇمىس ىستەۋدە. الدا تاعى وسىنداي 10 جوبا ىسكە قوسىلادى دەپ كۇتىلۋدە. ەكى ەل اراسىنداعى تاۋار اينالىمى 6 ميلليارد دوللاردان اسادى.  

ەلباسىنىڭ فرانسياعا ەل پرەزيدەنتى ف. وللاندتىڭ شاقىرۋىمەن ءوتىپ جاتقان رەسمي ساپارى بۇگىن باستالعانىن ەستەرىڭىزگە سالامىز.

ءبىلال قۋانىش

پاريج