31 قازان كۇنى ەلباسى نۇرسۇلتان نازاربايەۆ العاش رەت جاريا تۇردە جاڭا ازاماتتىق پروسەستىك كودەكسكە قول قويعان ەدى. ءراسىم اياسىندا ەلباسى بۇل قۇجاتتىڭ قۇقىق سالاسىن تۇبەگەيلى جاقسارتاتىنىن ايتقان-تىن. دەمەك، ەگەر اتالعان كودەكستە قاراستىرىلعان نورمالار جۇزەگە اسسا، سوت پروسەستەرى اشىق ءوتىپ، تيىسىنشە، حالىقتىڭ سوت جۇيەسىنە دەگەن سەنىمى ارتا باستاۋى كەرەك.
سونىمەن قاتار، قۇجاتتا سوتقا جۇگىنىپ، داۋدى ۋشىقتىرماي-اق، تاراپتار ءوزارا مامىلەگە كەلۋ جولدارى ارقىلى دا تۇيتكىلدى دۇنيەنىڭ ءتۇيىنىن تارقاتۋعا بولاتىنى كورسەتىلگەن. الداعى ۋاقىتتا ءىس جۇرگىزۋدىڭ جەڭىلدەتىلگەن ءتۇرى دە كەڭىنەن قولدانىلاتىن بولادى. قازاقستان پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن كەزەكتى بريفينگ وسى ماسەلەگە ارنالدى.
ماسەلەن، جوعارعى سوتتىڭ ازاماتتىق جانە اكىمشىلىك ىستەر جونىندەگى قاداعالاۋشى سوت القاسىنىڭ سۋدياسى ۇلبوسىن سۇلەيمەنوۆا ازاماتتىق پروسەستىك كودەكستىڭ جاڭا جوباسى سۋديالاردىڭ VI سەزىندە مەملەكەت باسشىسىنىڭ ازاماتتىق پروسەستىك زاڭنامانى جەتىلدىرۋ تۋرالى تاپسىرماسىنا بايلانىستى ازىرلەنگەنىن ايتتى. «كودەكس ازاماتتىق ىستەردى ساپالى ءارى جەدەل قاراۋ ءتارتىبىن كوزدەيدى. سونداي-اق، ول تاراپتاردى تاتۋلاستىرۋعا، وزىق اقپاراتتىق تەحنولوگيالاردى كەڭىنەن قولدانۋعا باعىتتالعان. وسىعان وراي، قولدانىستاعى كودەكستىڭ نورمالارى كەشەندى تۇردە قايتا قارالدى. ونى تالقىلاۋعا بارلىق ازاماتتىق قوعام وكىلدەرى قاتىستى. ينتەرنەت رەسۋرستارعا كەلىپ تۇسكەن ۇسىنىستاردىڭ ءبىرازى ەسكەرىلدى. كودەكس جوباسىنىڭ ەرەجەلەرى كوپتەگەن دوڭگەلەك ۇستەلدەردە، سەمينارلاردا، كونفەرەنسيالاردا تالقىلاندى»، – دەدى ول.
ونىڭ ايتۋىنشا، قۇجاتتى دايىنداۋ بارىسىندا حالىقارالىق ساراپشىلاردىڭ پىكىرلەرى دە ەسكەرىلىپتى. «شەتەلدىك زاڭنامالار جان-جاقتى سارالاۋدان ءوتتى. مۇنىڭ ءوزى قۇقىق سالاسىنا قاتىستى بارلىق تەتىكتىڭ نازاردان تىس قالماعانىن كورسەتەدى. ماسەلەن، كەيبىر نورمالار قۇجات جوباسىنا ەنگىزىلدى»، – دەدى بۇل جونىندە سۋديا.
بريفينگ كەزىندە رەسپۋبليكالىق ادۆوكاتتار القاسىنىڭ ءتوراعاسى ءانۋار تۇگەل پوستكەڭەستىك كەڭىستىكتە جانە الەمدىك تاجىريبەدە العاش رەت ازاماتتىق پروسەستىك كودەكستە ادۆوكاتتاردىڭ تاتۋلاستىرۋ شارالارىن جۇزەگە اسىراتىنى بەكىتىلگەنىنە توقتالدى. «مۇنداعى نەگىزگى ايتار وي مىناۋ: ياعني، تاتۋلاستىرۋ شارالارى كەزىندە ازاماتتارعا سوتقا بارۋدىڭ قاجەتى جوق. سەبەبى، سوتقا كەتەتىن قاراجات شىعىنى دا، مورالدىق جاعىنان كەتەتىن «شىعىن» دا وراسان. ال تاتۋلاستىرۋ شارالارى ارقىلى ازاماتتار وزدەرىنىڭ قاراما-قايشىلىققا تولى قارىم-قاتىناستارىن ءبىر ىزگە تۇسىرە الادى. ماسەلەن، كودەكستە سوت ادىلدىگىن دامىتۋعا ىقپال ەتەتىن مەدياسيا ينستيتۋتىن ودان ءارى دامىتۋ، سوتتاردىڭ جۇكتەمەسىن ازايتۋ، سۋديا وتكىزەتىن سوتتاعى جاڭا پروسەستىك قىزمەت – مەدياسيانى ەنگىزۋ قاراستىرىلعان»، – دەدى ءا.تۇگەل.
ونىڭ ايتۋىنشا، بۇگىنگى كۇنگە دەيىن مەدياتور مەن سوت جۇرگىزەتىن مەدياسيانىڭ قاجەتتىلىگىن سوت پروسەستەرى انىق كورسەتىپ بەرگەن. ماسەلەن، 2014 جىلى كاسىبي مەدياتورلاردىڭ جانە سۋديالاردىڭ قاتىسۋىمەن مۇنداي ۇدەرىس ءساتتى جۇزەگە اسىرىلىپ، بارلىعى 9 مىڭنان استام مەدياسيا جۇرگىزىلىپتى.
ال باس پروكۋراتۋرانىڭ 4ء-شى دەپارتامەنتىنىڭ ءبولىم باسشىسى مارات ابىشيەۆ جاڭا كودەكس شەڭبەرىندەگى پروكۋراتۋرانىڭ رولىنە توقتالىپ، مەملەكەت ءۇشىن ينۆەستيسيالىق داۋ­لاردى شەشۋدىڭ ماڭىزى قانداي ەكەنىن ايتتى. «بۇل قۇجاتتا كورسەتىلگەن نورمالار بويىنشا، پروكۋرورلاردىڭ بەلگىلى ءبىر ىستەر كاتەگوريالارى بويىنشا سوت پروسەسىنە قاتىسۋى قىسقارتىلدى. ولار نەگىزىنەن جەكە قۇقىقتىق كەلىسپەۋشىلىكتەرگە بايلانىستى. ال ولارعا پروكۋرورلاردىڭ قاتىسۋى قاجەت ەمەس»، – دەدى م.ابىشيەۆ ءوز سوزىندە.

دەرەككوز: ەگەمەن قازاقستان