22 اقپان كۇنى جەر بەتىندە راگنا́روك (Ragnarök) بولۋى مۇمكىن. گەرمان-سكانديناۆ ميفولوگياسىندا بۇل قۇدايلار مەن بۇكىل الەمنىڭ ءولىمى دەپ اتالادى. بۇل كۇنى فەنرير دەپ اتالاتىن الىپ قاسقىر كۇندى جۇتىپ، الەم تۇنەكتە قالادى دەپ سەنەدى ەۋروپا حالقى.

اڭىزدا ايتىلعانداي، اقىرزامان الدىندا ءۇش جىل قاتارىنان قىس كۇشىنە ءمىنىپ، شەكارالار جويىلادى. سونىمەن قاتار، ۇلى سوعىس بولىپ، ودين، تور جانە فرەير قۇدايلارى قازا تابادى. ەڭ سوڭىندا جالعىز ەركەك پەن ايەل عانا قالادى جانە ولار ادامزات ءومىرىن ودان ءارى جالعايتىن بولادى دەلىنگەن وسىناۋ اڭىزدا. انگليانىڭ سولتۇستىگىندەگى يورك قالاسىندا ۆيكينگتەر جىل سايىن وسى كۇندى مەرەكەلەيدى. ەگەر 22 اقپانعا دەيىن قىس اياقتالماسا وندا راگناروك ورىن الۋى مۇمكىن دەپ سەنەدى ولار. وسى اپتانىڭ سەنبىسىندە 300-گە جۋىق ۆيكينگ وزدەرىنىڭ ۇلتتىق كيىمدەرىن كيىپ، يورك كوشەلەرىمەن ءجۇرىپ وتپەك. ال، ۆيكينگتەردىڭ تاريحى مەن مادەنيەتىن زەرتتەيتىن نورۆەگيالىق ورتالىق جەتەكشىسى دانيەل داگلان اڭىزدىڭ استارىندا شىندىقتىڭ جاتقانىن ايتىپ وتىر. "اقىرزاماننىڭ ورناۋى ەكىتالاي، ارينە. الايدا، شەكارالاردىڭ جويىلۋى بولىپ جاتىر. ونى تىكەلەي تۇسىنۋگە بولمايدى. مىسال رەتىندە ينتەرنەتتى الۋعا بولادى. ول بارلىق شەكارانى بۇزدى" دەيدى عالىم.