قازاقستاندىق كاسىپقوي بوكسشى قانات يسلام ەرتەڭ استانا ۋاقىتىمەن تاڭعى ساعات سەگىزدە جەكپە-جەككە شىعادى. بۇل تۋرالى بوكسشى ءوزىنىڭ فەيسبۋك پاراقشاسىندا جاريالادى.

ەستەرىڭىزگە سالساق، قاناتتىڭ جەكپە-جەككە شىعاتىن قارسىلاسى وسىدان ەكى كۇن بۇرىن اۋىسقان بولاتىن. اقش-تىڭ فلوريدا شتاتىنداعى مايامي قالاسىندا مەكسيكالىق الەكسيس كاماچومەن جۇدىرىقتاسادى دەگەن قانات ەرتەڭ دومينيكان رەسپۋبليكاسىنىڭ بوكسشىسى، 31 جاستاعى دجوناتان باتيستامەن رينگكە شىعادى. ول وسى ۋاقىتقا دەيىن 22 كەزدەسۋدىڭ 15ء-ىن (ونىڭ ىشىندە 8 بەلدەسۋدى مەرزىمىنەن بۇرىن) جەڭىسپەن اياقتاعان. جەتى جەڭىلىستىڭ تەك ەكەۋىندە عانا نوكاۋت العان.  

الايدا، دومينيكاندىقتىڭ بەلدەن تومەن ۇرۋ ادەتى ءۇشىن ەكى رەت بوكستان شەتتەتىلگەنىن ەستەرىڭىزگە سالامىز. سوڭعى رەت ءوز وتانداسى وسكار رودريگەزبەن كەزدەسىپ، جەڭگەن. 

قاناتپەن جۇدىرىقتاسۋى ءتيىس بولعان مەكسيكالىق الەكسيس كاماچو دا سول كۇنى امەريكالىق ەريكسون لۋبينمەن جۇدىرىقتاسادى.

قانات يسلام كاسىپقوي بوكستاعى جەتەكشى كومپانيالاردىڭ بىرىمەن كەلىسىم-شارت جاساۋ ۇستىندە جانە WBA Federalatin رەيتينگىسىندە ءوز كاتەگورياسى بويىنشا كوش باستاپ تۇرعانىن ەستەرىڭىزگە سالامىز.