بەلگىلى ءدىنتانۋشى مۇرتازا بۇلۇتايدىڭ اكەسى ءجۇنىس قاجى راقيسوپى ۇلىنىڭ قايتىس بولۋىنا بايلانىستى تۋعان-تۋىستارىنا كوڭىل ايتامىز. قازاقتىڭ "قارالى كوشىن" باسىنان وتكەرگەن قازىنا قارتتىڭ جاتقان جارى ءجاناتتا توپىراعى تورقا بولسىن!
مارقۇم اقساقال تۋرالى از-كەم اقپاراتتى مۇرتازا مىرزانىڭ فەيسۋكتەگى مىنا جازبالارىنان بىلە الاسىزدار.
باۋىرلار، دوستار! بۇگىن مەن ءۇشىن ازالى دا قازالى كۇن، تەك مەن ەمەس جانتەكەيدىڭ تايلاق اتاسىنان تاراعان ءبىر قاۋىم ەل جاسى ۇلكەن قارياسىنان ايىلىرىپ وتىر، قازاق حالقى كوپتى كورگەن، التايدان انادولىعا جاياۋ بارعان، قىرعىن مەن قيىنشىلىقتى ءبىر كىسىدەي كورگەن اقساقالىنان ايىرىلىپ وتىر... اكەم ءجۇنىس قاجى راقيسوپى ۇلى 93-جاسقا قاراعان شاعىندا بۇگىن تاڭەرتەڭ انكارادا ومىردەن وزدى. سوڭعى ءتورت جىل بويى توسەك تارتىپ، اۋىر ناۋقاس بولعانىمەن، اكەتايىم سابىرعا سالىپ، ءوزىنىڭ ونەگەلى وسيەتتەرىن ايتىپ كەلىپ ەدى، دەگەنمەن ءدام تاۋسىلدى، اللادان بۇيرىق كەلدى! اسقار تاۋىم شاعىلعانداي، بايتەرەگىم قۇلاعانداي كۇي كەشىپ وتىرمىن. ومىرگە شىر ەتىپ كوز اشقالى بەرى وسى اكەتايىمنان ەستۋشى ەم قازاقتىڭ بۇرىنعى كوشپەلى ءومىرىن، تاريحىن، ءسالت-داستۇرىن... باركولدىڭ سارشوقىسىن، بيسان كولىن، موريدىڭ قۇمىن، شونجىنىڭ دابانقۋىن، قۇمىلدىڭ كۇنگەيىن، بۋىرشىننىڭ شۇڭقىرىن، قىزىلتاس پەن قىزىلقايىڭىن... اعالارىمەن بىرگە قالاي اڭعا بارعانىن، قوبدانىڭ بازارىنا مال ايداعاندارىن، گانسۋ جەرىن قالاي كەشكەندەرىن، قازاقتىڭ 1937-1941 جىلدارداعى قارالى كوشىن، تيبەتتە مارقۇم بولعان اكەسى مەن اعالارىن قالاي جەرلەگەنىن، پاكىستاندا وتكەن ونشاقتى جىلدارىن... اقىت قاجىنىڭ ولەڭدەرىن جاتقا وقيتىن ەدى، ءوزى دە ولەڭ جىرلار جازىپ، ومىردە كورگەن-تەرگەنىن امانات ەتىپ قالدىرىپ كەتتى. قازاقستانعا شەشەممەن بىرگە ءتورت مارتە كەلىپ، جارتى جىلدان تۇرىپ، الماتى مەن باسقا دا ايماقتاردى ارالاپ، تۋىستاردى كورىپ، ابدەن رازى بولعان ەدى. ولەڭدەرى مەن ماقالالارى «الماتى اقشامى»، «زامان قازاقستان»، «جۇلدىز» جۋرنالى قاتارلى باسىلىمداردا جاريالاندى، قازاق راديوسىن ءوزى تاۋىپ بارىپ، سۇحبات بەرىپ كەتىپتى جارىقتىق ءبىر كەلگەنىندە، تۇركيادا دا ءبىرتالاي دەرەكتى فيلمدەردە كەيىپكەر رەتىندە سۇحباتتارى بەرىلدى، زەرتتەۋشىلەر مەن ءتىل ماماندارى كەلىپ اكەمنەن كوپ دۇنيەلەردى جازىپ الاتۇعىن... اكەم مەن ءۇشىن بۇرىنعى تاريحپەن بىزدەردى جالعاستىرىپ جاتقان التىن كوپىر ىسپەتتى ەدى، تامىرى تەرەڭدە جاتقان بايتەرەك ەدى... ءبىرازدان جانازاعا اتتانامىن، ەرتەڭ انكارادا ماڭگىلىك مەكەنىنە شىعارىپ سالامىز، سىزدەر دە دۇعادا بولىڭىزدار باۋىرلار، جانىڭ ءجانناتتا بولسىن اسىل اكەم مەنىڭ! جارقىن بەينەڭ، عيبراتتى ءومىرىڭ، ايتقان ناسيحات سوزدەرىڭ ءارقاشان دا جادىمدا بولادى...
"قامشى"
پىكىر قالدىرۋ